M’Cheyne Bible Reading Plan

Dee 64 Psalm

To dän Haupt Musikaunt. En Psalm fonn Doft.

¹ O Gott, hea miene Stem enn mien Kloage; bewoa miene Leppe fonn däm Fient sien Schrakj.

² Doo mie festäakje fonn dee jeheeme Plone fonn soone dee mie plindre wele, fonn daut Opprua fonn dee Gottloose,

³ Dee äare Tunje schoap moake soo aus en Schweat, dee Tsiele äare Fiele, en bettret Wuat,

⁴ Soo daut dee no dee Onnschuldje scheete kjenne fonn en schüloarije Staed; haustijch scheete see no am, un engste sikj nijch.

⁵ Dee moake sikj selfst stoakj enn en beesa Plon; dee räde fonn jeheemlijch Schlenj laje; see saje:, "Wäa woat dän seene?"

⁶ See plone beeset, un saje: "Wie ha en follkomna Plon befoadijcht." Beides daut bennaschtet Poat un daut Hoat fonn en Mensch sent deep.

⁷ Oba Gott woat ne Fiel no an scheete; äare Wunnde woare haustijch fäa kome,

⁸ Soo sele dee festimmelt woare; äare Tunj felt opp an selfst; jieda eena dee an sit woat wajch rane.

⁹ en aula Maun woare ferjchte un woare Gott sien Woakj erkjläare; dan dee sele sien Woakj un Weisheit bedenkje.

¹⁰ Dee Jerajchhte sele sikj enn däm Herr Gott freihe, un enn am fetrühe; un aul dee, dee Opprajcht sent enn Hoat sele feharlijche.

Dee 65 Psalm

To dän Haupt Musikaunt. En Psalm en Leet fonn Doft.

¹ To die es Stellet Preis enn Zion, O Gott, un to die es en Fespräakje betolt.

² Aulet Fleesch kjemt no die dee Jebäd heat.

³ Beese Dinje sent majchtja aus ekj sie; du deist fa onnse Äweträdunje betole.

⁴ Jesäajent es dee däm du wäle deist dijcht no die to kome, dee saul enn dien Fäahoff wone; wie woare tofräd senne met daut Goodet fonn dien Hus, dien heilja Tempel.

⁵ Du woascht onns enn Jerajchtijchkjeit auntwuate met jewaultje Dinje, O Gott onnse Radunk; daut Toofetrühe enn die fonn aule bott daut Enj fonne Ead un dän See, en dee wiet auf.

⁶ Derjch diene Macht sent dee Boaj faust jestalt, toop jebunje met Krauft.

⁷ Du deist daut Roare fonn dän See stelle, daut Roare fonn dee Walle, un daut Jestimmel fonn dee Felkje.

⁸ En dee Ennwone enn daut wietstet Poat engste sikj fa diene Teakjens, du moakst daut Rutgone fonn dän Morje un Owent sikj freihe.

⁹ Du deist dee Ead beseakje un deist dee wotre; du moakst daut emm grootet Rikj; Gott sien Riefa es foll Wota – du deist äa Jeträajd fesorje, dan du hast daut enn dis Wajch reed jemoakt.

¹⁰ Du felst dee Rigjes met Wota, du deist dee Foare deepe moake, du moakst daut weakj met Räajen, du deist daut Oppgone säajne.

¹¹ Du deist daut Joa met dien Goodet kroone, en diene Staupe dreppe met Fruchtboaret.

¹² Dee faule opp dee Weid enne Wiltnes, un dee kjleene Boaj doone sikj aun aule Siede freihe.

¹³ Dee Weid es bedakjt met Häad, dee Tole sent met Jeträajd bedakjt, dee juble fa Freid en sinje.

1 Peetrus, Jesus Christus sien Apostel, aun dee ueterwaelde Framde dee festreit sent enn Pontus, Galatsean, Kapadotsean, Asean en Bitinean,

² no Gott daem Foda siene erkjantness fonn jee haea, en derch daen Heilje Jeist jeheilijt daut jie jehuarsom sulle senne, en derch Jesus Christus sien Bloot jereincht: Mucht Gott junt fael Jnod en Fraed femeare.

