Beginning
Tik Corinto
18 Tipan kiajkaw Atenas wan yajki ka Corinto, 2 wan kiajsik se Yudayuj itukay Aquila ipal Pontos, ká yewa kistuya tik Italia, wan Priscilla ne isiwaw, ika Claudius kintuktijtuya muchi ne Yudayujmet kiajkawat Roma. Wan yajki intech, 3 wan nakak ka inchan tekiti ika kenha ne itekiw; yejemet kichiwat katka tajtawipanti. 4 Muchi ne sejsewilis yaja tajtaketza katka tik ne kalsennemit iwan Yudayujmet wan sejse ipal Grecia.
5 Kwak walajket tik Makedonia ne Shila wan ne Timoteo, ne Pawlo pejki tanutza wan kinnawatia ne Yudayujmet ka Yeshu ne Mawaltijtuk. 6 Kwak inaket ka inte wan kukujtaketzat wan kitzejtzeluat ne inkwajkwach, yaja kinhilwij:
—Ma nemi ne anmuesyu anmujpak! Naja nikchijtuk tay niweli. Mas yek niasneki itech ne tejtechan.
7 Wan kiski wan yajki ichan se itukay Titus Yustus. Yaja kiyulmati ne Teut. Ne ikal nemituya inakastan ne kalsennemit. 8 Ne sennemituktiani, ne itukay Crispus, kiyulmatki ne Tajtzin wan muchi ne ikal nusan, wan muchi ne takamet wan siwatket ipal Corinto tayulmatit wan mumakat ulyuj. 9 Ne Tajtzin kilwij ne Pawlo ka tayua tik se tachialis:
—Maka shimajmawi! Shina wan maka shitakaktuk! 10 Ika naja ninemi muwan wan te aka yawi metzchiwilia tatka, ika miak tik ini techan nupal.
11 Nakak ka né se shiwit wan chikwasen metzti tamachtia itzalan yejemet ne ipalabraj ne Teut.
12 Kwak Galion itepalewiani ne tatuktiani katka ipal Akaia, ne Yudayujmet muketzket ken sesan kitzkiat Pawlo wan kiwikaket iishpan ne kalpuli, 13 inat:
—Yajini kinhilwia ne takamet ma mutankwaketzakan iishpan Teut ken inte ina ne tajtuli!
14 Kwak ne Pawlo yawi mutenpelua, ne Galion kinhilwij ne Yudayujmet:
—Asu uni tay anhinat se tay inteyek o se tay inte weli muchiwa, nimetzinchiwiliskia casoj; 15 asu semaya se tajtanilis ipanpa pajpalabraj wan ipanpa ken itukay wan ipanpa ne anmutajtuli, anmejemetsan shikitakan, naja inte nikneki nina tatka.
16 Wan kalinhishtij tik ne kalpuli. 17 Muchi kitzkijket Sostenes, ne sennemituktiani, wan kichalujket iishpan ne kalpuli, wan ne Galion inte kichijki tatka.
Pawlo mukwepa ka Antiokea
18 Pawlo kenhayuk nakak iwan ne tukniwan miak tunal. Tipan kinhajkaw wan yajki tik se barcoj ka Siria, wan Priscilla wan Aquila yajket iwan. Tik Kenkreay yaja mutzunshinki ika kichijtuya se promesaj. 19 Ajsik Epesos wan ne sejseuk mukawket ka né. Yaja kalak tik ne kalsennemit tajtaketza iwan ne Yudayujmet. 20 Yejemet kitajtanket ma naka inwan mas, wan te kinekik. 21 Kwak kinhajkaw inak:
—Nalmukwepas ukseujti asu kineki ne Teut.
Kwakuni kiski Epesos wan yajki. 22 Wan kwak ajsik Kaysarea, yajki kitajpalua ne sennemit, wan yajki ka Antiokea
Apolos
23 Wan panuk sejse tunal ka né, wan neman kiski pashalua nujme ne tal ipal Galatia wan Prugia, wan kinpalewia katka muchi ne mumachtianimet pal chikawayat.
