Old/New Testament

9 Aus hee delengd jinkj sach hee en Maun dee blint jebuare wea.

² Siene Jinja fruage am: Meista, waea haft jesindicht, dis Maun oda siene Elre daut hee blint jebuare es?

³ Jesus auntwuad: "Dis Maun is nich blint doawaegen daut hee oda siene Elre jesindicht habe, oba daut Gott siene Woakje enn am muchte ferndach kome.

⁴ Wie motte daem siene Woakje ferechte dee mie jeschekjt haft wielet noch Dach es; Nacht kjemt wan kjeena oabeide kaun.

⁵ Soo lang aus ekj en dise Welt sie, sie ekj daut Licht fa dise Welt."

⁶ Aus hee dit jesajcht haud, speach hee oppe Ead en muak en Schmaeasel doarut, en laed daut opp daem Maun siene Uage,

⁷ en saed to am: "Go wausch die em Puddel waut Sielooha heet:" [fedolmatscht meent daut jeschekjt]. En hee jinkj en wossch, en kaum seenent trig.

⁸ Donn saede siene Nobasch en dee, dee am ferhaea haude seene prachre: "Es dit nich dee, dee hia saut en prachad?"

⁹ Walkje saede: "Dit es hee!" Aundre saede: "Nae, daem sitet blos soo." Hee saed: "Ekj sie dee."

¹⁰ Donn saede see to am: "Woo sent diene Uage opjegone?"

¹¹ Hee auntwuad: "Dee Maun waut Jesus heet muak en Schmaeasel en laed daut opp miene Uage en saed to mie: Go no Sielooha en wausch. Ekj jinkj en wossch en kaun seene."

¹² See saede to am: "Wua es hee?" He saed: "Ekj weet nich."

¹³ Donn brochte see daem, dee eascht blint wea no de Farisaea.

¹⁴ Nu wea daut aum Saubat daut Jesus daut Schmaeasel muak en daem Blinge de Uage op muak.

¹⁵ Donn fruage de Farisaea am wada woo daut kjeem doat hee seene kunn. Hee saed to an: "Hee laed mie Leem oppe Uuge, ekj wossch mie, en ekj kaun seene."

¹⁶ Eenje fonn dee Farisaea saede donn: "Dis Maun es nich fonn Gott wiel hee daen Saubat nich helt." Oba aundre saede: "Woo kaun en sindje Maun soone Wunndateakjen doone?" En doaderch wea ne Spoolinj unja an.

¹⁷ Donn saede see noch emol to daen blinge Maun: "Waut sajchst du fonn am, wiel hee diene Uage op jemoakt haft?" Hee saed: "Daut es en Profeet."

¹⁸ Oba dee Jude jleewde daut noch nich daut dit dee wea waut doa wea Blint jewast bott see siene Elre roopte,

¹⁹ en fruage an: "Es dit jun Saen fonn daem jie saje daut hee blint jebuare wea? En woo kjemt daut daut hee nu seene kaun?"

²⁰ Dee Elre auntwuade an en saede: "Wie weete daut dit onns Saen es en daut hee blint jebuare wea;

²¹ Oba woo daut kjemt daut hee nu seene kaun weet wie nich, oda waea am de Uage haft opjemoakt, weet wie nich; hee es oolt jenuach, froagt am, hee woat fe sikj selfst raede."

²² Dit saede siene Elre wiel see sikj engste deede fa de Jude; wiel dee Jude weare sikj aul eenich jeworde daut wan irjendwaea bekjanne wudd daut Jesus dee Christus wea, dee wudd ute Sienagoog rut jestopt woare.

²³ Doaweajen saede siene Elre: "Hee is oolt jenuach, froacht am."