Beginning
Tik Ikonion
14 Tik Ikonion, kalakket ne ujume ijtik ne kalsennemit ipal ne Yudayujmet, wan kwak tanutzket, tayulmatket miak ipal ne Yudayujmet wan miak ipal Grecia.
2 Ne Yudayujmet ne inte tayulmatit kinkumuntijket ne uksejse techan wan kichijket ka kitenejket ne tukniwan. 3 Yajika, yejemet nakaket tanawatiat melaknaj ipanpa ne Tajtzin miak horaj, wan ne Tajtzin kiajkaw ma mumati ne palabraj ipal ne itetasujtalis wan tamakak sejse pal muishmati tetekia sea intech yejemet.
4 Mutakutuntijket muchi ijtik ne techan, wan mutalijket ne sejse inwan ne Yudayujmet wan sejseuk inwan ne tijtitanijtuk. 5 Kwak ne sejseuk techan wan ne Yudayujmet inwan ne intajtatuktiani pejket kinhijilwiat wan kinekituyat kintejtemimat, 6 mumakaket cuentaj wan chulujket hasta ne tejtechan ipal Lukaonia: Lustra wan Derbe wan ne tajtal unisan; 7 wan tayeknawatijket yajket ka ikuni.
Tik Lustra
8 Wan tik Lustra nemituya muetztuk se takat inte kipia yek ne ijikshi, ne kukuyaya kwak kiski ijtik ne iijti ne inan wan inte keman nejnentuk. 9 Yajuni kikakik ne Pawlo tanutza. Pawlo tachishki wan kitak ka ne takat kimati tik iyulu ka weli yektia, 10 wan kitzajtzalij:
—Shimuketza melaktik ijpak mujmukshi!
Wan tzikwinik wan pejki nejnemi. 11 Kwak muchi kitaket tay kichijtuya Pawlo, pejket tzajtzit tik ne taketzalis ipal Lukaonia, inat:
—Ne teujteut temutiwit tutech tik intachialis takamet!
12 Wan yejemet kinutzket ne Bar-Naba Zeus (ne itukay ne mas wey ipal ne inteujteut), wan ne Pawlo kilwijket Hermes, ne wey tanutzani. 13 Wan ne palej ipal Zeus ká nemituya iishpan ne techan kalwikak ujukichwakashmet wan shujshuchit itech ne tenkal, wan iwan muchi kinekituya kintakulia.
14 Wan kwak takakket ne tijtitanijtuk Bar-Naba wan Pawlo kitapanket ne inkwajkwach wan kisket mutaluat wan tzajtzit, 15 wan inat:
—Tajtzitzinmet, taika ankichiwat muchi ini? Tejemet nusan timumatit kenha ken anmejemet wan timetzinyeknawatiliat ma shimuishkwepakan, ma shikajkawakan ini tay inte tatka wan ma shikwikan ne Teut yultuk ká kichijki ne ilwikak wan ne tal wan ne at wan muchi tay nemi ijtik yejemet; 16 ká melka kiajkaw ma yawikan muchi ne tejtechan pal ikman sejse tik ne iuj, 17 yaja kia muneshtij ika kichiwa miak tay yek: anmupal kichiwa ka kisa tik ne ilwikak ne at wan ka wetzi tik ne tal, wan ka witz ne shupan kalwika ne itajtakil; yaja metzintepewilia anmutakwal wan ne ipakilis ne anmuyujyulu.
18 Wan melka inat ijkiuni, uij ma kichiwakan ma inte kimiktikan pal kintakuliat. 19 Kisket Antiokea wan Ikonion Yudayujmet wan walejkuket wan kinhilwijket muchi ma kitejtemimakan ne Pawlo. Kwakuni kitilanket Pawlo ika kimatit ka yaja miktuk, wan kishtijket tik ne techan. 20 Kwak ne mumachtianimet kiyawalujket, yaja muketzki wan kalak ijtik ne techan.
Wan ne ukse tunal, kiski iwan Bar-Naba wan yajket ka Derbe.
