Old/New Testament

7 Nohaea jinkj Jesus enn Galilaea eromm; wiel hee wul nich lenga enn Judaea eromm gone wiel de Jude sochte am ommtobringe.

² Nu wea de Jude aea Loofboodefast dicht bie.

³ Siene Breedea saede donn to am: "Go no Judaea daut diene Jinja uk diene Woakje seene dee du deist. Dan kjeena deit waut emm Jeheema en wel oba doch em opne senne. Wan du soowaut deist, dan lot de Welt die seene."

⁵ Oba siene Breeda jleewde uk nich aum am.

⁶ Donn saed Jesus to an: "Miene Tiet es noch nich jekome, oba june Tiet es emma reed.

⁷ De Welt kaun junt nich hausse, oba mie hausst de Welt wiel ekj fonn de Welt zeije doo daut aeare Woakje bees sent.

⁸ Got jie nom Fast! Ekj wel noch nich nom Fast gone, dan miene Tiet es noch nich gauns erfelt."

⁹ Aus hee an dit jesajt haud, bleef hee en Galilaea.

¹⁰ Oba es siene Breeda jegone weare, jinkj hee uk nom Fast, nich em opne, oba heemlich.

¹¹ Donn sochte de Jude am oppem Fast, en saede: "Wua es dee Maun?"

¹² Doa wea fael murre unja daut Folkj weajen am. Eensje saede: "Hee es en gooda Maun," aundre saede: "Nae, hee schmaeat de Mensche aun!"

¹³ Oba kjeena raed frie fonn am, ut Angst fa de Jude.

¹⁴ Nu medel em Fast jinkj Jesus emm Tempel en deed unjarechte.

¹⁵ En de Jude fawunndade sikj en saede: "Woo weet disa Latre wan hee nich jeleat haft?"

¹⁶ Jesus auntwuad an: "Dise Lea es nich miene, oba daem siene dee mie jeschekjt haft.

¹⁷ En waea sien Wele doone wel, woat weete auf dise Lea fonn Gott es oda auf ekj ut mie selfst raed.

¹⁸ Waea ut sikj selfst raet, seakjt siene eajne Ea; waea oba daem siene Ea seakjt dee am jeschekjt haft, dee es woarhauftich, en es kjeene Onnjerajchtichkjeit en am.

¹⁹ Haft Mooses ju nich daut Jesats jejaeft? Doch kjeene fonn ju helt daut Jesats. Wuaromm feseakj jie mie doot to moake?"

²⁰ Daut Follkj auntwuad en saed: "Du hast en beesa Jeist; waea feseakjt die doot to moake?"

²¹ Jesus auntwuad en saed to an: "Ekj ha een Woakj jedone, en jie wuundre ju aule.

²² Mooses jef ju de Beschiedunk, [nich dautet fonn Mooses wea, oba fonn de Fodasch] en jie beschniede en Mensch aum Saubat.

²³ Wann en Maun aum Saubat de Beschiedunk kjrijcht daut daut Jesats nich sull jebroake woare; sent jie doll met mie daut ekj en Mensch ha gauns jesunt jemoakt aum Saubat?

²⁴ Recht nich no Uagescheen, oba lot jun Uadeel en Jerajchtet senne."

²⁵ Donn saede eenje fonn dee fonn Jerusalem: "Es dit nich dee waem see feaseakje doot to moake?

²⁶ en kjikjt! hee raet gauns frie en kjeene sajcht waut to am. Weete dee Aewaschte feleicht werklich daut dit de Chrisus es?

²⁷ Oba wie weete wua disa haea es; oba wan dee Christus koma woat, woat kjeena weete fonn wua hee kjemt."