Beginning
Pedro kinhilwij ne tekniwan tik Yerushalem tay panutuk
11 Ne tijtitanijtuk wan ne tekniwan tik Yudaya takakket ka nusan ne ujukse tejtechan kikwijtiwit ne ipalabraj ne Teut. 2 Kwak Pedro ajsituya Yerushalem, ne yajyawaltektuk kitajtanilijket 3 inat:
—Taika tiajsik itech takamet kipiat itzuntepul (ika inte muyawaltektiwit) wan tisentakwaj inwan?
4 Pedro pejki kinneshtilia muchi nejnejmach wan inak:
5 —Naja ninemik tik ne techan ipal Yapo niknujnutza ne Teut wan nishpuyawik wan nikitak se tachialis. Nikitak temu se ken se wey kwachti kisa ne ilwikak wan mutemultia itech ne nawi itzun wan ajsik nutech. 6 Kwak nitachishki, nikejketzki wan nikitak ne najnawikshimet ipal ne tal wan ne tejtekwanimet wan ne ulininimet, wan ne tujtutut ipal ne ilwikak. 7 Nusan kikakik se nechilwia:
"Shimuketza Pedro, shitamikti wan shitakwa."
8 Ninak:
"Tesu Tajtzin, ka tatka tay susulnaj wan te yek pal mukwa inte keman kalak ijtik ne nuten."
9 Nankilij tik ne ilwikak senpa:
"Tay ne Teut kipupujtuk, ma taja inte shikilwi susul!"
10 Uni muchijki yeshpa wan muanki muchi senpa tik ne ilwikak. 11 Wan nemanhachin, né ajsiket yey takat tik ne kal kan ninemituya, ne kisket Kaysarea wan mutitanijket nutech. 12 Ne Ijiutzin nechilwij ma niaw inwan wan ma inte nimajmawi. Ini chikwasen nukniwan nusan walajket nuwan wan tikalakket ichan ne takat. 13 Techilwij ken kitak se tanawatiani ka ichan inak:
"Shitatukti ka Yapo wan shalnutza Shimon ne munutza Pedro. 14 Yaja yawi ina sejse tay ipanpa tiyektias taja wan muchi ne mukal."
15 Kwak nipejki nitanutza, wetzki ne Ijiutzin inhijpak kenha ken wetzki tujpak kwak tipejket. 16 Nikelnamik ne ipajpalabraj ne Tajtzin ken inak: "Yojan tamakak ulyuj iwan at; anmejemet mumakasket ulyuj iwan ne Ijiutzin." 17 Yajika, asu ne Teut kintakulijtuk uni yejemet kenha ken tejemet ká tikyulmatket ne Tajtzin Yeshu Mawaltijtuk, ká naja pal weli nikilwia ne Teut ka inte?
18 Kwak takakket, tentatziwket wan inaket ka wey ne Teut. Inat katka:
—Asu ijkiuni, ne Teut nusan kinmakatuk ne ujukse techan yulpatalis pal ma yujyultuk.
Tik Antiokea
19 Ne musentalujtiwit kwak muchijki ne wey temiktilis ipanpa Estepano ejkuket hasta Poynikia wan Kipre wan Antiokea. Inte tanutzat ipanpa ne palabraj iwan aka, semaya inwan Yudayujmet. 20 Sejse yejemet Kiprechanejket wan Kurenechanejket katka, wan yejemet yajket Antiokea wan tanutzat katka inwan ne Greciajtaketzat nusan pal kinmakat ne yeknawatilis ipanpa ne Tajtzin Yeshu. 21 Ne Tajtzin kinpalewij wan mijmiak ne tayulmatit ká muishkwepket itech ne Tajtzin. 22 Uni ajsik ka itakakilis ne Sennemit tik Yerushalem, wan kituktijket Bar-Naba ma yawi hasta Antiokea. 23 Kwak ajsik ka né wan kitak ne teutasujtalis, pakik wan kintajtan muchi ma nakakan iwan ne Tajtzin iwan muchi inyulu; 24 ika yaja katka se yek takat, tentuk iwan Ijiutzin wan tayulmatilis. Wan mutalilijket ne Tajtzin se wey miaktal.
