M’Cheyne Bible Reading Plan

Dey Goin Set Jesus Up

14 Da spesho religious time fo da Bread Dat No Mo Yeast, dat da time wen dey no put yeast inside da bread dat make um come big. Two days befo da spesho religious time an da Passova, da main priest guys an da teachas who teach Godʼs Rules, dey trying fo find one way fo trick Jesus so dey can bus him an kill him. ² Dey say, “We no can do um wen get da spesho religious time, cuz bumbye da peopo goin make big noise an fight.”

One Wahine Pour Perfume On Top Jesus Head

³ Jesus was Simonʼs house, inside Betany town. Simon, he one lepa guy befo time. Wen Jesus stay eating ova dea, had one wahine dat wen bring one fancy bottle made from alabaster rock. Inside had da nard kine fancy perfume dat cost plenny. She wen put da perfume on top Jesus head wen he was eating. ⁴ Some guys dea come all huhu, an tell each odda, “Eh, how come she throw way da perfume lidat? ⁵ How come she neva sell um fo mo den three hundred silva coin, an give da money to da peopo dat no mo notting?” An dey scold her.

⁶ Jesus tell um, “Eh, no give her hard time! How come you guys bodda her? She wen do dis fo me wit plenny aloha. ⁷ Everytime goin get peopo dat no mo notting stay wit you guys, an you can help dem weneva you like. But I no goin stay wit you guys everytime. ⁸ She wen do wat she can do. Wen she wen put dis perfume on top me, befo I mahke, dis wen make me ready fo wen dey goin bury me. ⁹ Dass right! An I like tell you guys dis too: Weaevas my guys goin teach da Good Kine Stuff Bout Me all ova da world, dey goin tell wat dis wahine wen do, an da peopo goin rememba her.”

Judas Say He Goin Set Jesus Up

¹⁰ Judas Iscariot, he one a Jesus twelve guys. He go talk to da main priest guys, so he can set Jesus up fo dem guys. ¹¹ Dey hear dat, an dey stay good inside. Dey promise dey goin give him money. From dat time Judas wen look fo chance fo set Jesus up.

Jesus Eat Da Passova Food Wit His Guys

¹² On da first day a da spesho religious time wen dey make da Bread dat No Mo Yeast, dass wen da peopo kill da baby sheep fo make da Passova sacrifice. Jesus guys wen go by him an aks him, “Wea you like us make da stuff ready fo you fo eat da Passova kine food?”

¹³ He send two a his guys. He tell um, “Go inside da town. One guy goin come by you guys dea. He carry one big water jug. Go wit him. ¹⁴ Da guy going inside one house. Tell da owna, ‘Da Teacha say, “Wea my spesho room stay, so I can eat da Passova food wit my guys?” ’ ¹⁵ Da owna goin show you guys one big room upstairs, all set up awready. Dass da place wea you guys can make da food ready fo us.”

¹⁶ Da two guys go inside town, an find everyting jalike Jesus wen say. Dey make da food ready fo da Passova dinna.

¹⁷ Afta da sun go down, Jesus wen come wit his twelve guys. ¹⁸ Dey eating, an he say, “I tell you guys fo shua: one a you guys who stay eating wit me goin set me up!”

¹⁹ Dey come real sad, an each guy tell him, “Boss, eh, fo shua you not talking bout me, yeah?”

²⁰ Jesus say, “One a you twelve guys who wen put his piece bread inside da same sauce wit me, he da guy goin set me up. ²¹ I da Guy Dass Fo Real. I goin mahke jalike da Bible wen say befo time. But auwe! Da guy who goin set me up goin get it! Mo betta he neva been born!”

Da Dinna Wit Da Boss

²² Dey eating, an Jesus take one piece bread an tell God he good heart fo give peopo food. He broke da bread, an give um to his guys. He tell um, “Take dis an eat um. Dis hea, my body.”

²³ He take da cup an tell God, “Mahalo plenny,” an give um to his guys, an dey all drink from um. ²⁴ He say, “Dis hea, my blood fo make solid da new deal dat God making. Dey goin kill me, an my blood goin come out from my body jalike wen dey make one sacrifice. Dat goin happen so God can help plenny peopo, an hemo dea shame fo all da bad kine stuff dey do. ²⁵ Dass right! An I telling you guys, afta dis I no goin drink notting from da grape vine again till da time come wen we all stay togedda wea God stay King. Dat time, I goin drink da new kine wine.”

