Old/New Testament

²⁴ Donn roopte see tom tweede mol daem Maun dee Blint wea jewast, en saede to am: "Jeff Gott de Ea! Wie weete daut dis Maun en Sinda es."

²⁵ Donn auntwuad hee: Auf hee en Sinda es oda nich, weet ekj nich: oba eent weet ekj; ekj wea Blint, nu kaun ekj seene."

²⁶ Donn saede see wada to am: "Waut deed hee to die? Woo muak hee diene Uage op?

²⁷ Hee auntwuad an: "Ekj ha ju daut aul jesajcht, en jie horchte nich! Wuaromm wel jie daut wada heare? Wel jie uk siene Jinja woare?"

²⁸ Donn schempte see am ut en saede: "Du best daem Maun sien Jinja; wie sent Mooses siene Jinja!

²⁹ Wie weete daut Gott to Mooses jeraet haft; oba disa - wie weeta nich wua hee haea kjemt."

³⁰ Dee Maun auntwuad en saed to an: "Na, hia es en besondret Dinkj, daut jie nich weete wua hee haea kjemt!

³¹ Wie weete daut Gott nich no Sinda horcht. Hee horcht no soone dee gottesferchtich sent en sien Wele doone.

³² Seit de Welt aunfung haft noch niemols eena jeheat daut en Blintjebuarne de Uage sent opjemoakt worde.

³³ Wan dis Maun nich fonn Gott wea, kunn hee nuscht doone."

³⁴ See auntwuade en saede to am: "Du best gauns enn Sinde jebuare, en west onns unjarechte?" En see schmeete am erut.

³⁵ Jesus head daut see am erut jeschmaete haude, en funk am en saed: "Jleewst du aun daen Gottes Saen?"

³⁶ Dee auntwuad en saed: "Herr, en waea es hee, daut ekj aun am jleewe kaun?"

³⁷ Jesus saed to am: "Du hast am jeseene, en daut es dee waut nu met die raet."

³⁸ Hee saed: "Ekj jleew, Herr;" en baed am aun.

³⁹ En Jesus saed: "Tom rechte sie ekj en dise Welt jekome, daut dee Blinje seene muchte, en dee waut seene, muchte Blint woare."

⁴⁰ Eenje fonn dee Farisaea dee bie am weare heade dee Wead, en saede to am: "Se wie uk Blint?"

⁴¹ Jesus saed to an: "Wan jie blint weare, wudd jie nich Sind habe, oba nu saj jie, "Wie seene," doaromm blift june Sind.