Chronological

² నాయకులారా, ఈ సందేశం వినండి!
    దేశంలో నివసించే మనుష్యులారా, మీరందరూ నామాట వినండి.
మీ జీవితకాలంలో ఇలాంటిది ఏదైనా ఇదివరకు జరిగిందా?
    లేదు! మీతండ్రుల కాలంలో ఇలాంటిది ఏదైనా జరిగిందా? లేదు!
³ ఈ సంగతులను గూర్చి మీరు మీ పిల్లలతో చెపుతారు.
    మీపిల్లలు వారి పిల్లలతో చెపుతారు.
    మీ మనుమలు, మనుమరాండ్రు తమ తరువాత తరమువారితో చెపుతారు.
⁴ కోత మిడుతలు విడిచిపెట్టినదానిని
    దండు మిడుతలు తినేస్తాయి
దండు మిడుతలు విడిచిపెట్టినదానిని
    దూకుడు మిడుతలు తినేస్తాయి.
దూకుడు మిడుతలు విడిచిపెట్టినదానిని
    వినాశ మిడుతలు తినేశాయి!

⁵ మద్యపాన మత్తులారా, మేల్కొని, ఏడ్వండి!
    ద్రాక్షామద్యం తాగే మీరందరూ ఏడ్వండి.
ఎందుకంటే, మీ క్రొత్త ద్రాక్షామద్యం అయిపోయింది.
    ఆ ద్రాక్షామద్యం మరో గుక్కెడు మీకు దొరకదు.
⁶ నా రాజ్యం మీద యుద్ధం చేయటానికి, ఒక పెద్ద శక్తిగల రాజ్యం వస్తోంది.
    వారు లెక్కించ శక్యం కానంతమంది సైనికులు ఉన్నారు.
ఆ మిడుతలు (శత్రుసైనికులు) మిమ్మల్ని నిలువునా చీల్చివేయగలవు!
    అది వారికి సింహపుకోరలు ఉన్నట్టుగా ఉంటుంది.

⁸ పెళ్లికి సిద్ధంగా ఉండి, తనకు కాబోయే భర్త
    అప్పుడే చంపి వేయబడగా, ఒక యువతి ఏడ్చేలా ఏడ్వండి.
⁹ యాజకులారా! యెహోవా సేవకులారా! ఏడ్వండి.
    ఎందుకంటే యెహోవా ఆలయంలో ధాన్యార్పణం, పానీయార్పణం ఇక ఉండవు.
¹⁰ పొలాలు పాడుచేయబడ్డాయి.
    చివరికి నేలకూడా విలపిస్తుంది.
    ఎందుకనగా ధాన్యం పాడైపోయింది.
కొత్త ద్రాక్షారసం ఎండిపోయింది.
    ఒలీవ నూనె ఇకలేదు.
¹¹ రైతులారా! విచారించండి.
    ద్రాక్షాతోట రైతులారా! గట్టిగా ఏడ్వండి.
గోధుమ, యవల^[a] కోసం ఏడ్వండి!
    ఎందుకంటే పొలంలోని పంట నష్టమైంది.
¹² ద్రాక్షావల్లులు ఎండిపోయాయి.
    అంజూరపుచెట్టు చస్తోంది.
దానిమ్మ చెట్టు, ఖర్జూరపుచెట్టు,
    జల్దరు^[b] చెట్టు, పొలములోని చెట్లు అన్నీ ఎండిపోయాయి.
    ప్రజల్లో సంతోషం చచ్చింది.
¹³ యాజకులారా, మీ విచార సూచక వస్త్రాలు ధరించి గట్టిగా ఏడ్వండి.
    బలిపీఠపు సేవకులారా, గట్టిగా ఏడ్వండి.
నా దేవుని సేవకులారా, మీరు మీ విచారసూచక వస్త్రాలతోనే నిద్రపోతారు.
    ఎందుకంటే, దేవుని ఆలయంలో ధాన్యార్పణం, పానీయార్పణం ఇకమీదట ఉండవు.

