Revised Common Lectionary (Semicontinuous)

² નવજાતો અને બાળકોના મુખમાંથી તમારી સ્તુતિની ગાથાઓ પ્રગટી છે.
    તમારા શત્રુઓને ચૂપ કરી દેવા માટે તમે તેમને આ શકિતશાળી ગીતો આપ્યા છે.
³ હે યહોવા, જ્યારે રાત્રે હું આકાશદર્શન કરું છું.
    અને ચંદ્ર તથા તારાઓથી ભર્યું નભ નિહાળું છું,
    ત્યારે તમારા હાથનાં અદ્ભૂત કૃત્યો વિષે હું વિચારું છું.
⁴ પછી મને આશ્ચર્ય થાય છે,
    કે માનવજાત શું છે,
જેનું તમે સ્મરણ કરો છો?
    માણસો તે કોણ છે કે તેઓની તમે મુલાકાત લો છો?

⁵ કારણ, તમે એને દેવ કરતાં થોડોજ ઊતરતો સૃજ્યો છે,
    અને તેના માથા પર મહિમા ને માનનો મુગટ મૂકયો છે.
⁶ તમે જ તેને, તમે ઉત્પન્ન કરેલી સૃષ્ટિનો અધિકાર આપ્યો છે
    અને તે સઘળી સૃષ્ટિનો તમે તેને કારભારી બનાવ્યો છે.
⁷ એટલે સર્વ ઘેટાં તથા બળદો, અને જંગલી પ્રાણીઓનો પણ.
⁸ વળી આકાશનાં પક્ષીઓ,
    સમુદ્રમાં રહેતા માછલાં તથા જીવોનો પણ.
⁹ હે યહોવા, અમારા પ્રભુ, સમગ્ર વિશ્વમાં તમારું નામ સૌથી મહાન છે.

³¹ “આકાશના તારાઓને શું તું પકડમાં રાખી શકે છે?
    શું તું કૃતિકા અથવા મૃગશીર્ષના બંધ નક્ષત્રોને છોડી શકે છે?
³² શું તું રાશિઓને નક્કી કરેલા સમયો અનુસાર પ્રગટ કરી શકે છે?
    શું તું સપ્તષિર્ને તેના મંડળ સહિત ઘેરી શકે છે?
³³ શું તું આકાશને અંકુશમાં લેવાના સિદ્ધાંતો જાણે છે?
    શું તું તેઓને પૃથ્વી પર શાસન કરાવી શકે છે?

³⁴ “શું તમે તમારો અવાજ વાદળાં સુધી પહોંચાડી શકો છો?
    જેથી તમે પુષ્કળ વરસાદ લાવી શકો?
³⁵ શું તમે વીજળીને આજ્ઞા કરી શકો છો?
    એ તમારી પાસે આવીને કહેશે કે, ‘અમે અહીંયા છીએ, તમને શું જોઇએ છે?’
    તમારે તેને જ્યાંજયાં લઇ જવી હશે શું તે જશે?

³⁶ “અયૂબ, વાદળાંમાં જ્ઞાન કોણે મૂક્યું છે?
    અથવા ધૂમકેતુને કોણે સમજણ આપી છે?
³⁷ બધાં વાદળોની ગણતરી કરી શકે અથવા પાણી ભરેલી
    આકાશની મશકો રેડી શકે એવો પર્યાપ્ત વિદ્વાન કોઇ છે?
³⁸ જેથી ધરતી પર સર્વત્ર ધૂળ
    અને ઢેફાં પાણીથી પલળીને એકબીજા સાથે ચોંટી જાય છે.