24 Se Yudayuj itukay Apolos ipal Aleksandria, se takat weli taketza yek, ajsik tik Epesos. Yaja welituya tay nemi ijkwilujtuk tik ne ajamat. 25 Yajuni mumachtijtuk ne ujti ipal ne Tajtzin wan kwakwalaka iyulu. Yaja tanutza katka wan tamachtia muchi ipanpa ne Yeshu, wan isel kishmati ne iteulyujmakalis Yojan. 26 Yaja pejki tanawatia melaknaj tik ne kalsennemit. Kwak Priscilla wan Aquila kikakket, kinutzket wan kineshtilijket mas yek ne Ujti ipal ne Teut. 27 Kwak yaja kinekituya panu ka Akaia, ne tukniwan inaket ka yek nemi wan kijkwilujket se amat ipal ne mumachtianimet ka né ma kikwikan, wan yaja ajsik wan kinpalewij wey ne tayulmatit ipanpa ne tetasujtalis, 28 ika tetekia sea kinhajajwa katka iishpan ne techan wan kilwitia katka iwan ne tay nemi ijkwilujtuk ka Yeshu ne Mawaltijtuk.
Pawlo tik Epesos iwan ne imujmumachtiani Yojan
19 Kwak Apolos nemituya tik Corinto, Pawlo panuk ka ajkuik wan ajsik tik Epesos, wan kiajsik sejse mumachtiani. 2 Wan yaja kintajtanilij:
—Ankikwijket ne Ijiutzin kwak antayulmatket?
Yejemet kilwijket:
—Nian titakaktiwit ka nemi ne Ijiutzin!
3 Wan yaja inak:
—Tay iwan anmumakaket ulyuj?
Wan inaket:
—Iwan ne iteulyujmakalis Yojan.
4 Inak Pawlo:
—Pawlo kinmakak muchi ulyuj ipal yulpatalis wan ina katka ma kiyulmatikan ne witz ka iipan; kineki ina tel, ma kiyulmatikan ne Yeshu.
5 Kwak kikakket, mumakaket ulyuj tik itukay ne Tajtzin Yeshu, 6 wan kwak ne Pawlo kinteuchij, ajsik inhijpak ne Ijiutzin; wan pejket tanutzat tik tajtaketzalis wan taketzat pal Teut. 7 Muchi yejemet anka majtakti ume takat.
Pawlo tayeknawatia tik Epesos
8 Kalak tik ne kalsennemit wan tanawatia nemi melaknaj yey metzti; tajtaketza katka wan taneshtia katka ipanpa ne itatekimakalis ne Teut. 9 Kwak sejse pejket muchiwat tajtakwawak wan najnankiliat wan kijilwiat ne Ujti tik itachialis muchi, kinhajkaw wan kinwikak ne mumachtianimet ka inkwaj, wan mujmusta tajtaketzat katka tik ne itamachtiluyan Turano. 10 Panuk ijkiuni ume shiwit. Kiane muchi ne muchantiat tik Asia, ne Yudayujmet wan ne Greciajchanejket, takakket ne ipalabraj ne Tajtzin.
11 Ne Teut pejki kichiwa sejse wey itech Pawlo, 12 ken muwikat katka itech ne kukuyat kwachtzitzin wan majmandil nentiwit tik iweyka wan kinhajkawat ne inkujkukulisyu wan kisat ne nawalmet inte yejyek intech. 13 Sejse pal ne Yudayujmet ne pashaluat nawaltuktiat kiejekujket kitukaytiat ijpak ne kipiat nawalmet inte yejyek ne itukay ne Tajtzin Yeshu. Inat katka:
—Nimetzintuktia tik itukay ini Yeshu ká ne Pawlo tanajnawatia.
14 Nemiket chikume takat, ne ipijpilawan se weypalej Yudayuj itukay Eskewas, ne kichiwat ijkiuni: 15 nankilij ne nawal teyek, kinhilwij:
—Yeshu naja nikishmati wan Pawlo nusan, pero ká anmejemet?