2 సీయోనులో బూర ఊదండి.
    నా పవిత్ర పర్వతంమీద హెచ్చరికగా కేకవేయండి.
దేశంలో నివసించే ప్రజలందరూ భయంతో వణుకుదురు గాక.
    యెహోవా ప్రత్యేకదినం వస్తుంది.
    యెహోవా ప్రత్యేకదినం సమీపంగా ఉంది.
² అది ఒక చీకటి దుర్దినంగా ఉంటుంది.
    అది అంధకారపు మేఘాలు కమ్మిన దినంగా ఉంటుంది.
సూర్యోదయాన సైన్యం పర్వతాలలో నిండి ఉండటం నీవు చూస్తావు.
    అది మహాశక్తిగల సైన్యంగా ఉంటుంది.
ఇంతకుముందు ఇలాంటిది ఏదీ, ఎన్నడూ ఉండలేదు.
    మరియు ఇలాంటిది ఏదీ, ఎన్నటికీ మరోసారి ఉండదు.
³ మండుచున్న అగ్నిలా సైన్యం దేశాన్ని నాశనం చేస్తుంది.
    వారి ఎదుట దేశం ఏదెను వనంలా ఉంది.
వారి వెనుక దేశం ఖాళీ ఎడారిలా ఉంది.
    ఏదీ వారినుండి తప్పించుకోలేదు.
⁴ వారు గుఱ్ఱాల్లా కనబడతారు.
    యుద్ధ గుఱ్ఱాల్లావారు పరుగెత్తుతారు.
⁵ వారి మాట వినండి.
అది పర్వతాలమీద రథాలు
    పరుగులెత్తిన ధ్వనిలా ఉంది.
అది పొట్టును కాల్చివేస్తోన్న
    అగ్నిజ్వాలల శబ్దంలా ఉంది.
వారు శక్తిగల ఒక జనం.
    వారు యుద్ధానికి సిద్ధంగా ఉన్నారు.
⁶ ఈ సైన్యం ఎదుట ప్రజలు భయంతో వణకుతారు.
    వారి ముఖాలు భయంతో తెల్లబడి పోతాయి.

¹² ఇది యెహోవా సందేశం:
    “ఇప్పుడు మీ పూర్ణహృదయంతో నా దగ్గరకు తిరిగిరండి.
మీరు చెడ్డ పనులు చేసారు.
    ఏడువండి, ఏడువండి. భోజనం ఏమీ తినకండి.
¹³ మీ వస్త్రాలు కాదు
    మీ హృదయాలు చింపుకోండి.”
మీ దేవుడైన యెహోవా దగ్గరకు తిరిగి రండి.
    ఆయన దయ, జాలిగలవాడు.
ఆయన త్వరగా కోపపడడు.
    ఆయనకు ఎంతో ప్రేమఉంది.
ఒక వేళ ఆయన తలపెట్టిన చెడ్డ శిక్ష విషయంలో
    ఆయన తన మనస్సు మార్చుకొంటాడేమో.
¹⁴ ఒకవేళ యెహోవా తన మనస్సు మార్చుకొంటాడేమో ఎవరికి తెలుసు.
    మరియు ఒకవేళ ఆయన తన వెనుక నీ కోసం ఒక ఆశీర్వాదం విడిచి పెడతాడేమో.
అప్పుడు నీవు నీ యెహోవా దేవునికి
    ధాన్యార్పణం, పానీయార్పణం అర్పించవచ్చు.

¹⁵ సీయోనులో బూర ఊదండి.
    ఒక ప్రత్యేక ఉపవాస సమయం ఏర్పాటు చేయండి.
¹⁶ ప్రజలను సమావేశం చేయండి.
    ఒక ప్రత్యేక సమావేశం ఏర్పాటు చేయండి.
పెద్దవాళ్లను సమావేశపరచండి.
    చిన్న పిల్లలను, తల్లుల స్తనములను ఇంకా కుడిచే చిన్న శిశువులను సహితం సమావేశపరచండి.
పెండ్లికుమార్తెను, ఆమె పెండ్లికుమారున్ని
    వారి పడకగదినుండి బయటకు రప్పించండి.
¹⁷ యాజకులను, యెహోవా సేవకులను
    మండపానికి బలిపీఠానికి మధ్య విలపించనివ్వండి
ఆ ప్రజలందరూ ఈ విషయాలు చెప్పాలి: “యెహోవా, నీ ప్రజలను కరుణించు.
    నీ ప్రజలను సిగ్గుపడనియ్యకు.
    నీ ప్రజలనుగూర్చి ఇతరలను హేళన చేయనియ్యకు.
ఇతర దేశాల్లోని ప్రజలు నవ్వుతూ
    ‘వారిదేవుడు ఎక్కడ?’ అని చెప్పనియ్యకు.”

