Revised Common Lectionary (Semicontinuous)

Men kijan pou n viv

¹⁷ Se poutèt sa, nan non Senyè a, men sa m ap di nou: Fè atansyon pou nou pa kontinye viv menm jan ak moun ki pa kwè yo. Moun sa yo, panse ki nan tèt yo p ap mennen yo okenn kote. ¹⁸ Lespri yo bouche, yo pa gen lavi Bondye bay la nan yo, paske yo inyoran epi kè yo di. ¹⁹ Yo vin pèdi tout wont nan lespri yo, wont pou ta fè yo pa ta lage kò yo nan tout kalite vis. Okontrè, se tout kalite bagay sal yo vle fè pi plis. ²⁰ Men nou menm, se pa mòd lavi sa a nou te aprann, lè nou te vin jwenn Kris. ²¹ Poutèt nou te tande pale de Jezi, epi yo te anseye nou verite a ki nan Kris la. ²² Nou te aprann pou n abandone jan nou te konn viv lontan an, pou n debarase tèt nou anba ansyen lavi a ak vye dezi l yo k ap twonpe nou. ²³ Nou dwe pou n vin moun nouvo, ni nan kè nou ni nan panse nou. ²⁴ Kounye a, se pou nou viv tankou yon moun nouvo ki fenk kreye pou l tankou Bondye, jis epi sen toutbon vre.