M’Cheyne Bible Reading Plan
Jesus In Front Pilate
15 Early morning time, all da main priest guys, da older leadas fo da peopo, da teachas who teach Godʼs Rules, an all da main leadas, wen go figga out wat fo do bout Jesus. So dey tie him up, take him away, an wen give him to Pilate, da governa. 2 Pilate aks Jesus, “Eh, you da King fo da Jews, o wat?”
Jesus tell him, “You da one wen say dat.”
3 Da main priest guys wen poin finga plenny at Jesus an say he wen do plenny bad kine stuff. 4 So Pilate aks him one mo time, “You no goin say notting? You no hear all da stuff dey saying bout you?”
5 An still yet Jesus neva say notting. So Pilate start fo try figga out dis guy.
Dey Say Jesus Gotta Mahke
6 Now, Governa Pilate, he let one prisona guy go every year at da Passova religious time. Any guy da peopo pick, Pilate let him go. 7 Had one guy name Barabbas dat stay inside da prison wit all da odda terrorist guys dat wen kill peopo wen dey wen beef agains da Rome army guys.
8 All da peopo wen come by Pilate an tell him, “Eh, you goin do jalike you everytime do fo da Passova?” 9 Pilate aks um, “You guys like fo me let go da King fo da Jews?” 10 Now, Pilate know dat da main priest guys wen give Jesus to him cuz dey so mad at Jesus, cuz everybody listen to him an not dem.
11 But da main priest guys wen presha da peopo fo say dis: “We like Barabbas! Kill Jesus awready!” 12 Den Governa Pilate aks dem one mo time, “Den wat I goin do wit Jesus, da guy you guys call da King fo da Jews?”
13 Dey yell, “Kill him on top one cross!”
14 But Pilate say, “How come? Wat kine bad ting he wen do?”
But dey yell mo loud, “Kill him on top one cross!”
15 Pilate like make da peopo stay good inside, so he wen let Barabbas go fo dem. He tell da army guys fo whip Jesus an den kill him on top one cross.
Da Army Guys Make Fun A Jesus
16 Den da army guys wen take Jesus inside da palace, da Rome army headquarters, an dey tell all da odda army guys fo come by dem. 17 Dey put one long red king kine robe on top him. Dey make one crown from thorns, an put um on top his head. 18 Den dey say, “Ho! Check um out! Da King fo da Jews!” 19 An dey wack him on top his head wit one bamboo, an spit on top him. An dey go down in front him jalike dey showing respeck fo him. 20 Wen dey was pau making fun a him, dey take off da red robe an put his own clotheses back on top him. Den dey take him outside fo kill him on top one cross.
Dey Put Jesus On Top Da Cross Fo Mahke
21 Had one guy name Simon from Cyrene town. Alexander an Rufus, Simon dea fadda. He was coming inside Jerusalem. So dey tell him he gotta carry Jesus cross. 22 Dey bring Jesus to da place dey call Golgota. Dat mean “da Skull Place.” 23 Dey try give him wine wit bitta stuff inside, but he no like. 24 Dey hang him on top da cross wit nails, an den dey go throw dice, fo see wat guy goin get wat clotheses from Jesus. 25 Dey hang him on top da cross bout nine clock in da morning. 26 Dey make one sign fo tell everybody wat he wen do wrong. Da sign say,
“Da King Fo Da Jews.”
27 Dey hang two crook guys on top two crosses near him, one on da right side an da odda one on da left side. 28 [Jalike da Bible say, “Dey wen make him jalike one crook.”]
29 Had some peopo dea dat shake dea finga at him an say, “Oh, fo shame! You wen say you goin broke down da temple an goin build um up again in three days! 30 So, we like see you get yoaself outa dis! Come down from da cross, now!”
31 Jalike da odda guys, da main priest guys an da teachas dat teach Godʼs Rules wen make fun a him too. Dey tell each odda, “He wen get da odda peopo outa da stuff dey stay in, but he no can get himself outa dis! 32 If he da Christ, da Spesho Guy God Wen Send, da King fo us Israel peopo, kay den, he can come down from da cross now! Den we goin trus him!” An da crook guys dat stay hanging dea near him on top da odda crosses, dey talk any kine to him too.