25 Yaja kisket wan yajki Tarsos kitemua Shaul, 26 wan kwak kiajsik, kalwikak ka Antiokea. Panuket se shiwit ijtik ne sennemit kinmachtiat miak, wan tik Antiokea ne mumachtianimet mutukaytijket achtu wipta Cristianojmet.
27 Tik uni tujtunal walkisket tik Yerushalem wan ajsiket Antiokea taketzanimet. 28 Muketzki se yejemet itukay Hagab wan taneshtij iwan ne Ijiutzin ka yawi witz se wey mayan nujme ne taltikpak. Yaja ne muchijki kwak tatuktia katka tik Roma Claudius. 29 Ne mumachtianimet, sejse ken samawa tay ipal, inaket ka yawit kituktiat tay welit itech ne tekniwan ne muchantiat tik Yudaya. 30 Wan ijkiuni kichijket, wan kititanijket itech ne noymet iwan Bar-Naba wan Shaul.
Ken tamik Herodes
12 Nusan tik uni tujtunal ne tatuktiani Herodes kinhitzkij sejse ipal ne Sennemit pal kinchiwilia tay teyek. 2 Kimiktij Yakob, ne iechkaw Yojan, iwan espadaj. 3 Kwak kitak ka ne Yudayujmet kitat katka yek, kikwij Pedro nusan. Nemituyat ne ilwit kwak te mukwa shukutishti. 4 Wan kwak kipewijtuya kitentzak wan temakak iwan nawi tepewa iwan nawi tasumani ma kipachiwikan. Yaja ina katka ka yawi kalwika iishpan ne techan kwak tami ne Paskwaj. 5 Kitajpiat ne Pedro tik tapachiwilis tel, wan ne Sennemit inte musewia katka kitajtani ne Teut ma kipalewi.
6 Kwak ne Herodes yawia kalwika, uni tayua ne Pedro kuchki ilpituk itzalan ume tasumani iwan ume tepusilpika, wan ume taishpelwiani kipachiwiat itech ne tentzakka. 7 Wan né kiski se tanawatiani ipal ne Tajtzin, wan pejki tatawia tik ne tetzakwiluyan. Kitaski ne iweyka ne Pedro wan kishatij, wan ina:
—Shimuketza talul!
Wan ne tejtepusti tik ne ijimey wetzket talchi. 8 Ne tanawatiani kilwij:
—Shimutali mukwajkwach wan ne mukak.
Kichijki ijkiuni wan kilwia:
—Shimutakenti wan shiwi nuipan.
9 Wan yajki iipan wan kiski, wan te kimati katka ka tejkia tay ne kichijki ne tanawatiani ika mumati katka ka kita nemi se tachialis. 10 Panuket itech ne achtu tapachiwilis wan ne seuk wan ajsiket ne tentzakka ipal tepusti ne kiwika hasta ne techan, wan yajuni mutapuj isel. Wan kisket wan ajsiket se ujti, wan nemanhachin yajki ne tanawatiani ka senkak. 11 Kwak Pedro mumakak cuentaj tay panutuya, inak:
—Ashan nikmati ka ijkia kaltitanij ne Tajtzin ne itanawatiani wan walnechishtij itech ne imey Herodes wan itech muchi tay kielewia ne techan Yudayuj!
12 Kwak mumakatuya cuentaj, yajki ichan Maryam ne inan Yojan ne itzuntukay Marcus, kan ne musenputzujtiwit miak kinutzat ne Teut. 13 Wan kwak kitujtunwij ne tentzakka tik ne tenkal, ajsik se siwapil takaki itukay Rosa, 14 wan kwak kishmatki ne ikupak Pedro, sujsul pakik, wan te kitapuj ne tenkal: kalak mutalua kinhilwia muchi ka Pedro nemituya tik ne tenkal! 15 Yejemet kilwijket:
—Tzunhejekat!
