M’Cheyne Bible Reading Plan
Mary Go See Elizabet
39 Dat time, Mary wen get up an wen go fast to one town in da hills Judea side. 40 Ova dea she wen go inside Zekariahʼs house, an wen spock Elizabet, an wen tell her, “Aloha!” 41 Wen Elizabet wen hear Mary say dat, da baby wen huli inside her, an Godʼs Spesho Spirit wen take ova Elizabet. 42 An she wen talk loud an say, “God stay do mo good fo you den fo all da wahines, an he stay do mo good fo da boy you goin born too! 43 But why dis good ting happen to me, dat you wen come by me, an you goin be my Boss mudda?! 44 Cuz wen I hear you say ‘Aloha,’ right den an dea da baby inside me wen huli cuz he stay good inside. 45 Da Boss stay do plenny good stuff fo you, cuz you stay shua dat da ting he say, goin happen.
Mary Sing One Song
46 Mary wen say,
“My heart say good tings bout da Boss Up Dea Inside Da Sky,
47 My spirit stay good inside
Cuz God take me outa da bad kine stuff I stay in,
48 Cuz he wen tink bout me, his poor worka!
From now on all da peopo goin say
God wen do plenny good stuffs fo me,
49 Cuz God get power
An wen do plenny importan tings fo me.
He stay spesho an good, dass wat kine God him.
50 He give da peopo chance dat show respeck fo him,
From da granfaddas to da kids.
51 He stay show his power
An stay make da peopo wit big head so dey no can do
All da stuff dey like do.
52 He stay pull down plenny big kings from dea thrones,
An he stay make da peopo dat no mo notting importan.
53 He stay give da hungry peopo good stuff fo eat,
An he stay send away da rich guys wit notting.
54 He stay help da Israel peopo dat work fo him.
He no foget fo give dem chance,
55 Jalike he wen tell our ancesta guys,
Abraham, an his ohana, foeva.”
56 Mary wen stay dea wit Elizabet three months, an den she wen go home.
John Da Baptiza Wen Born
57 Da time wen come fo Elizabet fo born her baby, an she wen born her boy. 58 Da peopo from ova dea an her ohana wen hear how plenny da Boss wen do cuz he get pity fo her, an dey all wen come real good inside wit her.
59 One week lata dey wen come fo cut da baby skin. Dey wen tink dey goin name him Zekariah jalike his fadda. 60 But his mudda say, “No way! We goin name him ‘John.’ ”
61 Dey tell her, “But you no mo nobody in yoa ohana wit dat name!” 62 Den dey wen make signs wit dea hands to his fadda, an wen aks him wat he like name da boy.
63 Zekariah wen aks fo one paper an wen write down, “He get da name ‘John.’ ” An dea jaws wen drop! 64 Right den an dea Zekariah wen start fo talk an say good tings bout God. 65 Da peopo from ova dea wen come scared. An everybody wen tell dis story all ova da place in da hills Judea side. 66 Everybody dat wen hear dat story wen tink plenny, an say, “Wat kine kid dis goin be?” An Godʼs power stay wit him.
Zekariah Sing One Song
67 Da time Godʼs Spesho Spirit wen take ova Johnʼs fadda Zekariah, he wen tell stuff from God, lidis:
68 “Tell good tings bout da Boss Up Dea Inside Da Sky,
Da God fo da Israel peopo!
He wen come fo cut loose his peopo
So dey no gotta be jalike slaves no moa.
69 He give us one Guy dat get power
Fo take us outa da bad kine stuff we stay in.
Dat Guy come from King Davidʼs ohana,
Da king dat wen work fo God.
70 From befo time da spesho guys dat wen talk fo God
Wen tell dis,
71 He wen promise fo take us away from da guys dat stay agains us
An from da power dey get.
72 He wen say he goin give our ancesta guys chance,
An he no goin foget da spesho deal he wen make.
73 He wen promise our ancesta Abraham fo shua
74 Dat he goin take us away from da guys dat stay agains us,
An from da power dey get,
He goin help us work fo him an no be scared,
75 So we can come spesho an right da way he see us
All da days we stay alive.
76 An you, my boy John, dey goin call you
One guy dat talk fo da God Dass Mo Importan Den All Da Odda Gods,
Cuz you goin go first, befo da Boss,
Fo make da road ready fo him,
77 Fo make da peopo know
Dat he goin take dem outa da bad kine stuff dey stay doing,
An he goin let um go an hemo dea shame from dat.