Mukwepa ka Antiokea
21 Kwak tamiket tayeknawatiat tik uni techan wan kichijtuyat miak mumachtiani, mukwepket Lustra wan Ikonion wan Antiokea. 22 Kinpalewiat katka ne mumachtianimet pal chikawayat ne inyujyulu wan kintajtanit ma inte kielkawakan ne intayulmatilis, wan inat ka tinemit pal tipanut tik miak penaj ma tiajsikan ne itatekimakalis ne Teut. 23 Tik muchi ne sejsennemit kintukaytijket nojnoymet, wan kinujnutzket ne Teut wan kisejselijket mayan wan kinhishpanujket ká kiyulmatket ipal ne Tajtzin.
24 Wan panuket ijtik Pisidia wan ajsiket tik Panpulia, 25 wan kwak tamiket tanutzat ipanpa ne palabraj tik Perga, temuket ka Atalea, 26 wan ka né kisket tik se barcoj wan ajsiket Antiokea, yaja ne techan kanka achtu mutemakatuyat iishpan ne Teut, tik ne itetasujtalis, ipal ne intekiw ne kichijket.
27 Ajsiket tel wan kisentepejket ne sennemit, wan pejket taneshtiat muchi tay kichijtuk ne Teut intech wan ken kintapuilij ne tejtechan ne itenkal ne tayulmatilis. 28 Nakaket miak tunal iwan ne mumachtianimet.
Tay inaket tik ne Sennemit ipal Yerushalem wan tay kichijket
15 Kisket Yudaya sejse wan waltemuket wan kinmachtijket ne tukniwan ka:
—Asu inte anmuyawaltekit ken kichiwat katka ika ijkiuni inak Moshe, inte welit anmupalewiat.
2 Kiane, muketzket ankakeski wan kinhishtenejket ne Pawlo wan ne Bar-Naba. Yajika, inaket ma tejkukan Pawlo wan Bar-Naba wan sejseuk pal yejemet ka Yerushalem wan ma yawikan intech ne tijtitanijtuk wan nojnoymet ka né pal muita uni tajtanilis.
3 Yejemet tel, kwak ne sennemit kintuktij ma yawikan, panuket ijtik Poynikia wan Shamarea, wan taneshtijket yajket ken muishkwepket ne tejtechan, wan kichijket ka pajpakiket muchi ne tukniwan. 4 Kwak ajsiket Yerushalem, muchi ne sennemit kinkwijket wan ne tijtitanijtuk wan ne noymet, wan kinneshtijket muchi tay ne Teut kichijtuk inwan. 5 Muketzket sejse ipal ne sectaj ipal ne Parishayujmet ká tayulmatit katka, inat ka muneki ma muyawaltekikan, ma kintuktikan ma kitajpiakan ne itajtuli Moshe. 6 Kwakuni musentepejket ne tijtitanijtuk wan ne noymet pal kitat tay inat ipanpa. 7 Muishtenejket wey, wan muketzki Pedro wan kinhilwij:
—Nukniwan, anmejemet kimatit ka ikman panutuk ne Teut taishpejpen ijtik tejemet, pal ma takakikan ne tejtechan itech ne nuten ne palabraj ipal ne Yeknawatilis wan ma tayulmatikan, 8 wan ne Teut, ká kimati tay nemi ijtik tuyujyulu, inak ka nemi yek wan kinmakak ne Ijiutzin kenha ken nusan techmakak, 9 wan kichijki inwan kenha ken kichijki tuwan wan kipupuj ne inyujyulu iwan tayulmatilis. 10 Ashan, tel, taika ankiejekuat ne Teut wan kitaliat ini kimil ijpak ne inkechtan ne mumachtianimet, tay nian ne tutejteku nian tejemet weliket tikseliat, 11 asunte tikmatit ka timupalewisket ika ne Tajtzin Yeshu techtasujta. Yejemet kenhaya!
12 Muchi mukawket tajtakaktuk, kinkakit Bar-Naba wan Pawlo taneshtiat keski kichijki ne Teut pal muishmati, wan tay tetekia, ijtik ne tejtechan ka inmaku. 13 Tipan nankilij Yakob ina:
—Nukniwan, shinechkakikan: 14 Shimon taneshtijtuk ken achtu ne Teut yajki kikwi ijtik muchi ne tejtechan se ipal; 15 wan ijkiuni inat ne taketzanimet ken muijkwilujtuk:
16 "'San nalmukwepas, senpa niketzas itawipan Dawid, ne kuwetztuk,
niketzas senpa wan nikmelawas tay nemituya wilejtuk,
17 pal kiane ne sekit ma kitemukan Tutajwan,
nusan muchi ne tejtechan ne munutztiwit tik nutukay,'
ina ne Tutajwan ne kichiwa muchi 18 tay tikishmatit pal ikman wan pal ashan."
