M’Cheyne Bible Reading Plan

Dee 28 Psalm

En Psalm fonn Doft.

¹ Ekj woa to die roope, O Herr Gott; Mien Groota Steen, sie nijch Doof to mie, sest wan du stel best woa ekj soona senne dee fejlikjt woat met soone dee rauf gone no dee Kul.

² Hea dee Stem fonn mien Jebäd enn mien schriehe to die, wan ekj miene Henj opphäw to daut Wuat fonn diene Heilijchkjeit.

³ Nem mie nijch wajch met dee Beese, oda met soone dee Gottloosijchkjeit eewe; dee fonn Fräd raede met aeare Nobasch, oba Beeset es enn äa Hoat.

⁴ Jef an no äa Doone, no daut Beeset daut see aungone; soo aus enn äare Henj äare Oabeit es, soo jef an.

⁵ Wiels see jaewe kjeene Oobacht to däm Herr Gott siene Woakje, un to dee Oabeit fonn siene Henj; Hee woat dän fenijchte, un woat dän nijch oppbuehe.

⁶ Jesäajent es dee Herr Gott, wiels hee haft dee Stem fonn mien Jebäd jeheat.

⁷ Dee Herr Gott es mien Krauft un mien Schilt, mien Hoat Toofetruehe es enn am, doaromm freit sikj mien Hoat butamote, un ekj woa am Dank jäwe met mien Jesank.

⁸ Dee Herr Gott es Macht to an, un hee es dee Fastinj fonn sien Ennjesaulwda siene Radunk.

⁹ Rad dien Folkj, en doo dien Oawgoot säajne; un jef daen Äte, un häw dän fa emma nehejcht.

Dee 29 Psalm

En Psalm fonn Doft.

¹ Jeff to däm Herr Gott, dee Matjchtja äare Säns, jäft to daem Herr Gott Harlijchkjeit un Krauft.

² Jäft to däm Herr Gott dee Harlijchkjeit fonn sien Nome; doot däm Herr Gott aunbäde enn dee Madastijchkjeit fonn siene Heilijchkjeit.

³ Däm Herr Gott siene Stem es opp dee Wotasch; dee Harlijchkljeits Gott deit donnre; dee Herr Gott es bowe fael Wotasch.

⁴ Däm Herr Gott siene Stem enn Macht; däm Herr Gott siene Stem enn Madastijchkjeit.

⁵ Däm Herr Gott siene Stem brakjt dee Tseeda entwei, jo, dee Herr Gott brakjt dee Lebanon Tseeda.

⁶ Hee moakt dän uk sprinje soo aus en Kaulf; Lebanon un Sirion soo aus en junja wila Oss.

⁷ Däm Herr Gott siene Stem schnitt derjch dee Fiaflaum.

⁸ Däm Herr Gott siene Stem scheddat dee Wiltnes; dee Herr Gott scheddat dee Kadesch Wiltnes.

⁹ Däm Herr Gott siene Stem moakt dee Mutta Ree äa Kaulf to Welt to brinje, un dakjt dee Woolt op; un aules enn sien Tempel sajcht "Harlijchkjeit!"

¹⁰ Dee Gerr Gott set opp dee Äweschwaminj; jo, dee Herr Gott set aus Kjeenijch fa emma.

¹¹ Dee Herr Gott woat Krauft jäwe to sien Folkj; dee Herr Gott woat sien Folkj säajne met Fraed.

1 Paul, Jesus Christus sien Apostel derch Gott sien Wele en daut Fespraeakje fonn Laewe enn Christus Jesus,

² Aun Timotaeaus, mien leefsta Saen: Jnod, Erboarme, en Fraed fonn Gott onns Foda, en Christus Jesus onns Herr.

³ Ekj dank Gott, daem ekj fonn miene Faeafodasch aunjebaet ha met en reinet Jewesse, en denk aun die oone Enj enn miene Jebaed Dach en Nacht.

⁴ Ekj ha en felang die to seene, en denkj aun diene Trone, daut ekj met Freid mucht jefelt woare,

⁵ Wan ekj denkj aun daen woarhauftje Gloowe dee eascht enn diene Grootmutta Lois wea, en uk en diene Mutta Eunika, en ekj sie mie aewazeicht, uk enn die.

⁶ Doaromm halp ekj die denkje daut du dee Gow fonn Gott kloa aum brenne helst, dee enn die es doaderch daut ekj miene Henj opp die laed.

⁷ Dan Gott haft onns nich en Forcht Jeist jejaeft, oba fonn Macht, en Leew, en Selfstbeharsche.

⁸ Doaromm schaem die nich waeajen daut Zeichnes fom Herr, uk nich aewa mie, sien Jefangna; oba sie welich fa daut Evanjeelium to liede soo aus Gott onns Krauft jeft;

⁹ Dee onns jerat haft, en beroope haft met ne heilje Beroopinj, nich omm onnse Woakje haulwe, oba no sien eajnet Faeanaeme en Jnod, daut onns jejaeft wort enn Christus Jesus fonn Eewichkjeit haea,

¹⁰ Oba nu jeoppenboat es worde derch daem Herr Jesus sien kome, aun eene Haunt daem Doot wajch jenome, aune aundre Haunt Laewe en Onnstoawlichkjeit to Licht jebrocht derch daut Evanjeelium.

¹¹ Doafaea sie ekj aunjestalt aus en Praedja en Apostel en Leara.

¹² Dit es dee Uasoak wuaromm ekj nu dise Dinje liede mott, oba ekj schaem mie nich, dan ekj weet aun waem ekj jejleeft ha, en sie mie aewazeicht daut waut ekj am aunfetrut ha, hee fa mie bewoare woat bott aun jan Dach.

¹³ Hool die faust, aus en Faeabilt, aun dee heelsaume Wead dee du fonn mie jeheat hast, enn Gloowe en Leew enn Christus Jesus.

¹⁴ Bewoa, derch daem Heilje Jeist dee enn onns wont, daut goodet daut die aunfetrut es.

¹⁵ Du weetst, daut aul dee enn Asean mie felote ha, fonn waem uk Fijeelus en Hermojeenes sent.

¹⁶ Mucht de Herr daem Onesiforus sien Hus Jnod jaewe, dan hee haft mie foaken oppjefrescht, en schaemd sikj nich met miene Kjaede;

¹⁷ Oba aus hee no Room kjeem socht hee flietich no mie en funk mie.

¹⁸ Mucht de Herr am dit jaewe daut hee fael Erboarme mucht kjriehe fom Herr aun jan Dach; en du weetst uk enn woo fael Dinje hee mie deend enn Efeesus.