Yaja ina katka ka kia ijkiuni. Yejemet inat katka:
—Anka yaja ikujkul.
16 Ne Pedro kenhayuk tatujtunwij nemik. Kwak kitapujket, kitaket wan ishpuyajket. 17 Yaja kinhishnutzki iwan ne imey ma takaktumet, wan kinhilwij ken ijtuk ka ne Tajtzin kalishtij ijtik ne tetzakwiluyan. Wan inak:
—Shikilwikan Yakob wan ne tekniwan.
Wan kiski wan yajki ka senkak.
18 Kan tatwik, sea kumunik ijtik ne tasumanimet: tay panuk iwan Pedro? 19 Kwak Herodes kitemuj wan te kiajsik, kintajtanilij ne taishpelwianimet, wan tatuktij ma mikikan, wan kiski Yudaya wan ajsik Kaysarea wan nakak ka né. 20 Sujsul kwalanik iwan ne chanejket ipal Tzor wan Tzidon. Yejemet musentepejket wan ajsiket itech. Taketzket iwan Blastos, ne tatuktia tik ne ikuchiluyan ne tatuktiani, wan kinekiket nejmachnemit ika ne intal mutakwaltia katka iwan tay ipal ne tatuktiani.
21 Tik ne tunal talijtuk, ne Herodes kitalij ne ikwajkwach ne tatuktiani wan mutalij ijpak ne tepatznaj wan pejki tanutza ishpan muchi. 22 Ne techan pejki tzajtzi:
—Ká ne taketza se teut, inte se takat!
23 Nemanhachin, kichaluj se tanawatiani ipal ne Tajtzin, ika inte inak ka wey ne Teut, wan mukwepki ijkwichkwajtuk wan mikik.
24 Ne ipalabraj ne Teut weyki wan tepewik. 25 Bar-Naba wan Shaul walmukwepket kwak yekawik ne intekiw tik Yerushalem, wan kiwikaket inwan Yojan ne muilwia Marcus.
Tik Kipre
13 Nemiket tik ne Sennemit tik Antiokea taketzanimet wan tamachtianimet: Bar-Naba, wan Shimon ne muilwia Tiltik, wan Lucius ipal Kurene, wan Menajem ne takutuntuktiani ipal Herodes. 2 Yejemet tekitit katka ipal ne Tajtzin wan kisejseliat katka mayan. Kwakuni ne Ijiutzin inak:
—Shalinkupewakan nupal ne Bar-Naba wan ne Shaul ipal ne intekiw ne ipal nalinnutztuk.
3 Kwakuni, kwak tamiket kisejseliat mayan wan kinujnutzat ne Teut wan kinteuchiwat, kintitanijket.
4 Ijkiuni tel, kwak ne Ijiutzin kintitanij, yajket Seleucia wan ka né kisket tik se barcoj pal yawit Kipre. 5 Wan kwak ajsiket Salamis, pejket tanawatiat ne ipalabraj ne Teut ijtik ne kajkalsennemit ipal ne Yudayujmet. Nusan kipiatuyat Yojan pal tekiti inwan. 6 Kwak panutiwit ijtik muchi ne islaj ipal Kipre hasta ajsiket Papos, kiajsiket se takat Yudayuj ká magoj wan tashijshikuani itukay Bar-Yeshu 7 ká nemituya iwan ne itepalewiani ne tatuktiani, Sergio Pawlo, se takat mumachtijtuk wey. Yajini kalinnutzki Bar-Naba wan Shaul ika kielewij takaki ne ipalabraj ne Teut. 8 Elumas ne magoj (ika ini kineki ina ne itukay) inte kinekituya kinhajkawa, wan mutatemulia katka kishkwepa ne tatuktiani pal inte tayulmati.
