◀ All Reading Plans / Revised Common Lectionary (Semicontinuous) / Psalm 22:1-15 (Why have you forsaken me?); Job 18:1-21 (Bildad’s second speech); Hebrews 4:1-11 (The rest that God promised) (Awadhi Bible: Easy-to-Read Version)

Prev Day

October 11, 2024

Next Day

Use the calendar to view readings from this devotional.

October 2024
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

Revised Common Lectionary (Semicontinuous)

Daily Bible readings that follow the church liturgical year, with sequential stories told across multiple weeks.

Duration: 1245 days

भजन संहिता 22:1-15

प्रभात क हरिणी नाउँ क राग पइ संगीत निर्देसक बरे दाऊद क एक ठु भजन।

¹हे मोरे परमेस्सर, हे मोरे परमेस्सर, तू मोका काहे तजि दिहा ह?
    मोका बचावइ बरे तू काहे बहोतइ दूर अहा?
    मोर मदद क पुकार क सुनइ बरे तू बहोतइ दूर अहा।
²हे मोरे परमेस्सर, मइँ तोहका दिन मँ पुकारेउँ
    मुला तू जवाब नाहीं दिहा,
अउर मइँ राति भर तोहका पुकारत रहेउँ।

³हे परमेस्सर, तू पवित्तर अहा।
    तू राजा क नाई बिराजमान अहा।
    इस्राएल क स्तुतियन तोहार सिंहासन अहइ।
⁴हमार पुरखन तोह पइ बिस्सास किहन।
    हाँ हे परमेस्सर उ पचे तोहार भरोसा रहेन।
    अउर तू ओनका बचाए रह्या।
⁵हे परमेस्सर, हमार पुरखन तोहका मदद क गोहराएन अउर उ पचे आपन दुस्मनन स बच निकरेन।
    उ पचे तोह पइ बिस्सास किहन अउर उ पचे निरास नाहीं भएन।
⁶तउ का मइँ फुरइ कउनो कीरा हउँ,
    जउन लोग मोहसे लज्जित भए बाटेन अउर मोहसे घिना करत हीं?
⁷जउन भी मोका लखत ह मोर हँसी उड़ावत ह,
    उ पचे आपन मूड़ँ हलावत अउ आपन ओंठ बिरावत हीं।
⁸उ पचे मोसे कहत हीं कि, “आपन रच्छा बरे तू यहोवा क गोहँराइँ सकत ह।
    उ तोहका बचाइ लेइ।
    अगर तू ओका ऍतना भावत ह तउ, निहचय ही उ तोहका बचाइ लेइ।”

⁹हे परमेस्सर फुरइ तउ इ अहइ कि सिरिफ तू ही अहा जेकरे ऊपर मइँ निर्भर हउँ।
    तू मोका उ दिन स संभालया ह, जब स मोर जन्म भवा।
    तू ही अहा जेकर कारण स मइँ बच्पन स बिस्सास किहेउँ।
¹⁰ठीक उहइ दिना स जब स मइँ जन्म लिहेउँ ह, तू मोर परमेस्सर रह्या ह।
    जइसे ही मइँ आपन महतारी क कोख स बाहेर आए रहेउँ, मोका तोहरी देखरेख मँ रख दीन्ह ग रहा।

¹¹तउ हे, परमेस्सर! मोका जिन बिसरि जा,
    संकट निअरे बाटइ, अउर कउनो भी मनई मोर मदद क नाहीं अहइ।
¹²मइँ ओन लोगन स घिरा अहउँ,
    जउन सक्तीसाली साँड़न जइसे मोका घेरे भए अहइँ।
¹³उ पचे ओन सिंहन जइसे अहइँ, जउन कउनो जन्तु क चीरत होइँ अउ दहाड़त होइँ
    अउर ओनकर मुँह विकराल खुला भवा होइँ।

¹⁴मोर सक्ती धरती पइ बिखरे जल
    स लुप्त होइ गइ।
मोर हाड़न अलगाइ ग अहइँ।
    मोर साहस खतम होइ चुका अहइ।
¹⁵मोर मुँह एक पुराना टूटा भवा बर्तन क टूका क नाईं सूख गवा अहइ।
    मोर जीभ आपन ही तालु स चिपकत अहइ।
    तू मोका कब्र क धूरि मँ डार दिहा ह।

अय्यूब 18

अय्यूब क बिल्दद क जवाब

18 फिन सूहू प्रदेस क बिल्दद जवाब देत भए कहेस।

²“अय्यूब, इ तरह क बातन करब तू कब तज देब्या?
    तोहका चुप रहइ चाही अउर सुनइ चाही, सिरिफ तब ही हम कहि सकित ह।
³तू काहे इ सोचत ह कि हम ओतँना मूरख अही
    जेतना मूरख एक ठु बर्धा होत ह?
⁴अय्यूब, तू आपन किरोध स आपन ही नोस्कान करत अहा।
    का लोग भुइँया बस तोहरे बरे तजि देइँ?
    का तु इ सोचत अहा कि बस तोहका तृप्त करइ क परमेस्सर धरती क हलाइ देई?