16 Wan ne takat kipiatuya ne nawal teyek tzikwinik inhijpak wan kinsunki hasta chulujket pejpetznaj wan chajchalujtuk.
17 Mumatki uni ijtik muchi ne Yudayujmet wan ne Greciajchanejket ne muchantiat tik Epesos, wan mumutijket muchi wan inaket ka wey ne Tajtzin Yeshu. 18 Wan ajsiket miak ká tayulmatit wan muyulkwitijket wan kineshtijket tay kichijtiwit. 19 Miak ipal ne kichiwat katka magiaj kisenputzujket ne ajamat wan kitatijket tik itachialis muchi. Wan kisenpujket wan kiajsiket ka cincuenta mil takutun tumin ipatiw. 20 Ijkiuni weyki ne itajpal ne ipalabraj ne Tajtzin.
21 Kwak tamik muchi uni, Pawlo inak tik iyulu ka achtu yawi panu ijtik Makedonia wan Akaia wan tipan yasneki ka Yerushalem, wan inak:
—Niasneki ikuni wan tipan nemi pal nitachia Roma nusan.
22 Kintitanij ka Makedonia ume ipal ne itejtekitini, Timoteo wan Erasto, wan yaja nakak tik Asia.
Mukumuntiat ne tuminchiwat
23 Tik uni tujtunal muchijki se wey kumunilis ipanpa ne Ujti: 24 nemituya se itukay Demetrios itekiw tuminchiwa (kineki ina ka kichiwa katka tajtachialis yektzin ipal tumin). Yaja kichiwa katka teujteupantzitzin ipal ne siwateutzin Artemis, wan ijkiuni kipiat katka wey itekiw ne tekitinimet. 25 Yaja kinsenputzuj muchi ne kichiwat katka uni itekiw wan inak:
—Nukunpawan, ankimatit ka iwan ini tutekiw welit tikpiat wey, 26 wan antachiat wan antakakit ka inte semaya tik Epesos, nusan ajatzika nujme Asia, uni Pawlo tajtaketztuk wan kinhishkweptuk miak. Yaja ina ka inte kanaj teujteutzinmet ne muchijtiwit iwan ne tujtumey. 27 Kineki ina ka ne tutakutun weli muchiwa te tatka; wan nusan ka ne iteupan ne wey siwateutzin Artemis inte yawi tatka ipatiw wan intea yawi wey, melka ashan mutankwaketzat muchi tik Asia iishpan.
28 Kwak kikakket, sujsul kwalanket wan pejket tzajtzit:
—Wey ne Artemis ipal ne Epesoschanejket!
29 Wan mukumuntij muchi ne techan, wan muchi yajket mutaluat wan kalakket tik ne teatroj wan kitzkijket Gaius wan Aristarkos, isejsenpashaluani Pawlo ipal Makedonia.
30 Kwak Pawlo inak ka yasneki tik techan, ne mumachtianimet inte kiajkawket yawi. 31 Sejse ipal ne tatuktianimet ipal Asia ká iajamigojwan nusan tatuktijket itech wan tajtanket iwan ma inte yawi tik ne teatroj.