¹⁸ అప్పుడు యెహోవా ఈ దేశాన్నిగూర్చి ఉద్వేగపడ్డాడు.
    తన ప్రజల విషయం ఆయన విచార పడ్డాడు.
¹⁹ యెహోవా తన ప్రజలతో మాట్లాడాడు.
ఆయన చెప్పాడు, “నేను మీకు ధాన్యం, ద్రాక్షారసం, నూనె పంపిస్తాను.
    అవి మీకు సమృద్ధిగా ఉంటాయి.
    రాజ్యాల మధ్య నేను మిమ్మిల్ని ఇంకెంత మాత్రం అవమానించను.
²⁰ లేదు. ఆ ఉత్తరపు ప్రజలను మీ దేశంనుండి వెళ్ళగొడతాను.
    ఎండిపోయిన ఖాళీ దేశానికి వారు వెళ్ళేటట్టు నేను చేస్తాను.
వారిలో కొందరు తూర్పు సముద్రానికి వెళ్తారు.
    మరి కొందరు పడమటి సముద్రానికి వెళ్తారు.
ఆ ప్రజలు అంత భయంకరమైన పనులు చేశారు.
    కాని వారు చచ్చి కుళ్ళిపోతున్న దానిలా ఉంటారు.
అక్కడ భయంకరమైన కంపు కొడుతుంది!”

²¹ దేశమా, భయపడకు.
    సంతోషించి ఆనందంతోనిండి ఉండు.
    ఎందుకంటే యెహోవా గొప్పకార్యాలు చేస్తాడు.
²² పొలంలోని పశువులారా, భయపడవద్దు.
    అరణ్యపు బీళ్ళు మరలా గడ్డి మొలిపిస్తాయి.
చెట్లు ఫలాలు ఫలిస్తాయి.
    అంజూరపు చెట్లు, మరియు ద్రాక్షావల్లులు మరిన్ని ఫలాలు ఫలిస్తాయి.

²⁸ “దీని తరువాత
    ప్రజలందరిమీద నా ఆత్మను కుమ్మరిస్తాను (ఇస్తాను).
మీ కుమారులు, మీ కుమార్తెలు ప్రవచిస్తారు.
    మీ ముసలివాళ్ళు కలలు కంటారు.
    మీ యువకులు దర్శనాలు చూస్తా రు.
²⁹ ఆ సమయంలో నా సేవకులమీద,
    సేవకురాండ్రమీద కూడ నా ఆత్మను కుమ్మరిస్తాను (ఇస్తాను).
³⁰ ఆకాశంలోను, భూమిమీదను ఆశ్చర్యకార్యాలు నేను చూపిస్తాను.
    రక్తం, అగ్ని, దట్టమైన పొగ ఉంటాయి.
³¹ సూర్యుడు చీకటిగా మార్చబడతాడు.
    చంద్రుడు రక్తంగా మార్చబడతాడు.
అప్పుడు యెహోవాయొక్క
    మహా భయంకర దినం వస్తుంది!
³² అప్పుడు యెహోవా నామాన్ని స్మరించే ఏ వ్యక్తి అయినా సరే రక్షింపబడతాడు.
    సీయోను కొండమీద యెరూషలేములో రక్షింపబడిన మనుష్యులు ఉంటారు.
    ఇది సరిగ్గా యెహోవా చెప్పినట్టే జరుగుతుంది.
మిగిలిన వారిలో
    యెహోవా పిలిచినవారు ఉంటారు.