9 Shaul, ká nusan yaja itukay katka Pawlo, tentuk iwan ne Ijiutzin, tachishki 10 wan kilwij:
—Ay! Taja titentuk iwan teshijshikulis wan tajtajpewal! Tiikunew ne Tamintuk! Tikneki tikijtakua tay yek! Senpa tikmajmalia ne mejmelawak ujti ipal ne Tajtzin! 11 Wan ashan shikita imey Tajtzin mujpak wan timuchiwas pupuyut. Intea tikitas ne tunal hasta se ratoj.
Wan nemanhachin kiski se icatarataj wan ne itachialis kunyuakiski, wan pejki nejnemi nujme kitemua ká kimakaskia se imey pal kiwika. 12 Kwakuni ne tatuktiani kitak tay panutuk wan tayulmatki, wan ishpuyawik ipanpa ne tamachtilis ipal ne Tajtzin.
Tay inak Pawlo tik Antiokea Pisidia
13 Pawlo wan ne kiyawaluat kalakket tik ne barcoj wan kisket Papos, wan ajsiket Perga tik Panpulia. Yojan kinhajkaw wan mukwepki Yerushalem. 14 Ne sejseuk kisket Perga wan ajsiket ka Antiokea Pisidia. Wan kalakket ijtik ne sennemit tik ne tunal ipal sewilis, wan mutalijket. 15 Kwak tamiket amataketzat tay ina tik ne Tajtuli wan ne Taketzanimet, ne sennemituktianimet tatuktijket intech inat:
—Tukniwan, asu ankipiat tatka pal ankilwiat ne techan pal ankipalewiat, shinakan.
16 Muketzki Pawlo wan taishnutzki iwan ne imey, wan inak:
—Nukniwan ipal Israel wan kitakamatit ne Teut, shitakakikan: 17 ne Teut ipal ini techan ipal Israel kinhishpejpen ne tunoywan, wan kiajkukij ne techan kwak nemik tik Egipto, wan kinhishtij iwan itajpal imajkul, 18 wan kiekuj muchi tay kichiwat anka unpual shiwit tik ne kojtan. 19 Wan kintajkal chikume techan tik ne tal ipal Kanaan ma tikpiakan muchi ini tal tupal, wan techmakak 20 ijtik nawtzunti-unpual-majtakti shiwit, wan tipan kinmakak juejjuezmet hasta ne taketzani Shamuel; 21 wan kwakuni kinekiket se tatuktiani, wan ne Teut kinmakak ne Shaul ikunew Kish, se takat ipal ne tribuj ipal Ben-Yamin, ijtik unpual shiwit; 22 wan kwak kishtij, kiskalij inpal ne Dawid ken tatuktiani wan inak:
"Nikajsituk Dawid ikunew Yeshay, takat ne nikita yek ká kichiwas muchi tay nikelewia."
23 Ne Teut kishtij tik ne ishinach yajuni, ken inatuya ka yawi kichiwa, se tamakishtiani ipal Israel: Yeshu. 24 Yojan tanajnawatij ka yawi witz wan kilwij ne techan ipal Israel ma mumaka ulyuj ipal yulpatalis. 25 Kwak yekawi ne itekiw Yojan, inak:
"Tay ne ankikejketzat ka naja né, inte naja. Yawi witz se nuipan ká naja inte niyek nian pal niksutuma ne ikak."
26 Nukniwan, ijishwiu Abraham wan ne kitakamatit ne Teut ijtik anmejemet, tutech mutuktij ne palabraj ipal ini tamakishtilis, 27 ika ne muchantiat tik Yerushalem wan ne intajtatuktiani inte kishmatket, wan kichijket ma yekawi tay inat ne taketzanimet wan tay amataketzat muchi ne sejsewilis, ika kitenejket, 28 wan melka inte kiajsiket taika mikiskia kitajtanket Pilatus ma kimikti. 29 Kwak kitamijtuyat muchi tay muijkwiluj ipanpa, kikutemultijket wan kitalijket ijtik se shaput. 30 Mikik wan ne Teut kiyulkwiltij, 31 wan ijtik sejse tunal kenhayuk kitaket ne nejnentuyat iwan tik Galilaya wan senyajtuyat Yerushalem, ká ne ashan kineshtiliat ne techan. 32 Wan tejemet timetzinmakat ne yeknawatilis ka ne sentaketzat ne muchijki iwan ne noymet 33 tamik yekawi ipal ne inhijishwiu ika ne Teut kiketzki Yeshu ijkiunisan ken muijkwilujtuk tik ne Salmoj Ume:
"Taja tinukunew, tik ini tunal nimetzpunijtuk."
