M’Cheyne Bible Reading Plan

Dee 79 Psalm

En Psalm von Asaf

¹ O Gott, dee Natsjoone sent enn dien Oawgoot enenn jekome; dee ha dien heilja Tempel feonnreinijcht; dee ha Klommpes jemoakt fonn Jerusalem.

² Dee ha diene Deena äare Kjarpa aus Äte jejaeft fa dee Fäajel enne Lofft, daut Fleesch fonn diene Heilje to dee Beeste oppe Ead.

³ Dee ha äa Bloot fegote soo aus Wota runnt omm Jerusalem; un doa es kjeena dee begrowe deit.

⁴ Wie sent ne Schaund jeworde to onnse Nobasch, en fe-achte, un en Jespatte to dän dee romm onns sent.

⁵ Woo lang, O Herr Gott. Woascht du opp emma oajalijch senne met onns? Saul dien Aufgonnst soo brenne aus siene Heilje äa Doot?

⁶ Jeet dien Oaja ut opp dee Natsjoone dee die nijch jekjant ha, un opp dee Kjeenijchrikje dee nijch dien Nome aunjeroopt ha.

⁷ Dan dee ha Joakopp oppjeäte un ha siene Wonstäd soo aus ne Wiltnis jemoakt.

⁸ O doo nijch onnse Fodasch äare fäaje Sind behoole; lot dien Erboarme haustijch kome onns to trafe, dan du hast onns seeha läajch jebrocht.

⁹ Halp, O onnse Radunks Gott, fa dee Harlijchkjeit fonn dien Nome; un rad onns un doo fa onnse Sind betole omm dien Nome haulwe.

¹⁰ Wuaromm sulle dee Natsjoone saje: "Wua es äa Gott?" Lot dien Rach eewe bekaunt woare mank dee Natsjoone fa daut Bloot fonn diene Deena daut es utjegote worde.

¹¹ Lot däm Jefangna sien Stäne fer die kome, doo dän oppbewoare dee to dän Doot äwajäft sent.

¹² Un doo onnse Nobasch säwenmol beloone, äa Fluche enn äa eajna Bossem met daut met waut see die jeflucht ha, O Herr.

¹³ Dan woa wie, dien Folkj un dee Schop fonn diene Häad die Dank jaewe fa emma; wie woare dien Preis fetale to aule Jeschlajchte.

5 Jieda eena dee jleeft daut Jesus dee Christus es, en fonn Gott jebuere es, es fonn Gott; en jieda eena dee daem Foda leef haft, haft daem uk leef dee fonn Gott jebuere es.

² Aun dit kje wie weete daut wie Gott siene Kjina leef habe wan wie Gott leef ha en siene Jeboote hoole.

³ Dit es de Gottes Leew, daut wie siene Jeboote hoole; en siene Jeboote sent nich ne Laust;

⁴ Dan wautemma fonn Gott jebuare es haft jewonne aewa de Welt; en dit es de Siech dee aewa de Welt jewonne haft - onns Gloowe!

⁵ Waea es dee, dee aewa de Welt jewonne haft buta dee, dee doa jleeft daut Jesus Gott sien Saen es?

⁶ Dit es dee, dee derch Wota en Bloot kjeem, Jesus Christus; nich bloos derch Wota, oba derch Wota en Bloot.

⁷ En daut es de Jeist dee Zeichness jeft, wiel dee Jeist es de Woarheit.

⁸ Dan doa sent dree dee Zeichness jaewe: de Jeist en daut Wota en daut Bloot: en dise dree stemme toop.

⁹ Wan wie Mensche aea Zeichness naeme, Gott sien Zeichness es jrata; wiel dit es daut Zeichness daut Gott fonn sien Saen jezeicht haft.

¹⁰ Waea aun daen Gottes Saen jleeft haft daut Zeichness en sikj selfst. Waea nich Gott jleeft haft am tom Laeajna jemoakt wiel hee daut Zeichness nich jejleeft haft daut Gott fonn sien Saen jejaeft haft.

¹¹ Dit es dan daut Zeichness, daut Gott onns daut eewje Laewe jejaeft haft, en dit Laewe es enn sien Saen.

¹² Waea daen Saen haft, haft daut Laewe; waea daen Saen nich haft, haft nich daut laewe.

¹³ Dit ha ekj ju jeschraewe, dee jie aun daen Gottes Saen sien Nome jleewe, daut jie weete kjenne daut jie daut eewje Laewe habe.

¹⁴ En dit es onns Toofetrue daut wie en am ha, daut, wan wie am omm irjend waut baede no sien wele, heat hee onns.

¹⁵ En wan wie weete daut hee onns heat, eendoont waut wie froage, dan weet wie daut wie daut ha fa waut wie jebaet ha.

¹⁶ Wan waea sien Brooda sit ne Sind aungone waut nich tom Doot feat, saul hee Gott doaromm baede, en Gott woat am Laewe jaewe fa daem dee nich sindje deit tom Doot. Doa es Sind waut tom Doot feat - ekj saj nich daut hee doaromm baede sull.

¹⁷ Aule Onnjerchtichkjeit es Sind; en doa es ne Sind dee nich tom Doot feat.

¹⁸ Wie weete daut waea fonn Gott jebuare es laeft nich en Sind; oba waea fonn Gott jebuare es bewoat am en dee Beesa kaun am nich aunsteete.

¹⁹ Wie weete daut wie fonn Gott sent, and daut de gaunse Welt en daem Beesa bejraepe es.

²⁰ Wie weete uk daut dee Gottes Saen jekome es en haft onns festaunt jejaeft daem to kjane dee Woarhauftich es; en wie sent enn daem dee Woarhauftich es, en sien Saen Jesus Christus. Dit es dee woara Gott, en daut eewje Laewe.

²¹ Kjleene Kjinja, bewoat ju fa dee Jeta.