³ Je-eat es daem Herr Jesus Christus sien Gott en Foda, dee onns derch sien grootet erboarme haft dee niehe jeburt jejaeft daut wie doaderch ne laewendje Hopninj ha derch Jesus sien oppstone fom Doot,

⁴ to en Oawgoot daut nich fekome oda fegone oda fewalkje kaun, daut fa onns bewoat es em Himel,

⁵ fa onns dee derch Gott siene Aulmacht bewoat woare derch daem Gloowe to ne Radunj dee aum latse Dach woat jeooppenboat woare.

⁶ Doarenn frei jie junt nu met ne groote Freid, wan jie hia nu uk noch en Stootje motte liede enn feshiedenste Proow,

⁷ so daut jun Gloowe jeprooft woat, waut fael meeha weat es aus Golt daut feschwinjt, wan daut uk so es derchem Fia jeprooft woat, dautet mucht to Riem en Harlichkjet senne wan Jesus woat jeoppenboat woare.

⁸ Jie ha Jesus nich jeseene, ha am oba doch leef; en wan jie am nu uk nich seene, oba aun am jleewe, frei jie junt met ne groote Freid dee foll Harlichkjet es oba nich to erkjlaeare jeit;

⁹ en kjriee daut enj fonn jun Gloowe - june Seele Radunj.

¹⁰ Dee Profeete ha jesocht en nojeforscht waut dee Radunj wea; dee haude fonn dee Jnod jeprofetseit dee junt sul tookome.

¹¹ See sochte waut, en waut fonne Tiet dee Jeist dee en an wea, raede deed en an Zeije deed lanj faerhaea fonn daem Christus sien Liede, en dee Harlichkjeit dee nohaea wudd kome.

¹² Dee Profeete wea daut jeoppenboat worde daut see dise Dinje nich fa aere Tiet schreewe, oba fa onns, dee dinje dee onns nu woare bekaunt jemoakt derch dee, dee onns daut Evanjeelium jebrocht habe derch daen Heilje Jeist dee fom Himel jeschekjt wort; en daut es soont waut de Enjel jearen wudde nojeforscht ha.

¹³ Doaromm doot jun Festaunt ennschtale, siet nichta, en stalt june Hopninj gauns opp dee Jnod dee junt woat jebrocht woare wan Jesus woat jeoppenboat woare

¹⁴ soo es jehuarsaume Kjinja, nich junt jlikschtalle met dee Losste dee jie nofoljde aus jie nich baete wiste:

¹⁵ Oba soo aus dee, dee junt rut jewaelt haft heilij es, sael jie uk heilij senne enn aul june Waej,

¹⁶ wiel daut steit jeschraewe: "Jie sele heilij senne wiel ekj sie heilij".

¹⁷ En wan jie daem Foda aunbaede dee oone unjascheet aulem aewareen rechte deit no en jiedrem sien Woakj, laeft june Tiet dee jie hia toobrinje en Forcht,

¹⁸ wiel jie weete daut jie nich met fejenklichet waesent sent jerat worde, so es Selwa oda Golt, fonn daut nutslooset Laewe daut jie fonn june Faeaelre metorwe,

¹⁹ oba met Jesus sien kjestlichet Bloot, so es en Laum aun daut kjeene Sind oda Onnjeschekjtet wea.

²⁰ Gott haud am doatoo jewaelt eeha de Welt Grunt jelaecht wea, oba enn dise latste Doag jeoppenboat es worde waejen onns

²¹ dee wie derch am aun Gott jleewe dee am fom Doot haft oppjewaekjt en haft am ne harlichkjet jejaeft, soo daut onns Gloowe en Hopninj enn Gott mucht senne.

²² Em jehuarsom enne Woarheit ha jie june Seele jereinicht derch daen Heilje Jeist to ne reine Broodaleew, so seet doano daut jie junt unjeranaunda fon Hoate leef habe;

²³ wiel jie sent wadajebuare, nich derch daut waut fejenklich es, oba derch daut waut nich fejenklich es, Gott sien Wuat, daut laewendich es en eewich bliewe woat.

²⁴ Dan "aulet Fleesch, de natearliche Mensch, es so aus Graus, en aulet natearliche Harlichkjeit es so aus de Bloom aum Graus. Daut Graus fedreacht en dee Bloom felt wajch;

²⁵ Oba Gott sien Wuat woat eewich bliewe". En dit es daut Wuat waut junt es jepraedijt worde.