Beginning
16 Ajsik tik Derbe wan tik Lustra. Wan ikuni nemik se mumachtiani itukay Timoteo, ikunew se yek siwat Yudayuj. Ne iteku se ipal Grecia. 2 Ne tukniwan tik Lustra wan Ikonion taketzat katka yek ipanpa. 3 Yaja ká kinekik ne Pawlo ma yawi iwan pashalua. Wan kikwij wan kiyawaltek, ipanpa ne Yudayujmet ne nemituyat ka nepa; ika muchi kimatit katka ka ne iteku ipal Grecia. 4 Panuket yajket tik ne tejtechan wan nujme kinmakat pal tajpiat ne tajtatuktilis ken inatiwit ne tijtitanijtuk wan noymet tik Yerushalem. 5 Wan kiane, ne sejsennemit pejket chikawayat iwan tayulmatilis, wan nusan tepewit ne tayulmatit mujmusta.
6 Panuket ijtik Prugia wan ne tal ipal Galatia, wan ne Ijiutzin inte kinhajkaw tanutzat ne palabraj ijtik Asia. 7 Kwak ajsiket hasta Musia, kinekituyat pashalua ijtik Bitunia wan ne Iijiutzin Yeshu inte kinhajkaw. 8 Kwak panutiwit tik Musia temuket ka Troyas, 9 wan ne tayua kiski se tachialis iishpan Pawlo: walnesik se ipal Macedonia mutajtawelia iwan wan kilwia:
—Shaltemu hasta Macedonia titechpalewia.
10 Kwak tamik kita ne tachialis, tikisket nemanha pal tiawit Macedonia, ika tikmatit ka ne Teut waltechnutztuk pal ma tikinmakakan ne yeknawatilis.
11 Tiajkewket Troyas wan tiajsiket melaknaj ka Samotrakia, wan ne ukse tunal tiajket ka Yankwik Techan. 12 Tikisket ka né wan tiajket Pilipoy, yaja ne achtu techan tik ne tal ipal Macedonia wan se coloniaj. Tinakaket ankakeski tunal tik uni techan.
13 Wan tik ne tunal ipal sewilis tikisket tatenpan ne techan itech ne apan kanka tikmatit ka yawi nemi teutajtanilis, wan timutalijket wan tipejket titajtaketzat wan ne siwatket ne ajsitiwit ka né, 14 wan techkakik se siwat ipal ne techan ipal Tuateyra, se kinamaka kwajkwachti galantzin, ká kiyulmati ne Teut. Ne Tajtzin kipeluj ne iyulu ma takaki nejnejmach muchi tay ne tanutza nemi katka ne Pawlo. 15 Kwak yaja mumakak ulyuj wan muchi ne ikal, mutajtawelij ina:
—Asu anhinat ka naja nikyulmati ne Tajtzin, shikalakikan ka nuchan wan shinakakan.
Wan te kinekik ma tikisakan.
16 Kwakuni, kwak tiajsit ka teutajtanilis, se siwapil ká kipiatuya ne iijiu se pitonkuat technamik. Yaja kichiwa katka wey itekiw ipal ne itejtekuyu ika tamati katka tay yawi panu. 17 Yajuni nejnemi katka ipan ne Pawlo wan tuipan, tzajtzi yawi:
—Ini takamet wan siwatket itejtekitini ne Wejkapan Teut! Yejemet metzinnawatiat ne ujti ipal tamakishtilis.
18 Kichijki yajki ijkiuni miak tunal. Mukakasuj Pawlo wan muishkwepki kita ne nawal, wan inak:
—Nimetztuktia tik itukay Yeshu Mawaltijtuk ma shalkisa itech!
Wan walkiski tik uni horaj.
19 Kwak ne itejtekuyu kitaket ka intea welit tejchiat kichiwat tatka iwan ne siwat, kitzkijket Pawlo wan Shila wan kintilanket hasta ne tiankis wan ishpan ne weymet, 20 wan kalinwikaket itech ne tatuktianimet, wan inaket:
—Ini takamet kikakasujtiwit tutechan. Yejemet Yudayujmet, 21 wan tanawatiat ma muchiwa ken ne inte nemi pal timuwikat ika tejemet tiipal Roma.
22 Wan muchi kintenejket, wan ne tatuktianimet kikelunket muchi ne inkwajkwach wan tatuktijket kinmakat iwan kwajkwawit, 23 wan kwak tamiket kinwitekit, kintzakket wan kituktijket ne taishpelwiani ipal ne tetzakwiluyan ma kintajpia sujsul yek. 24 Yajuni, kwak kituktijket kiane, kinkalaktij kalijtik wan kinhikshiilpij itech kwawit.