32 Tik ne sennemit, ne sejse pejket tzajtzit se, wan ne sekit pejket tzajtzit ukse; nemituyat majmamalijtuk wan sujsul miak inte kimatit katka taika musentepejtiwit. 33 Itzalan muchi, ne Yudayujmet kishtupejket Aleksandro ka iishpan; yaja taishnutzki iwan ne imey wan kinekituya kinhilwia se. 34 Kwak kishketzket ka yaja Yudayuj, muchi tzajtzit katka iwan se kupak ijtik ume horaj ka wey ne Artemis ipal Epesos. 35 Kwak tamik ne tajkwiluani kichiwa ka takaktuat, inak:
—Nukniwan ipal Epesos, wan katiawel ne takat inte kimati ka Epesos se techan kitajpia ne iteupan ne wey Artemis wan ne ilwikawetztuk. 36 Yajika inte weli aka techilwia tatka. Nemi pal titakaktukan wan ma inte tikchiwakan tatka talul. 37 Ika ankalwikatiwit ini takamet ká nian teupanhichtekit nian kukujtaketzat iwan ne tuteutzin. 38 Kiane tel, asu Demetrios wan ne tekitinimet iwan kipiat tatka pal inat, nemit ne tajtuli wan ne tatuktianimet: ma muilwikan tay kinekit ka né. 39 Wan su ankitemuat tatka mas, ma muita tik se sennemit ipal ne kalpuli, 40 ika se weliskia ina ka timuketztiwit ipanpa tay ashan muchijki wan te tiweliskiat tinat taika muchijki ini sennemit.
Wan kwak tamik ina ini, kintuktij wan yajket.
Pawlo tik Troas
20 Kwak tamik ne kumunilis, ne Pawlo kalinnutzki ne mumachtianimet wan kinnapaluj wan kinhilwij "niawa tel" wan yajki ka Makedonia. 2 Panuk tik uni takutun, wan tanutzki wey wan ne tukniwan, wan nemanha yajki ka Grecia, 3 wan nemik ka né yey metzti. Kwak yaja yasneki ka Siria, ne Yudayujmet tajtaketzket pal kitat ken yawit kichiwat pal kitzkiat; wan yaja inak ka mas yek yawi mukwepa tik Makedonia. 4 Iwan senyajki Sopatros ikunew Purros ipal Beroya, Aristarkos wan Secundus ipal Tesalonika, Gaius ipal Derbe, wan Timoteo, wan ipal Asia Tukikos wan Tropimos. 5 Yejemet yajket achtu wan techchishket tik Troyas. 6 Tejemet ajkewket ka Pilipoy kwak tamik ne ilwit kwak te mukwa ne tay kipia shukutishti, wan tiajsiket kan nemituyat tik Troyas tik makwil tunal, wan tinakaket ka né chikume tunal.
7 Tik ne achtu tunal ipal ne semanaj kwak tisentepejket muchi titamalpitzakuat, ne Pawlo tajtaketza nemi. Ne ukse tunal yaja yawi kisa, yajika nakak tajtaketza hasta tajkuyua; 8 nemituyat miak tawil tik ne cuartoj ka ikajku tik ne kal kan tisennemituyat. 9 Nemik se takapiltzin itukay Ewtukos muetztuk itech ne tentzin, wan kukuchki kwak tajtaketza nemi ne Pawlo, wan kwak yaja kuchi wetzki sujsul wejka talchi wan kwak kianket yaja miktuk. 10 Ne Pawlo temuk wan wetzki ijpak wan kinapaluj, wan inak:
—Maka shimukumuntikan, ika nemiuk ne yulkwilis ijtik yaja.
11 Tejkuk wan kipitzakuj ne tamal wan kiejekuj, wan tajtaketzki wey hasta taneski. Ijkiuni yajki. 12 Kalwikaket ne takapiltzin yultuk wan pakiket inte chiupi.
13 Tejemet tiajsiket achtu tik ne barcoj wan tiajket ka Asos pal tikanat Pawlo ka ikuni, ika ijkiuni tatuktij ika yaja yawi nejnemi ikshipan. 14 Wan kwak technamik tik Asos tikanket wan tiajsiket tik Mitulene. 15 Tikisket wan tiajket tik ne barcoj wan ne ukse tunal tiajsiket imelawka Kios, wan ne seuk tiejkuket tik Samos, wan tik ne seuk tiajsiket ka Miletos. 16 Ika ne Pawlo inatuya ka yawi panu iishpan Epesos pal inte ishtuna tik Asia, ika ijisiwi katka pal kita su weli nemi tik Yerushalem tik ne ilwit ipal ne Tunal Unpual Majtakti.
