M’Cheyne Bible Reading Plan

Dee 92 Psalm

En Psalm En Leet fa dän Saubat Dach.

¹ Daut es goot däm Herr Gott Dank to jäwe, un Preis sinje to die Nome, O du Aulahechsta;

² dien Erboarmunk bekaunt to moake, en diene Opprechtichkjeit jieda Nacht;

³ opp dee tian Seide, un opp dee Hoap – opp dee Jittoa met Musikj Jelud.

⁴ Dan du hast mie froo jemoakt met dien Woakj, O Herr Gott; ekj woa juble enn daut Woakj fonn diene Henj.

⁵ O Herr Gott, diene Zwakje sent seeha deep, woo groot sent diene Woakje.

⁶ En Hunjscha Maun weet nich, en Noa deit dit nich festone.

⁷ Wan dee Gottloose daut jelinje deit soo aus Graus waust, un aul dee Gottloose belaje, dan es daut fa dän äa fenichte opp emma.

⁸ Oba Du, O Herr Gott, best opp emma feharlicht.

⁹ Dan see, dee Fiend selle omkome; un aul dee Gottloose selle festreit woare.

¹⁰ Oba Du woascht mien Huarn opphäwe soo aus dee Willa Oss, un ekj woa enjesaulft woare met fresche Eelj.

¹¹ En miene Uage selle opp miene Fiend kjikje; miene Uare woare dee Gottloose hiare dee jäajen mie oppstone.

¹² Dee Jerajchte selle jelinje soo aus en Palm Boom; dee woat soo wausse aus dee Zeeda enn Lebanon.

¹³ Dee enn däm Herr Gott sien Hus jeplaunt sent, enn onns Gott siene Fäaleew, selle jelinje.

¹⁴ Dee woare emm huaget Ella noch Fruchtboa senne; dee selle Fat un Fresch senne;

¹⁵ bekaunt to moaken daut dee Herr Gott Opprajcht es, mien groota Steen! Un enn Am es kjeene Onjerajchtichkjeit.

Dee 93 Psalm

¹ Dee Herr Gott rejiat; Hee haft sikj selfst met Madastichkjeit jekjleet; dee Herr Gott es jekjleet met Macht; Hee haft sien Gort omm sikj; Hee haft dee Welt jejrint; daut woat nich jescheddat woare.

² Dien Troon es doa bestädicht fonn donn aun; Du best fonn Eewichkjeit häa.

³ Dee Äwaschwamunk kjeem hejcha, O Herr Gott; dee Wotastreem ha äare Stem oppjehäft; dee Wotastreem ha äare lude Wale oppjehäft.

⁴ Dee Herr Gott es majchtja aus daut Jelud fonn fäl Wotasch, aus dee majchtje Wale emm See.

⁵ Diene Zeichnise sent seeha sejcha; Heilichkjeit es enn dien Hus fa emma, O Herr Gott.

7 No dit sach ekj feeha Enjel opp dee feeha Akje fonne Ead stone, dee de feeha Winde oppe Ead trig hilde, daut kjeen Wint blose sull oppe Ead, en daut Maea, en opp irjent en Boom.

² En ekj sach noch een Enjel dee fonn Sonnopgank kjeem, dee daem laewendje Gott sien Saeajel haud; en hee schreach met ne lude Stem to dee feeha Enjel daen de Macht jejaeft wea, de Ead en daut Maea Schode to doone, en saed:

³ "Doot de Ead en daut Maea en dee Beem kjeen Schode bott wie onns Gott siene Sklowe aum Stearn jeteakjent ha".

⁴ En ekj head dee Zol fonn daen dee jeteakjent worde, hundat fearafeatich dusant, dee fonn jieda eent fonn dee Staume Iesrael jeteakjent weare:

⁵ ut Juda sien Staum, twalf duesent, ut Ruben sien Staum, twalf duesent, ut Gad sien Staum, twalf duesent,

⁶ ut Aser sien Staum, twalf duesent, ut Naftalie sien Staum, twalf duesent, ut Manassa sien Staum, twalf duesent,

⁷ ut Siemoon sien Staum, twalf duesent, ut Leefie sien Staum, twalf duesent, ut Iesachar sien Staum, twalf duesent,

⁸ ut Seebuloon sien Staum, twalf duesent, ut Joosef sien Staum, twalf duesent, ut Benjamien sien Staum, twalf duesent dee feseaejelt weare.

⁹ No dit sach ekj, en kjikj! ne groote Schoa dee nich to talle jinkj ut aule Natsjoone, en Jeschlajchte, en Mensche, en Schproake, dee fer daen Troon en fer daut Laum stunnde, aunjekjleet met wite Rakj, en Palmasta enn aeare Henj;

¹⁰ dee schreaje met ne lude Stem, "Daut Heil fonn onns Gott dee oppem Troon set, en fonn daut Laum".

¹¹ En aule Enjel stunnde runt omm daut Troon en dee Eltesta en dee feeha laewendje Teare, en folle opp aeare Jesechte fer daen Troon en baede Gott aun,

¹² en saede: "Amen! Saeajen en Harlichkjeit en Macht en Krauft jeheat onns Gott enn aule Eewichkjeit! Amen."

¹³ Eena fonn dee Elteste auntwuad mie en saed: "Dise dee met wite Kjleeda aunjetroke sent, waea sent dee, en fonn wua kome dee?"

¹⁴ En ekj saed to am: "Mien Herr, du weetst". En hee saed to mie: "Dit sent dee, dee ut groote Triebsaul jekome sent, en ha aeare Kjleeda wit jewosche enn daut Laum sien Bloot.

¹⁵ Doaromm sent see fer Got sien Troon, en woare am Dach en Nacht enn sien Tempel deene, en dee, dee oppem Troon set woat sien Tselt aewa an utspreede.

¹⁶ An woat niemols meeha hungre oda darschte, en de Sonn woat nich opp an faule, oda irjent en aundra Het,

¹⁷ dan daut Laum medd em Troon woat an weide, en woat an no laewendje Wotakjwalle leide, en Gott woat an aule Trone fonne Uage wesche.