78 Our God give chance cuz he get big heart.
Dass why da new day goin come up fo us from God in da sky.
79 So da peopo dat stay do bad kine stuff,
Jalike dey stay live inside da dark an no can see notting,
An dey goin mahke inside,
God goin help dem fo know da trut.
Den we goin see da right way
An den our heart goin rest inside.”
80 Da boy John wen grow up, an his spirit wen come strong. He wen live inside da boonies till da day wen he wen come out an da Israel peopo wen see him.
Gotta Tell Everybody How Christ Wen Mahke On Top One Cross
2 Eh bruddas an sistas! Wen I wen go by you guys first time, I wen tell you guys all da kine stuff from God dat nobody eva wen know befo time. But I neva ack like I mo betta den you guys. An wen I wen talk to you guys, I neva talk jus fo make me look smart. 2 Wen I was wit you guys, I wen figga lidis: I ony know one ting, an dass Jesus Christ. He da Spesho Guy God Wen Send, but was him da peopo wen hang on top one cross fo kill um. An dass da ony ting I know fo shua.
3 You know, da first time, wen I wen go ova dea by you guys, I wen feel like I not strong, an I was scared an shaky. 4 No matta I was teaching, o I was talking to plenny guys, same ting, aah? I neva like talk jus fo make da peopo tink, “Eh, we can trus wat dis guy telling us, cuz he know how fo talk real good, yeah?” No ways, brah! But wen I wen talk, I wen show you guys dat I get da Spirit in charge a me, az why I get power. 5 Cuz I figga, no good you guys go trus God jus cuz you hear smart kine stuff dat peopo tell. Mo betta you trus God cuz he get da power, an you see wat he can do.
Da Smart Kine Stuff God Teach Us
6 Fo shua, wen us guys talk to da peopo who stay solid inside, we teach um smart kine stuff. But we no teach da same kine smart stuff da peopo inside da world stay teach nowdays, o da kine stuff da leada guys tink too. (Dem leada guys, dey all goin wipe out, you know.) 7 Us guys, we teach ony da smart kine stuff dat come strait from God. Cuz God wen hide um from da peopo befo time, but from da start he wen figga he goin let us guys know um, so bumbye we goin come awesome. 8 But da leada guys dat stay in charge nowdays, dey neva undastan. If dey wen undastan, fo shua dey no goin hang our awesome Boss on top da cross fo kill um.
9 So da smart kine stuff from God stay hide from befo time, jalike da Bible wen tell,
“Get tings you neva see,
Get tings you neva hear bout,
You no can even tink how unreal dis ting goin be.
Dass da kine stuff God wen make ready
Fo us guys dat get love an aloha fo him.”
10 But us guys, God show us all da stuff we neva know befo time, cuz Godʼs Spirit stay in charge a us.
Da Spirit, he undastan everyting. He even check out how God stay, deep down inside him. 11 Us guys, we all get our own spirit inside us. Dass how we know how we tink an ack. Same ting wit God -- no mo nobody know how God stay inside, but Godʼs own Spirit, he know.
12 You know, us guys, we get Godʼs Spirit in charge a us. Dass why we no tink da same way da peopo dat get da spirit from inside dis world tink. Inside us, we get da Spirit dat come from God, az why. God like us know all da good kine stuff he wen give us guys.
13 Dass da kine stuff us guys stay talk bout. Us guys teach da stuff Godʼs Spirit teach us. We no need talk fancy kine, jalike how da smart guys like talk wen dey teach. But us guys, we put togedda da tings dat come from Godʼs Spirit fo da peopo dat stay tight wit Godʼs Spirit. 14 Dass why, if get one guy dat no mo Godʼs Spirit in charge a him, ony his own self, dat guy no goin like take da kine stuff dat come from Godʼs Spirit. He goin tink, “Az wase time!” No way da guy goin undastan. Gotta stay tight wit Godʼs Spirit fo check out if dat kine stuff az da trut. 15 Da guy dat stay tight wit Godʼs Spirit, he can check um out wateva. But same time, all da odda peopo, dey no can check out dat guy. 16 Jalike da Bible wen say:
“Who can figga out wat God stay tinking, aah?
O who can teach God wat he suppose to do?
No mo nobody!”
But us guys, we know, cuz Christ help us guys tink jalike he tink.
Copyright © 2000 by Wycliffe Bible Translators International. All rights reserved