19 Neka nina naja ma inte tikakasukan yejemet pal ne tejtechan ká ne muishkwepat itech ne Teut, 20 wan ma tiktuktikan se amat pal tikinhilwiat ma inte mususulwikan iwan teutzitzinmet, ma inte tatzinhejenchiwakan wan ma inte kikwakan ne kechpachujtuk nian ne esti, 21 ika Moshe kipia sejse ká kinajnawatiat ikman wan ashan tik kajkalsennemit ijtik muchi ne tejtechan kan amataketzat muchi ne sejsewilis.
22 Kwakuni ne tijtitanijtuk wan ne noymet wan muchi ne sennemit inaket ma kishpejpenakan sejse ipal yejemet wan ma kintuktikan ka Antiokea iwan Pawlo wan Bar-Naba. Yejemet Yuda ne munutza Bar-Saba wan Shila, tatuktianimet ijtik ne tukniwan. 23 Kijkwilujket se amat pal kiwikat ka né wan tik uni amat inat:
Ne tukniwan tijtitanijtuk wan noymet kintajpaluat ne tukniwan ipal tejtechan tik Antiokea wan Siria wan Kilikia!
24 Titakaktiwit ka sejse tejemet ajsitiwit anmutech wan metzinyulkakasujtiwit ipanpa tay ne metzinhilwijtiwit, melka tejemet inte tikintitanijket. 25 Yajika, muchi tejemet tinatiwit ma tikinhishpejpenakan sejse pal tikintuktiat anmutech iwan Bar-Naba wan Pawlo ne yejyektasujtatuk, 26 ká temakatiwit inyujyulu ipanpa Tutajtzin Yeshu Mawaltijtuk. 27 Yajika tiktitanijtiwit Yuda wan Shila, wan nusan yejemet kenha metzinhilwisket, 28 ika inak ne Ijiutzin, wan tejemet nusan tinaket, ma intea timetzintalilikan anmutekiw; semaya ini tay muneki: 29 ma inte shikwakan tay mutakulijtuk ne teujteutzitzin, nian esti nian kejkechpachujtuk, wan ma inte shitatzinhejenchiwakan. Asu uni antajpiat, yek ankichiwat.
Shiakanha yek!
30 Ijkiuni, yejemet yajket wan ajsiket tik Antiokea. Wan kwak musentepejket muchi, kinmakaket ne amat. 31 Kwak kitaket tay ina ne amat, pakiket ika kinpalewijtiwit. 32 Yuda wan Shila, ká nusan taketzanimet, kinpalewijket ne tukniwan pal chikawayat. 33 Kwak nakatiwit sejse tunal ka ne, ne tukniwan kinchulultijket wan kinhilwijket ma nemikan yek wan mukwepket itech ne kintitanijtiwit. (34) .
Pawlo wan Bar-Naba muajwaket
35 Pawlo wan Bar-Naba nakaket tik Antiokea tamachtiat wan tayeknawatiat inwan ne sejseuk ne ipalabraj ne Teut. 36 Kwak panutiwit sejse tunal, Pawlo kilwij Bar-Naba:
—Yek, timukwepakan titachiat ne tukniwan tik muchi ne tejtechan kan ne titanajnawatijtiwit ne ipalabraj ne Teut pal tikitat ken ijtuk.
37 Bar-Naba kinekituya kiwika inwan ne Yojan ne munutza Marcus, 38 wan Pawlo inak ka yajuni kinhajkaw tik Panpulia wan te senyajki inwan tekiti, wan te kinekituya kiwika inwan. 39 Muajwaket tetekia sea, wan kupejket ne ujume. Ne Bar-Naba kikwij ne Marcus wan ajkewki tik se barcoj pal yawi Kipre.
Pawlo tik Pilipoy
40 Pawlo kishpejpen Shila; wan ne tukniwan temakaket iwan ne itetasujtalis ne Tajtzin, wan yajki 41 pashalua ijtik Siria wan Kilikia kinpalewia ne sejsennemit pal chikawayat.
Ne Bibliaj Tik Nawat · © 2008, 2012 Jan Morrow