25 Ka tajkuyua, Pawlo wan Shila pejket kinutzat ne Teut wan takwikat, wan ne sejseuk ijilpituk kinkakit. 26 Kwakuni sea ulinik ne tetzakwiluyan, wan mutapujket nemanha muchi ne tejtentzakka wan musutunket muchi ne ijilpika. 27 Walisak ne taishpelwiani wan kwak kitak ne tejtentzakka ipal ne tetzakwiluyan tajtapujtuk, kishtij ne iespadaj wan kinekituya mumiktia, ika yaja kikejketza ka chulujtiwit ne ijilpituk. 28 Ne Pawlo tzajtzik wey wan inak:
—Maka shimuchiwili tatka, ka nikan tinemit muchi!
29 Kitajtan se tawil wan kalak mutalua wan ijtzilikak walaj wan wetzki talchi itech Pawlo wan Shila, 30 wan kinwikak tatenpan wan inak:
—Tajtzitzinmet, tay nemi pal nikchiwa pal nimupalewia?
31 Yejemet inaket:
—Shikyulmati ne Tajtzin Yeshu wan tiaw timupalewia wan ne mukal nusan.
32 Wan tanutzket ne ipalabraj ne Tajtzin iwan yaja wan muchi tik ne ikal, 33 wan kalinkwij iwan tik uni horaj ka tayua wan kiapakak ne inchijchiraj; wan mumakak ulyuj yaja wan muchi ne imiakwan nemanha. 34 Wan kinwikak ka ichan, wan kintalilij pal takwat, wan pakik iwan muchi ka ichan wan kiyulmati ne Teut.
35 Kwak tatwik, ne tatuktianimet kintitanijket ne alguacilmet. Inat:
—Shikinchulultikan uni takamet.
36 Ne taishpelwiani ipal ne tetzakwiluyan kilwij uni ne Pawlo:
—Ne tatuktianimet techtuktijtiwit timetzinchulultiat. Ashan tel shumet wan shinemikan yek.
37 Ne Pawlo kinhilwij:
—Techwitektiwit ishpan muchi ne techan wan te inatiwit tay tikchijtiwit teyek, melka tiipal Roma tejemet, wan techtzaktiwit, wan ashan techishtiat ichtaka? Inte! Ma wikikan yejemet waltechkwit!
38 Ne alguacilmet kinhilwijket ne tatuktianimet tay inaket. Mumutijket kwak takakket ka yejemet ipal Roma, 39 wan ajsiket wan mutajtawelijket inwan, wan kinhishtijket wan kintajtanket ma kiajkawakan ne techan.
40 Kwak kisket tik ne tetzakwiluyan, yajket ichan Ludia, wan kwak kitaket, kinpalewijket ne tukniwan, wan yajket.
Tik Tesalonika
17 Kisket pashaluat tik Anpipolis wan Apolonia wan ajsiket Tesalonika, kan ne nemituya se kalsennemit ipal ne Yudayujmet. 2 Ken kichiwa katka ne Pawlo, kalak ka né wan tik yey sewilis kikwij ne tay nemi ijkwilujtuk pal tajtaketza inwan 3 wan taneshtia wan tailwitia ka ne Mawaltijtuk nemituya pal taekua wan pal muketza kwak miktuk, wan ka:
—Yajasan ne Mawaltijtuk, ne Yeshu ká naja nimetzinhilwia.
4 Wan ankakeski pal yejemet kiyulmatket wan muchijket ikunpalejwan Pawlo wan Shila, wan miak ipal Grecia ká takamatit ne Teut nusan, wan ipal ne siwatket wey inte chiupi.
5 Kwalanket ne Yudayujmet, wan kinnutzket sejse takamet ipal ne tiankis ká inte yejyek, wan kisentepejket miak gentej wan kikumuntijket ne techan. Wan ajsiket ne ikal Yason kintemuat pal kinwikat ishpan ne techan. 6 Kwak inte kinhajsiket, kitilanket Yason wan sejse pal ne tukniwan itech ne techantatuktianimet wan tzajtzit ka:
—Yejemet kishtapachujtiwit muchi ne talmet wan nikan nusan walajket, 7 wan Yason kinkwijtuk tik ne ikal. Wan muchi yejemet kichiwat ken tatuktij ne Taltikpaktuktiani ma inte muchiwa, wan inat ka nemi ukse tatuktiani: Yeshu.
8 Kinkakasujket muchi, wan nusan ne techantatuktianimet, kwak takakket ini, 9 wan kwak kikwijtiwita tumin itech ne Yason wan ne sejseuk, kinsutunket.
Tik Beroya
10 Ne tukniwan kintuktijket Pawlo wan Shila nemanha ka tayua hasta Beroya. Kwak ajsiket ka né, yajket tik ne kalsennemit ipal ne Yudayujmet. 11 Yejemet mas yejyek katka que ne Yudayujmet ipal Tesalonika. Kikwijket ne palabraj iwan taelewilis wan mujmusta kipepetat katka tay nemi ijkwilujtuk pal kitat asu ijkiuni. 12 Yajika miak tayulmatket, hasta sejse ipal ne yejyek siwat ipal Grecia wan ankakeski ukich nusan.