34 Ika mikik wan kiketzki pal intea mukwepa palani; yajika inak ka:
"Nimetzinmakas ne tay yek ipal Dawid."
35 Neka ina nusan tik ukse salmoj:
"Inte tikajkawas ma pewa palani ne mupal ká yek."
36 Ika kwak Dawid tamik tekiti ipal ne ipunilis, ne Teut kichijki ma kuchi, wan yaja yajki itech inoywan, wan palanik. 37 Ká ne kiyulkwiltij ne Teut inte palanik. 38 Shikmatikan tel, nukniwan, ka ipanpa yajini metzinnawatiliat tetapupulwilis ipanpa tay ankichijtiwit tay teyek, wan tik muchi tay inte welit metzinhilwiat ka nemi yek tay nemi tik ne tajtuli ipal Moshe, 39 muchi ká tayulmatit muilwiat ka nemi yek. 40 Yajika, shiktalikan cuidadoj ma inte ejku anmutech tay inatiwit ijtik ne taketzanimet:
41 "Shikitakan teijilwianit, wan shishpuyawikan wan shipuliwikan! Ika naja nikchiwa se nutekiw tik ini tujtunal wan anmejemet inte tayulmatit melka se metzinneshtilia."
42 Kwak kisket tik ne kalsennemit, pejket mutajtaweliat inwan ma tanutzakan ipanpa ini ne tunal witz ipal sewilis. 43 Kwak tamik musentalua ne sennemit, yajket inwan Pawlo wan Bar-Naba miak ipal ne Yudayujmet wan ne tayulmatit ká walmupatatiwit, wan kinnutzket wan kinhilwijket ma nakakan tik itetasujtalis ne Teut.
44 Ne ukse sewilis, ajatzika muchi ne techan musentepew takaki ne ipalabraj ne Teut. 45 Ne Yudayujmet, kwak kitaket ne miaktal, kwalanket wan kishtenewat katka tay ina Pawlo wan kukujtaketzat, 46 wan ne Pawlo wan ne Bar-Naba tanawatijket melaknaj, inaket:
—Muneki katka achtu ma metzinhilwikan ne ipalabraj ne Teut. Anmejemet inte kinekiket wan anmuilwijket ka inte anhajsit pal ma shiyujyultuk senpa; yajika ashan timuishkweptiwit intech ne tepal tejtechan, 47 ika ijkini techtuktij ne Tajtzin:
"Nimetztalijtuk nikan ma shikintawilu ne tejtechan,
ma shikwika tamakishtilis ka nujme ne tal."
48 Ne tejtechan takakket wan pakiket wan inaket ka wey ne ipalabraj ne Tajtzin, wan tayulmatket muchi ká yawit yujyultuk senpa.
49 Muwikak ne ipalabraj ne Tajtzin nujme uni tal. 50 Ne Yudayujmet kinkumuntijket ne siwatket ne tayulmatit wan yejyek, wan ne achtumet ipal ne techan, wan kichijket ka kiejekujket Pawlo wan Bar-Naba wan kinhishtijket tik uni tal. 51 Yejemet kitzejtzelujket ne tejti tik ne inhijikshi wan yajket ka Ikonion, 52 wan ne mumachtianimet pajpakiket wan mutenket iwan Ijiutzin.
Ne Bibliaj Tik Nawat · © 2008, 2012 Jan Morrow