Pawlo kinnutza ne noymet ipal ne sennemit ipal Epesos
17 Tik Miletos yaja tatuktij ka Epesos kalinnutza ne noymet ipal ne sennemit, 18 wan kwak ajsiket, yaja kinhilwij:
—Anmejemet kimatit ken ninentuk anmuwan senpa, tik ne achtu tunal ka niajsik tik Asia wan hasta ashan; 19 ken nitekittuk ipal ne Tajtzin iwan kanawakmatilis hasta nichukak wan nechejekujket ika ne Yudayujmet kinekituyat nechitzkiat; 20 wan ken inte nimukawtuk pal nimetzinnawatia wan nimetzinmachtia muchi tay weli metzinpalewia, ishpan muchi wan ka ichan sejse; 21 wan ken nikinnawatijtuk Yudayujmet wan Greciajchanejket ma muyulpatakan ipal Teut wan ma kiyulmatikan ne Tutajtzin Yeshu.
22 Wan ashan ne Ijiutzin kineki ma niaw ka Yerushalem, wan te nikmati tay iwan niaw nimunamiki ka né. 23 Semaya nikmati ka ne Ijiutzin nechnawatia witz tik muchi ne tejtechan wan ina ka nupal nakat ijilpika wan pejpenaj. 24 Melka uni, inte nimajmawi nian tatka ipanpa ne nuweyka, mas yek nikelewia ma niktami ne nuuj wan ne nutekiw tay ne nikwij itech ne Tajtzin Yeshu pal nitanawatia ne yeknawatilis ipal teutasujtalis.
25 Ashan nikmatiaya ka muchi anmejemet intea keman anyawit nechitat, ká nipanutuk nitanajnawatia ne tatekimakalis anmutzalan. 26 Yajika tik ini tunal nina anmuishpan ka inte nikpia culpaj ipanpa ne iesyu muchi, 27 ika inte nimukawtuk pal nimetzinnawatia muchi tay kineki ne Teut. 28 Shiktalikan cuidadoj anmupanpa wan ipanpa muchi ne tepewatzin ká ijpak metzintalijtuk ne Ijiutzin ma shikinpachiwikan pal ankitakwaltiat ne sennemit ipal ne Teut, tay ne yaja kipalewij iwan ne iesyu.
29 Naja nikmati ka kwak niajtuka ajsisket anmutech kuyumet wan tekwanimet wan kiwilewasket ne tepewatzin, 30 wan hasta ijtik anmejemet sejse muketzasket tanutzat sejse kwejkwelnaj pal kiajkewat mumachtianimet inhipan. 31 Neka shikishpelwikan wan shikelnamikikan ka inte nimuketztuk nian ka tayua nian ka tunal ijtik yey shiwit pal nimetzinnawatia muchi anmejemet hasta nichuka katka; 32 wan ashan, nukniwan, nimetzinhishpanua ne Teut wan ne palabraj ipal ne itetasujtalis, ká ne weli kiketza wan metzinmaka se tay anmupal ijtik muchi ne teujteuchijtuk.
33 Inte niktajtanilijtuk aka nian tumin nian teukwit nian kwajkwachti. 34 Ankimatit yek ka ini nujnumey tekittiwit insel pal tamakat tay ne nimuneki wan tay ne munekit katka nukunpawan. 35 Muchi nimetzinmachtijtuk ka ijkiuni nemi pal ankujkutiat pal ankinpalewiat ne kukuyat wan ankielnamikit ne ipajpalabraj ne Tajtzin Yeshu, ká inak:
"Nemi yek ma titamakakan mas que ma titakwikan."
36 Wan kwak inatuk ini, mutankwaketzki inwan muchi wan kinutzki ne Teut. 37 Muchi chukaket wey wan kinapalujket wan kitejtennamikket, 38 wan sea kinkukua katka ika inak ka intea keman yawit kitat, wan walajket iwan hasta ne barcoj.
Ne Bibliaj Tik Nawat · © 2008, 2012 Jan Morrow