M’Cheyne Bible Reading Plan

Dee 66 Psalm

To dän Haupt Musikaunt, En Leet fonn Doft.

¹ Moakt en froohet Jelud to Gott, aul jie oppe Ead!

² Sinjt to dee Ea fonn sien Nome; jäft Harlijchkjeit to sien Preis.

³ Sajcht to Gott:"Woo wunndafoll sent diene Woakje. Derjch daut Grootet fonn diene Macht doone diene Fiend fäajäwe daut see jehuarsaum sent to die. Dee gaunse Ead saul dien aunbäde; dee preise dien Nome. Selah.

⁵ Komt en seet Gott siene Woakje, dee fetraflijch es enn sien Doone to dee Menschesäns.

⁶ Hee muak dreajet Launt wua doa See wea; dee gone tofoot derjch däm Riefa; doa woa wie onns met am freihe.

⁷ Hee rejeat derjch siene Macht fa emma; siene Uage seakje dee Natsjoone ut; lot dän dee jäajenaun sent sikj nijch puche. Selah.

⁸ O jie Felkja, doot onns Gott säajne, un lot dee Stem fonn sien Preis to heare senne;

⁹ Dee onnse Seel mank dee Läwendje helt, un erlaubt nijch daut onnse Feet jleppe sulle.

¹⁰ Dan du, O Gott hast onns jeprooft; du hast onns ajcht jemoakt soo aus Selwa ajcht jemoakt woat.

¹¹ Du hast onns enn daut Nat jebrocht; du deetst Älend opp onnse Lende laje.

¹² Du hast erlaubt daut Mane äwa onns Kopp riede deede; wie sent derjch Fia un derjch Wota jekome, oba du brochst onns no Follet.

¹³ Ekj woa enn dien Hüs enenn gone met Braunt Opfa; ekj woa mien Fespräakje betole,

¹⁴ daut miene Leppe jerät ha, en daut ekj enn mien Trubbel fespruak.

¹⁵ Ekj woa die Braunt Opfa opfre fonn fattet Fee, met dän seeta Ruak fonn Kosebakj; ekj woa Bolles opfre met Kose. Selah.

¹⁶ Komm, hea, un lot mie fetale, aul jie dee Gott ferjchte, waut Hee fa mie jedone haft to miene Seel.

¹⁷ Ekj schreajch to am met mien Mul, un met Preis unja miene Tunj.

¹⁸ Wan ekj Gottlooset aunjeseene ha enn mien Hoat, wudd dee Herr Gott nijch no dee Stem fonn miene Jebäd jeheat ha.

¹⁹ Sejchalijch haft Gott jeheat; Hee haft Oobacht jejäft opp dee Stem fonn mien Jebäd.

²⁰ Jesäajent es Gott, dee sikj nijch wajch jedreit haft fonn mien Jebäd, oda sien Erboarme trigj jehoole haft.

Dee 67 Psalm

To dän Haupt Musikaunt, fe en Späldinkj met Seide. En Psalm, en Leet.

¹ Mucht dee Herr erboarment senne to onns, un onns säajne, un mucht sien Jesejcht opp onns schiene. Selah.

² Daut dien Wajch mucht oppe Ead bekaunt senne, diene Radunk mank aule Natsjoone.

³ Lot dee Felkja dien danke, O Gott, lot aul dee Felkja die danke.

⁴ O lot dee Felkja froo senne, un fa Freid sinje; dan du woascht dee Felkja enn Jerajchtijchkjeit rejchte, un äwa dee Felkja oppe Ead rejeare.

⁵ Lot dee Felkja die Dank jäwe, O Gott; lot aul dee Felkja die Dank jäwe.

⁶ Dee Ead haft äa Toonämet jejaeft; Gott, onns eajna Gott, woat onns säajne.

⁷ Gott woat onns säajne, un aul dee Winkjels enne Ead woare am ferjchte.

2 Aulso lajcht daun auntsied aul daut Grolle, siet nich aufjenstich, doot nich Heichle, en lajcht daut Pluedre auntsied.

² So aus niejebuerne Kjinja, felangt daut achte Malkj fom Wuat so daut jie doaderch wausse kjenne enn june Seelichkjeit,

³ wan jie jeschmakjt habe woo goot de Herr es.