²⁶ Den dey wen sing one song an go ova dea by Olive Ridge.

Peter Goin Say He Donno Jesus

²⁷ Den Jesus tell um, “All you guys goin bum out cuz you no can handle da shame fo wat goin happen to me. Cuz da Bible wen say befo time, ‘I goin kill da sheep farma, an all his sheeps goin run all ova da place.’ ²⁸ But afta I mahke, I goin come back alive, an den, I going Galilee side. Den you guys goin go by me ova dea.”

²⁹ Den Peter say, “Eh, no way, Boss! No matta all da odda guys bum out an like go way from you, eh, no way I eva goin do dat!”

³⁰ Jesus tell him, “You tink so? I tell you dis: Befo da roosta make noise two times early today, three times you goin say dat you donno who me.”

³¹ But Peter tell him, “No way! Not even! No matta I gotta mahke wit you, no way I goin say I donno who you!” An all da odda guys say da same ting.

Jesus Pray Inside Getsemane Place

³² Den Jesus dem go da place dey call Getsemane. He tell da guys, “Sit down ova hea. I going ova dea fo pray.”

³³ He take Peter, James, an John wit him. He wen come real sore inside, an he get plenny trouble inside him. ³⁴ He tell um, “Eh, you know, my heart stay real sad, jalike I goin mahke. No go sleep -- stay ova hea wit me.”

³⁵ He go mo down, an go down on top da groun an tell God, “If can, maybe I no gotta suffa all dat bad kine stuff!” ³⁶ Den he say, “Papa, you my Fadda. You can do everyting. No let me suffa lidis. But wateva you like, dass okay. I like do um da way you like do um.”

³⁷ He go back by his guys, an dey stay sleeping. He tell Peter, “So, wat? Simon, how come you stay sleeping? You guys no can stay up wit me fo ony one hour? ³⁸ Hang in dea an aks God fo help you, so you no go do bad kine stuff wen you get chance. You know, inside, you guys like do da right ting, but you guys no can do um, cuz you guys no stay strong inside.”

³⁹ Den Jesus go talk to God one mo time, an say da same ting jalike befo. ⁴⁰ He come back, an his guys stay sleeping again, cuz dea eyes no can stay open. Dey neva know wat fo tell him.

⁴¹ He come back one mo time, an tell um, “So, wat? You guys still sleeping an resting! Nuff awready. Da time stay now! I da Guy Dass Fo Real, an now dey goin set me up fo da bad guys. ⁴² Get up! We go by dem now. Da guy who wen set me up stay hea now awready.”

Dey Bus Jesus

⁴³ Wen Jesus still talking, Judas, one a his twelve guys, wen come. Had choke peopo wit him. Dey carry swords an clubs. Da main priest guys, da teachas who teach Godʼs Rules, an da older leadas, dey da guys who wen send um. ⁴⁴ Now Judas, da guy dat wen set him up, wen tell um befo time, “Da guy I goin kiss, az da guy. Grab him an tell da police guys fo take um!”

⁴⁵ Right away, Judas go by Jesus an say, “Aloha, Teacha!” an wen kiss him. ⁴⁶ Den da odda guys come an grab Jesus an take him. ⁴⁷ One a Jesus guys standing dea wen grab his sword an hit one guy dat work fo da Head Priest, an cut off one a his ears. ⁴⁸ Jesus say, “You guys tink I one crook, o wat? You guys tink you gotta come afta me wit swords an clubs fo bus me? ⁴⁹ Eh, I was wit you guys teaching inside da temple yard every day, an you guys neva bus me dat time. But all dis gotta happen, jalike da Bible say from befo time.”

⁵⁰ Den all his guys wen bag, an he stay dea all by himself.

⁵¹ Had one young guy wit one lavalava on, an he go wit Jesus. ⁵² Dey wen grab him, an he drop da lavalava an run away naked.