⁹ రాజ్యాలలో దీనిని ప్రకటించండి:
    యుద్ధానికి సిద్ధపడండి!
బలాఢ్యులను మేల్కొలపండి!
    యుద్ధ వీరులందరినీ దగ్గరగా రానివ్వండి,
    వారిని రానివ్వండి!
¹⁰ మీ నాగటి కర్రులను చెడగొట్టి కత్తులు చేయండి.
    మీ పోటు కత్తులు చెడగొట్టి ఈటెలు చేయండి.
బలహీనుడ్ని కూడ
    “నేను బలాఢ్యుడను” అని చెప్పనీయండి.
¹¹ సకల రాజ్యాల్లారా, త్వరపడండి!
    ఆ స్థలానికి కూడి రండి!
    యెహోవా, బలమైన నీ సైనికులను తీసికొని రా.
¹² రాజ్యాల్లారా, మేల్కొనండి.
    యెహోషాపాతు లోయలోనికి రండి.
చుట్టుపక్కల రాజ్యాలన్నింటికీ తీర్పు చెప్పేందుకు
    అక్కడ నేను కూర్చుంటాను.
¹³ పంట సిద్ధంగా ఉంది గనుక
    కొడవలి పట్టుకొని రండి.
రండి, ద్రాక్షా గానుగ నిండిపోయింది గనుక
    ద్రాక్షాపండ్లమీద నడవండి.
వారి దుర్మార్గం చాలాఉంది గనుక
    పీపాలు నిండిపోయి పొర్లిపోతాయి.
¹⁴ తీర్మాన లోయలో ఎంతో మంది ప్రజలు ఉన్నారు.
    యెహోవా ప్రత్యేక దినం తీర్మాన లోయకు సమీపంగా ఉంది.
¹⁵ సూర్యుడు, చంద్రుడు చీకటి అవుతాయి.
    నక్షత్రాలు ప్రకాశించడం మానివేస్తాయి.
¹⁶ యెహోవా దేవుడు సీయోనులోనుండి కేకవేస్తాడు.
యెరూషలేమునుండి ఆయన కేక వేస్తాడు.
    మరియు ఆకాశం, భూమి కంపిస్తాయి.
కాని యెహోవా దేవుడే ఆయన ప్రజలకు క్షేమస్థానం.
    ఇశ్రాయేలు ప్రజలకు ఆయన క్షేమస్థానంగా ఉంటాడు.
¹⁷ “మీ యెహోవా దేవుడను నేనే అని అప్పుడు మీరు తెలుసుకొంటారు.
    నా పవిత్ర పర్వతమైన సీయోనులో నేను నివసిస్తాను.
యెరూషలేము పవిత్రం అవుతుంది.
    పరాయివారు ఆ పట్టణంలోనుండి మరల ఎన్నడూ దాటి వెళ్లరు.”

¹⁸ “ఆ రోజున పర్వతాలనుండి తియ్యటి ద్రాక్షారసం కారుతుంది.
    కొండల్లో పాలు, తేనెలు ప్రవహిస్తాయి.
    మరియు యూదాలోని ఖాళీ నదులన్నిటిలో నీళ్ళు ప్రవహిస్తాయి.
యెహోవా ఆలయంలోనుండి ఒక నీటి ఊట చిమ్ముతుంది.
    అది షిత్తీము లోయకు నీళ్ళు ఇస్తుంది.
¹⁹ ఈజిఫ్టు ఖాళీ అవుతుంది.
    ఎదోము ఖాళీ అరణ్యం అవుతుంది.
ఎందుకంటే యూదా ప్రజలపట్ల వారు క్రూరంగా ఉన్నారు.
    వారి దేశంలోని నిర్దోషప్రజలను వారు చంపివేశారు.
²⁰ కాని యూదాలో మనుష్యులు ఎల్లప్పుడూ నివసిస్తారు.
    అనేక తరాలవరకు యెరూషలేములో మనుష్యులు నివసిస్తారు.
²¹ ఆ మనుష్యులు చాలా మంది ప్రజలను చంపేశారు.
    కనుక ఆ ప్రజలను నేను నిజంగా శిక్షిస్తాను!”