Jesus Mahke
33 Noontime wen get real dark all ova da place, fo three hours. 34 Three clock Jesus wen yell real loud, “Eloi, eloi, lema sabaktani!” Dat mean, “My God, my God, how come you go way an leave me ova hea?”
35 Some odda guys dat stay ova dea wen hear him, an dey tell, “Listen! He stay calling Elijah!” 36 One guy wen run an put one sponge inside da sour wine, an put um on top one bamboo, an try give um to Jesus fo drink. He say, “Try wait! We go see if Elijah goin come fo get him outa dis.”
37 Den Jesus yell again real loud, an den he let go his spirit.
38 Right den an dea da big curtain inside da temple broke in two from da top to da bottom. 39 Da captain fo da army guys standing in front Jesus hear him yell an see how he wen mahke. He say, “Fo real kine, dis was Godʼs Boy!”
40 Get some wahines standing far, watching everyting dat wen happen. Had Mary from Magdala, one nodda Mary dat get two boys, da younga James an Joses, an Salome. 41 Befo time, dey wen go wit Jesus from Galilee side, fo take care him. Had plenny odda wahines who wen come wit him to Jerusalem. Dey standing dea too.
Dey Bury Jesus
42 Dat was da day fo make everyting ready fo da Rest Day, befo da sun go down. 43 Had one guy, Joseph from Arimatea, from da main leadas. Everybody get respeck fo him. He stay waiting fo God come da King on top da earth too. He no scared. He go aks Pilate if he can take Jesus body. 44 Pilate say, “Wow! I neva know he mahke awready!” So he tell da captain fo come, an aks him if Jesus wen mahke fo shua. 45 Da captain tell him dat Jesus wen mahke awready, so Pilate tell his guys fo give da body to Joseph. 46 Joseph go buy some linen cloth, take down da body, wrap um inside da cloth, an put um inside da tomb, da one dat was awready cut inside da rock. Den dey push one big rock in front da hole fo close um. 47 Mary from Magdala, an Mary, Joses mudda, dey wen see um put him dea.
Do Wat Make Da Odda Peopo Stay Good Inside
15 You know, us guys dat stay strong inside, we gotta kokua da peopo dat no stay strong nuff inside fo handle all da stuff dat happen. No good we ony do da tings dat make us guys stay good inside. 2 Dis wat I mean: us guys gotta try do wass good fo our bruddas an sistas, so dey goin come mo strong fo handle, an stay good inside too.
3 You know, even Jesus Christ neva do wat he wen do jus fo make himself stay good inside. Jalike God wen say befo time inside da Bible bout da bad kine stuff goin happen to Jesus,
“Wen dey stay talk any kine stuff to yoa face,
Az jalike dey telling me same ting.”
4 Everyting dat peopo wen write inside da Bible befo time, all dat stay inside da Bible fo teach us, so den we can come mo strong fo hang in dea, an we can go get good kine words from da Bible. Den we goin know fo shua dat bumbye God goin do plenny good tings fo us. 5 God, he da One dat help us hang in dea wen get hard time, an he give us good kine words. I like him help you guys figga da same tings wit each odda, jalike how Jesus Christ like you guys fo figga togedda. 6 Den all you guys goin tink togedda, an tell togedda how awesome God stay. God, he our Boss Jesus Christʼs Fadda.
Da Good Kine Stuff From God, Fo Da Jewish Peopo An All Da Odda Peopos Too
7 So den, take each odda in, jalike Christ wen take you guys in. Den peopo goin tell how awesome God stay. 8 I like say dis: Christ wen come jalike one worka guy fo help da Jewish peopo fo know dat God tell da trut an he do wat he say, an fo make um come true all da tings God wen promise our ancesta guys fo happen. 9 Den all da diffren odda peopos too, dey goin tell how awesome God stay, cuz dey know dat he get pity fo us guys an give us guys chance. Jalike David wen say befo time inside da Bible,
“Az why I goin talk good bout you plenny
To all da odda diffren peopos.
I goin sing songs bout wat kine guy you in front oddas.”
10 But da same ting, get one nodda place inside da Bible dat tell,
“Eh, all you diffren peopos from all ova da place,
Stay good inside, jalike Godʼs own peopo.”