Jesus Stand In Front Da Main Leada Guys

⁵³ Den dey bring Jesus in front da Head Priest guy. Ova dea all da main priest guys, da older leadas fo da peopo, an da teacha guys who teach Godʼs Rules, dey all wen come togedda. ⁵⁴ Peter wen go wit Jesus, but he wen stay far. He go inside da yard an sit down ova dea wit da police guys fo get warm by da fire. ⁵⁵ Da main priest guys an all da main leadas wen try find proof agains Jesus so dey can kill him, but dey neva find notting. ⁵⁶ Plenny peopo come an try bulai bout him, but dey say diffren stuff dat no check out.

⁵⁷ Den some guys stand up an bulai agains him. Dey say, ⁵⁸ “Us guys wen hear dis bugga say, ‘I goin broke down Godʼs temple dat peopo wen build, an den, three days afta, I goin build up one nodda temple, dat peopo neva make.’ ” ⁵⁹ Still yet, wat one guy say no check out wit da odda guy.

⁶⁰ Den da Head Priest guy wen stand up in front dem, an aks Jesus, “Eh, you no hear wat dese guys saying bout you? You no goin say notting, o wat?”

⁶¹ But Jesus no talk. One mo time da Head Priest guy tell him, “Eh you! Tell us if you da Christ guy dat God suppose to send. Da One Up Dea Dat We Tell Good Stuff Bout, you his Boy, o wat?”

⁶² Jesus say, “Dass me. Bumbye you guys goin see me, da Guy Dass Fo Real, sitting down on top da importan place by God who get all da power, right dea on his right side. An I goin come back on top da clouds in da sky.”

⁶³ Den da Head Priest guy wen rip his own clotheses, fo show dat he tink Jesus wen talk stink bout God. He say, “Wat you guys tink now? No need mo plenny guys fo tell wat dey wen see an hear bout him, yeah? ⁶⁴ You guys wen hear da bad kine stuff he say bout God! Wat you guys tink?”

Dey all say, “He talk stink bout God! He gotta mahke!”

⁶⁵ Den some guys spit on top him, an dey cover his eyes wit one cloth, an punch him, an say, “Talk some moa!” Da police guys take him an wack him too.

Peter Say He Donno Who Jesus

⁶⁶ All dis time Peter stay downstairs inside da yard. Had one girl dea who work fo da Head Priest guy. ⁶⁷ She spock Peter sitting by da fire. She look him real good, an say, “Eh, you was wit Jesus too, yeah? da bugga from Nazaret.”

⁶⁸ But he say, “No way! I donno wat you talking bout!” Den he go ova by da gate. An da roosta wen make big noise.

⁶⁹ Da worka girl see him out dea, she tell da guys who was standing ova dea, “Hey! Dis bugga, he one a dem, you know!” ⁷⁰ But he say one mo time, “Not!”

Lata on, da guys who was standing near Peter say, “Yeah! You one a dem guys too! You come from Galilee, yeah?”

⁷¹ Den Peter swear real bad, an say, “God punish me if I no tell you guys da trut: I donno who you guys talking bout!”

⁷² Right den an dea da roosta wen make big noise one mo time. Den Peter rememba wat Jesus wen say, “Befo da roosta make noise two times, you goin say you donno who me three times.” An he broke down an bus out crying.

No Judge Yoa Brudda-Sista Guys

14 Wen get one guy dat trus God but he not strong inside yet, dass okay. But no go make argue bout wat he tinking. Jus let um hang out wit you guys. ² Get some peopo, dey trus God, an dey shua dat dey can eat any kine, meat o watevas. Get odda peopo dat no stay strong fo trus God, an dey no eat meat, ony vegable kine stuff. ³ Eh! da guy dat eat any kine stuffs jalike meat an watevas, he betta not ack like he mo betta den da guy dat no eat meat. Same ting, dat guy dat no eat meat, he betta not go tell da guy dat eat meat, “Eh, az wrong fo you do dat, you know.” Cuz God wen let um come be his guy awready!