⁴ Komt dan no am, daen laewendje Steen, dee fonn Mensche feschmaete wort, oba dee fonn Gott erwaelt wort en seeha fael weat es.

⁵ Jie uk, so aus laewendje Steena, woare upjebuet to en jeistlichet Huus en en heiljet Preistatum, daut jie jeistlije Opfa brinje dee Gott aunjenaem sent derch Jesus Christus.

⁶ Dan daut steit jeschraewe: "Kjikjt emol, ekj laj enn Zion en uterwaelda, weatfolla Akjsteen, en waea aun daen jleeft woat nich to shaunde woare".

⁷ Fa ju, dee jie jleewe es daut ne Ea, oba fa dee, dee nich jleewe es daut en Steen daen dee Buelied auntsied schmeete, es nu oba dee werklije Akjsteen jeworde;

⁸ en Steen aewa daen Mensche stolpre, eenem aewa daen see Aunstoos naeme, daut heet dee, dee aewa daut Wuat stolpre enn Unjehuarsaum, wuato see uk bestemt sent.

⁹ Oba jie sent en ueterwaeldet Jeschlacht, en kjeenichlichet Priestatum, ne heilje Natsjoon, Gott sien ueterwaeldet Follkj; daut jie sele daem siene Ea bekaunt moake dee junt haft fonn dee Diestanes jerat en haft ju enn daut wuundascheenet Licht enenn jebrocht.

¹⁰ To eene Tiet wea jie nich mol en Follkj, oba nu sent jie Gott sien Follkj. Jie haude kjeene Jnod, nu oba ha jie Jnod jekjraeje.

¹¹ Leefste Frind, ekj femon ju aus soone dee hea Pilja en Framda sent, hoolt junt frie fonn dee fleeshliche Losste de jaejen june Seel kjrieje.

¹² Seet doano daut jie junt soo upfeare mank de Mensche, daut wan see uk jaejen junt raede en bees fonn junt nofetalle, see derch june goode Woakje daem Herr feharliche woare aun daen Dach wan hee kome woat.

¹³ Siet dee Rejierunk aere Jesatse unjadon waejen daem Herr, eendoont aufet de Kjeenich es dee aewa aulem es,

¹⁴ oda siene Deena dee fonn am jeschekjt sent tom dee strofe dee beeset done, oba daen lowe dee Racht doone;

¹⁵ wiels dit es Gott sien Wele, daut derch Goodet doone jie kjenne daen aea Mul tostoppe dee nich baete weete.

¹⁶ Laeft so es dee, dee frie sent, oba doot june Freihet nich brucke aus en Mauntel fa beeset; oba leewa aus Gott siene Schklowe.

¹⁷ Jaeft aule Maun Ea; hat dee Broodaschauft Leew; fercht Gott, en eat daem Kjeenich.

¹⁸ Kjnachts, siet june Meistasch unjadon en Forcht, nich bloos aun dee, dee Goot en leeftolich sent, oba uk aun dee, dee fedreit sent.

¹⁹ Dan dit es woare Jnod wan jie waejen daut Jewesse Gott jaejen aewa liede doone wan junt onnrajcht behaundelt woat.

²⁰ Waut fonne Ea es et wan jie uthoole wan jie unracht jedoone habe, en daut enn jedult naeme? Oba, wan jie daut goodet doone, en dan junt schlacht behaundelt woat, en jie doarunja jeduldij sent, dit es bie Gott ne Jnod.

²¹ Dan dit es wuato Gott junt beroope haft, sentamol daut Christus uk fa onns jelaede haft, en haft onns en Faeabilt jelote daut wie siene Footspoare nogone sulle;

²² dee kjeene Sind jedone haud, wea uk kjeene Lest en siene Raed;

²³ wan am utjeshempt wort, shempt hee nich trig; wan hee liede deed, deed hee nich dreiwe, oba aewajeef sikj daem dee rajcht rechta woat.

²⁴ Hee neem onnse Sind opp sikj selfst enn sien eajna Lief en druach dee oppem Kjriets, so daut wie de Sind Stoawe en enn dee Jerachtichkjet laewa kunne: derch siene Wunnde sent wie jeheelt worde.

²⁵ Wie weare je soo aus febiestede Shop; oba sent nu trig jekome no daem Hoad en Eltesta fe onnse Seel.