11 Anodda place inside da Bible David say dis:
“All you odda diffren peopos,
Go tell how awesome an good da Boss stay.”
12 An anodda place inside da Bible Isaiah wen write,
“From Jesseʼs boy King David,
Goin get one nodda Guy dass goin come bumbye.
He goin come da leada fo all da diffren peopos.
Dey know dat he goin come bumbye,
An dat dey goin trus him cuz dey know who him.”
13 I like you guys stay real good inside an yoa hearts rest inside cuz you guys trus him. An da God dat make you guys stay shua bout wat goin happen bumbye, he goin do everyting good kine. Den Godʼs Spesho Spirit goin make you guys mo strong fo wait fo wat God goin do fo you guys bumbye.
God Wen Send Paul All Ova Fo Talk Fo Him
14 My bruddas an sistas, I know dis fo shua: dat you guys get good heart everytime, you guys get all da smarts you need, an you guys know how fo tell each odda fo do da importan stuff. 15 You know, I no shame fo write you guys dese tings, cuz az fo help you guys rememba dem one mo time. I do dis cuz God wen do plenny good kine stuff fo me. 16 God wen go make me one worka guy fo Jesus Christ fo tell all da diffren peopos da Good Stuff Bout God, jalike one priest guy. God do dat cuz he like all da diffren peopos come jalike one present fo him dat make him come good inside. An Godʼs Spesho Spirit goin make dem be good an spesho fo God.
17 Dass how come I feel plenny proud bout all dis stuff I doing fo God, cuz I stay tight wit Jesus Christ. 18 I no even talk bout any odda kine stuffs. I ony talk bout da tings Christ wen do, an I help him fo do um. Da diffren peopos listen to Christ now, cuz a da tings I wen tell an do. 19 Christ wen give me da power from Godʼs Spirit fo do awesome kine stuff. He do dat fo show who Christ. Dass how I wen tell all da Good Kine Stuff Bout Christ to all da peopo, from Jerusalem side, all da way to Illyricum side. 20 From long time befo I tinking, “I really like tell bout Christ to da peopo dat neva hear notting bout da Good Stuff Bout Him!” Cuz I no like go teach wea get odda peopo stay teaching awready. 21 Jalike da Bible wen say befo time,
“Da peopo dat neva have nobody fo tell um bout God,
Dey da peopo dat goin see him.
Da peopo dat neva hear notting befo time,
Dey goin undastan.”
Paul Make Plan Fo Go Rome
22 Az how come I neva go by you guys befo. From long time I like go, but den, I no can. 23 But now, I pau do my work dis side, an long time now, I wen like plenny fo go see you guys. 24 Az why, wen I go Spain side, I like stop see you guys dat time. Afta I stay wit you guys litto wile, you guys can kokua me fo go Spain.
25 I going Jerusalem side first, fo kokua da peopo ova dea dat stay spesho fo God. 26 Cuz da bruddas an sistas Macedonia side an Akaia side wen like give money fo kokua da poor peopo Jerusalem side dat stay spesho fo God. 27 Dey wen figga fo do dat, an dass good, cuz dey owe da Jerusalem peopo. Cuz all da odda peopos from all ova wen get da same good kine stuff dat da Spirit from God wen give da Jews first, so az good, yeah? if da church peopos dat not Jews give da Jewish bruddas an sistas some money fo help um.
28 So afta I pau dis job, an make shua dat da Jerusalem bruddas an sistas wen get da money, den I goin see you guys wen I going Spain. 29 I know dat wen I go by you guys, goin get all da good kine stuffs Christ like give us.
30 Eh, bruddas an sistas, I aks you guys fo pray hard wit me dat God goin help me. You guys pray cuz Jesus Christ yoa Boss, an cuz Godʼs Spirit give you guys love an aloha. 31 Aks God fo take care me Judea side, so da peopo dat stay ova dea dat no like trus God no goin hurt me; an, wen I go kokua da Jerusalem peopo dat stay spesho fo God, dey goin stay good inside cuz a dat. 32 Den, if God like, I going by you guys, an I goin stay real good inside, an rest up. 33 God, he da kine God dat make you guys heart rest inside. I like him stay tight wit all you guys. Dass it!
Copyright © 2000 by Wycliffe Bible Translators International. All rights reserved