⁴ Eh, wat make you tink you get right fo say dat da odda guy stay wrong? He no work fo you! Somebody else stay da Boss fo him. His Boss da ony One dat can tell um strait wen he stay okay o wen he stay mess up. But you know wat? Dat guy goin be okay, cuz da Boss stay plenny strong fo make dat guy come okay, az why.

⁵ Same ting, get some guys, dey tink dat one day mo spesho den da oddas. Get odda peopo, dey tink every day same ting, no mo diffrence. Everybody gotta figga strait out how he tink. ⁶ Da guy who tink dat get some days dat stay mo spesho den oddas, he make um spesho fo show respeck fo da Boss. Da guy who eat meat an all kine stuffs, he eat um fo show respeck fo da Boss. An you know dat, cuz he da one dat tell God, “Mahalo plenny!” Same ting, da guy dat no eat meat, he do um fo show respeck fo da Boss too, an he tell God, “Mahalo plenny!”

⁷ Eh, you know, wit us guys, wen we stay alive, we no live jus our own self. Wen we mahke, same ting, we no mahke jus our own self too. ⁸ Wen we live, we stay tight wit da Boss. Same ting, wen we mahke, we stay tight wit da Boss too. So no matta we stay alive o mahke, everytime he stay our Boss. ⁹ Dass how come Christ wen go mahke, an den wen come back alive. He wen do dat so he can be da Boss fo da peopo dat mahke awready, an same ting fo da peopo dat stay alive too.

¹⁰ So, how come you try ack jalike one judge an say yoa brudda o sista stay wrong? How come you make um jalike dey stay no good? Eh, bumbye all us guys gotta go in front God da Judge, fo him fo judge us, you know. ¹¹ Da Bible wen say befo time,

¹² So den, all us guys gotta tell God how come we wen do da tings dat we wen do.

No Do Notting Dat Goin Make Yoa Bruddas An Sistas Mess Up

¹³ So pau awready poin finga da odda peopo. Mo betta figga lidis: no good we do tings dat goin make our bruddas an sistas mess up. No good we go try fo trap um so dey do da bad kine stuff.

¹⁴ I know dis fo shua, cuz I stay tight wit da Boss Jesus: No mo notting dat make peopo so dey no can pray. But if one guy tink someting make him so he no can pray, den goin be kapu fo him. ¹⁵ So if you go eat meat, an cuz a dat, you make yoa brudda o sista hurt plenny inside, eh, you no mo love an aloha fo dem, o wat? Eh! No go jam up da odda guy, jus fo eat wat you like. Cuz you know, Christ wen mahke fo dat guy too! ¹⁶ No good if you go do someting dat you figga stay okay, but same time peopo talk stink bout wat you stay doing.

¹⁷ Eh listen! God stay King, but you no stay da Kingʼs guy jus cuz you like eat o drink wateva you like. If you stay da Kingʼs guy, you do da right tings, an yoa heart stay rest inside, an you stay good inside. Cuz dass wat goin happen wen you stay tight wit Godʼs Good an Spesho Spirit. ¹⁸ Anybody dat stay make like how I stay telling you, cuz dey da ones dat get Christ fo dea boss, dey goin make God stay good inside. Odda peopo goin check um out dat dey okay, an get respeck fo dem.

¹⁹ So den, we gotta try hard fo make shua we do da kine stuff dat make everybody stay good wit each odda, an we gotta go help each odda fo come mo strong inside. ²⁰ Eh, no go bus up da kine stuff God stay do fo our bruddas an sistas, jus cuz you like eat any kine food. Fo shua, God say everyting stay okay fo eat, but den, if you go eat da kine stuff dat make hard time fo somebody, az bad, you know, wen you do dat kine.

²¹ Mo betta no eat da kine meat, o no drink da kine wine, o da odda kine stuffs dat goin make big problem fo yoa brudda o yoa sista. ²² Dis wat I mean: wen you an God go make um strait inside yoa mind how you goin trus him, dat dis kine food okay fo you fo eat, den you goin be good inside, cuz same time you no goin tink dat maybe you doing someting wrong. ²³ If you no stay shua bout wat you can go eat, but den still yet you go eat um, God goin say you wen do someting wrong, cuz you neva trus God wen you do um, az why. Wen you go do someting, an you no mo trus fo God, az wrong.