13 Kwak ne Yudayujmet ipal Tesalonika kimatket ka nusan tanawatia nemi ne Pawlo tik Beroya ne ipalabraj ne Teut, nusan ikuni ajsiket tatzejtzeluat wan takakasuat. 14 Kwakuni ne tukniwan kishtijket ne Pawlo nemanha itech ne weyat. Walnakaket ne Shila wan ne Timoteo kan nemituyat. 15 Kiwikaket ne Pawlo ka Atenas wan mukwepket iwan ne tatuktilis ipal Shila wan Timoteo ma ijisiwikan witzet.
Tik Atenas
16 Kan yaja kinchia nemi tik Atenas, mukwalantij iyulu kwak tachia ken nemituya ne techan tentuk tentuk iwan teujteutzitzin. 17 Yajika yaja tajtaketza iwan ne Yudayujmet tik ne kalsennemit, wan iwan ne tayulmatit, wan tik ne tiankis iwan muchi ká iwan munamiki mujmusta. 18 Nusan sejse filosofoj ipal Epikuro wan pal ne Tenkaltakamet kinamikket. Wan inat katka sejse:
—Tesu kimati tay pupuluka yajini!
Wan sejseuk:
—Muita ka yaja se tanawatia najnawal ejkunimet.
Ika yaja tamaka nemi ne yeknawatilis ipal ne Yeshu wan ken muyulkwepki. 19 Kitzkijket wan kiwikaket ka Arestepet, inat:
—Tiwelit tikmatit katiawel uni yankwik tamachtilis tay titanutza? 20 Ika talwika se yankwik tik ne tutakakilis wan tiknekiskiat tikmatit tay kineki ina.
21 (Muchi ne Atenaschanejket wan ne ejkunimet semaya uni kichiwat nemit katka: inat o takakit sejse yankwik.)
22 Pawlo nakak ejkatuk tatajku ne Arestepet wan inak:
—Nukniwan ipal Atenas: nikita ka ijtik muchi ankipiat wey teumatilis. 23 Kwak niajki nitajtachia wan nimetzinhitak mutankwaketzat, nusan nikajsik se tepatznaj kan nemi tawawasujtuk: "Ipal ne Teut ne Inte Tikishmatit". Yek, tay ne inte ankishmatit, yajaya nimetzinneshtilia.
24 Ne Teut ne kichijki ne taltikpak wan muchi tay nemi ijtik yaja, ká ne itekuyu ne ilwikak wan ne tal, inte muchantia tik teujteupantzitzin tay ne tujtumey kichijtiwit. 25 Nusan inte welit kipajtiat ne inmejmey takamet ika inte muneki tatka Yaja ká kinmaka muchi ne yulkwilis wan muchi tay kipiat.
26 Wan itech sesan kishtij muchi ne tejtechan pal muchantiat nujme ne tal. Yajaya tatuktijtuk ne tujtunal pal tinemit wan ne ijishku ipal ne tumuchantilis, 27 ma kitemukan ne Teut melka semaya kichijchimit yawit, wan ma kiajsikan. Yaja inte nemi wejka kan tinemit, 28 ika ijtik Yaja timuyulkwit wan timukekelutzat wan tinemit. Ken nusan inatiwit sejse pal ne anmutajtakwikani: "ika nusan itech tinestiwit".
29 Yajika, asu tinestiwit itech ne Teut, ma inte tikejketzakan ka ne Teut kenha ken se takutun teukwit, nian tumin, nian tet, wawasujtuk iwan artej ken weli ne iyulu takamet.
30 Ikman melka ne tukniwan inte kimatit tatka, ne Teut inak ka yek nemi. Ashan kintuktia muchi ne takamet wan siwatket nujme ma muyulpatakan, 31 ika kitalijtuk se tunal kwak yawi muita tay tikchijtiwit muchi, ne yek wan ne inteyek, itech se takat ne Yaja kituktijtuk, wan pal kintalilia tayulmatilis muchi kiyulkwiltijtuk kwak miktuk.
32 Kwak takakket ka muyulkwij kwak miktuk, sejse ajkawetzkat katka, wan sejse inaket:
—San timetzkakisket ukse tunal ipanpa uni.
33 Ijkiuni ne Pawlo kinhajkaw. 34 Ankakeski takat musalujket itech wan tayulmatket. Ijtik yejemet nemituyat Dionusio ipal Arestepet wan se siwat itukay Damaris wan sejseuk inwan.
Ne Bibliaj Tik Nawat · © 2008, 2012 Jan Morrow