⁵“हाँ, बुरा मनई क प्रकास बुझी
    अउर ओकर आगी क लौ न चमकी।
⁶ओकरे घरे क प्रकास करिया पड़ि जाइ
    अउर जउन दिया ओकरे लगे अहइ उ बुझ जाइ।
⁷सक्तीसाली मनई क कदम धीमे स बढ़त ह।
    आपन ही बुरा जोजनन स उ पतन क झेलब्या।
⁸ओकर आपन ही कदम ओका एक जाल क फंदा मँ गिराए देइहीं।
    उ चलिके जालि मँ जाई अउर फँस जाई।
⁹कउनो जाल ओकर एड़ी क पकड़िके धइ लेइ।
    एक ठु जाल ओका कसिके जकर लेइ।
¹⁰एक रस्सा ओकरे बरे धरती मँ छुपा रही।
    कछू फंदा ओकरे राहे मँ झुठ बोलब्या।
¹¹ओकरे चारिहुँ कइँती सबहिं आतंक होइ।
    ओकर हर कदम क डर पाछा करत रही।
¹²खुउफनाक मुसीबतन ओकरे बरे भुखान होइँ।
    जब उ गिरी, विध्वंस ओकरे बरे तइयार रहहीं।
¹³महा बियाधि ओकरे चमड़ी क हींसन क लील जाई।
    उ ओकरे बाँहिन अउ ओकर हँड्डियन क सड़ाइ देइ।
¹⁴आपन घरे सुरच्छा स दुट्ठ व्यक्ती क दूर कीन्ह जाइ।
    आतंक क राजा क लगे ओका लइ जावा जाइ।
¹⁵ओकरे घरे मँ तब तलक कछू भी न बची
    जब तलक ओकरे सचमुच घरे मँ धधकत भइ गन्धक बिखेरी जाइ।
¹⁶ओकरे खाले गइ भइ जड़न झुराइ जइहीं
    अउर ओकरे ऊपर क डारन मुरझाइ जइहीं।
¹⁷धरती क लोग ओका याद नाहीं करिहीं।
    बस अब कउनो भी ओका याद नाहीं करी।
¹⁸प्रकास स ओका हटाइ दीन्ह जाइ अउर उ अँधियारा मँ ढकेला जाइ।
    उ पचे ओका दुनिया स दूर भगाए देइहीं।
¹⁹ओकर कउनो गदेलन अउ सन्तानन नाहीं होइहीं।
    ओकरे घरे मँ कउनो जिअत नाहीं बची।
²⁰पच्छिम क लोग सहमा रहि जइहीं जब उ पचे जानिहीं कि उ दुट्ठ मनइयन क संग का घटेस ह।
    पूरब मँ लोग आतंकित होइके सन्न रहि जइहीं।
²¹फुरइ दुर्जन व्यक्ति क घरे क संग अइसा ही घटी।
    अइसा ही घटी उ मनई जउन परमेस्सर क नाहीं जानतेन।”

इब्रनियन 4:1-11

4 अतः जब ओकरे बिस्राम मँ प्रवेस क प्रतिज्ञा अब तलक बीन भइ बाटइ तउ हमका सावधान रहइ चाही कि तोहरे म स कउनउ अनुपयुक्त सिद्ध न होइ। ²काहेकि हमकउ ओनही क समान सुसमाचार क उपदेस दीन्ह गवा बा। मुला जउन उपदेस ओ पचे सुनेन ह, उ ओनके बरे बेकार बा। काहेकि उ पचे जब ओका सुनेन तउ एका बिसवास क साथे धारण नाहीं किहेन। ³अब देखा, हम तउ जउन बिसवासी अही ओह बिस्राम मँ प्रवेस पाए अही। जइसेन कि परमेस्सर कहे भी बाटइः

“क्रोध मँ मइँ इही स तब सपथ लइके कहे रहेउँ,
‘इ पचे कबहुँ बिस्रामे मँ मोरे नाहीं सामिल होइहीं।’” ^(A)

जब संसार क सृस्टी करइ क बाद ओकर काम पूरा होइ गवा रहा। ⁴उ सतवाँ दिना क सम्बन्ध मँ एन सब्दन मँ कहूँ पवित्तर सात्तरन मँ कहा बाटइ “अउर फिन सतवें दिना आपन सभन कामन स परमेस्सर तउ बिस्राम लिहेस।”^(B) ⁵अउर फिन उपरोक्त सन्दर्भ मँ भी उ कहत ह, “उ पचे कबहुँ बिस्राम मँ मोर न सामिल होइहीं।”

⁶जेनका पहिले सुसमाचार सुनावा गवा रहा आपन अनाज्ञाकारिता क कारण उ तउ बिस्राम मँ प्रवेस नाहीं पाइ सकेन मुला अउरन क बरे बिस्राम क दुवार अबऊ खुला बा। ⁷इही बरे परमेस्सर तउ फिन एक बिसेस दिन निस्चित किहेस अउर ओका नाउँ दिहेस, “आजु” कछू बरसन क बाद दाऊद क द्वारा परमेस्सर तउ उ दिन क बारे मँ पवित्तर सास्तर मँ बताए रहा। जेकर उल्लेख हम अबहीं किहे रहेः

“आज अगर ओकर सुना आवाज,
न करा आपन हिरदय क जड़।” ^(C)

⁸अतः अगर यहोसु ओनका बिस्रामे मँ लइ गवा होत तउ परमेस्सर बाद मँ कउनउ अउर दिना क बारे मँ न बतउतइ। ⁹तउ खैर जउन भी होइ परमेस्सर क भक्तन क बरे एक वइसी बिस्रन्ति रहत अहइ जइसेन बिस्रान्ति सातवें दिना परमेस्सर क रही। ¹⁰काहेकि जउन कउनो परमेस्सर क बिस्रान्ति मँ प्रवेस करत ह, अपने करमन स बिस्रान्ति पाइ जात ह। वइसेन ही जइसेन परमेस्सर तउ अपने करमन स बिस्रान्ति पाइ लिहेस। ¹¹तउ आवा हमहूँ ओह बिस्रान्ति मँ प्रवेस पावइ क बरे हर एक प्रयत्त करीं। ताकि ओकर अनाज्ञाकारिता क उदाहरण क करत भए कउनो क पतन न होइ।

Awadhi Bible: Easy-to-Read Version (ERV-AWA)