Revised Common Lectionary (Semicontinuous)

⁸ मइँ दूर चला जाब
    अउर इ बिपत्ति क आँधी स बचिके दूर भाग जाब।
⁹ हे मोर सुआमी, हवाँ सहर मँ मतभेद अउर हिंसा अहइ।
    ओनके झूठन क रोका जउन मतभेद का कारण अहइँ।
¹⁰ बाहेर दिन अउर रात इ सहर ओन स घेरे अहइ,
    अउर अन्दर मँ हुवाँ परेसानियन अउर अपराधन अहइँ।
¹¹ गलियन मँ बहोत जियादा अपराध फइलत अहइ।
    हर कहूँ लोग झूठ बोलिके छलत अहइँ।

¹² जदि इ मोर दुस्मन होत
    अउर मोका नीचा देखाँवत तउ मइँ ऍका सहि लेतेउँ।
अगर इ सबइ मोर दुस्मन होतेन,
    अउर मोह पइ वार करतेन तउ मइँ छिप सकत रहेउँ।
¹³ ओ। मोरे संगी, मोरे हमजोली, मोरे मीत, इ मगर तू अहा
    अउर तू ही मोका कस्ट पहोंचावत अहा।
¹⁴ हम आपुस मँ गुप्त बातन बाँटे रहेन।
    हम परमेस्सर क मन्दिर मँ साथ-साथ उपासना कीन्ह।

¹⁵ कास कउनो दुस्मन आपन समइ स पहिले ही मरि जाइँ।
    कास ओनका जिअत ही गाड़ दीन्ह जाइ,
    काहेकि उ पचे आपन घरन मँ अइसे भयानक कुचक्र रचा करत हीं।

⁷ “अय्यूब, का तू सोचत ह कि जन्म लेइवाला पहिला मनई तू ही अहा
    अउर पहाड़न क रचना स पहिले तोहार जन्म भवा रहा।
⁸ का तू परमेस्सर क रहस्य स भरी सबइ जोजना क सुने रहया?
    का तू सोचत ह कि तू बुद्धिमान अहा?
⁹ अय्यूब, तू हम पचन स जियादा कछू नाहीं जानत अहा।
    उ सबइ बातन हम पचन समझत अही, जेनकर तोहका समुझ अहइ।
¹⁰ उ सबइ लोग जेनकर बार उज्जर अहइँ अउर बुढ़वा मनई अहइ उ पचे हम स सहमत रहत हीं।
    हाँ, तोहरे बाप स भी बुढ़वा लोग हमरे समर्थन मँ अहइँ।
¹¹ परमेस्सर तोहका सुख देइ क जतन करत ह।
    अउर तोहमा नर्मी स बात करत ह।
    का इ तोहरे बरे काफी नाहीं अहइ? मुला तू सोचत अहा कि तोहर बरे काफी नाहीं अहइ।
¹² अय्यूब, तू काहे नाहीं समुझब्या?
    तू सच्चाइ क काहे नाहीं लखइ सकब्या?
¹³ जब कभी तू इ तरह बोलत ह
    तू परमेस्सर क खिलाफ होत ह।

¹⁴ “फुरइ कउनो मनई सुद्ध नाहीं होइ सकत।
    मरनसील मनई नीक नाहीं होइ सकत ह।
¹⁵ हिआँ तलक कि परमेस्सर आपन दूतन तलक पइ भी निभर नाही रहत ह।
    हिआँ तलक कि सरग भी परमेस्सर क अपेच्छा सुद्ध नाही अहइ।
¹⁶ मानव जाति बहोत जियादा पापी
    अउर भ्रस्ट अहइँ।
    उ बुराई क पानी क तरह गटक जात ह।

¹⁷ “अय्यूब, मोरी बात सुना अउर मइँ ओकर व्याख्या तोहसे करब।
    मइँ तोहका बताउब, जउन मइँ जानत हउँ।
¹⁸ मइँ तोहका उ सहइ बतउब्या जउन बुद्धिमान मनई बतउब्या।
    उ पचे एन बातन क आपन पूरखन स सुनेस ह
    अउर ओनका छिपाइ बिना बताएस।
¹⁹ सिरिफ ओनकर पूरखन क ही भुइँया दीन्ह गवा रहा।
    ओनकर देस मँ कउनो परदेसी नाहीं रहा।
²⁰ दुट्ठ मनई जिन्नगी भइ पीरा झेली।
    एक क्रूर मनई ओन सबहिं बरिसन मँ जउन ओकरे बरे निहचित कीन्ह ग अहइँ, दुःख भोगत रही।
²¹ ओकरे कानन मँ भयंकर ध्वनियन होत रइहीं।
    जब उ सोची उ सुरच्छित अहइ तबहीं ओकर दुस्मन ओह पइ हमला करिहीं।
²² दुट्ठ मनई कउनो आसा नाहीं अहइ कि उ आँधियारा बचिके निकरि पावइ।
    कहुँ एक अइसी तरवार अहइ जउन ओका मार डावइ क इन्तज़ार करत अहइ।
²³ उ एँह कइँती ओह कइँती भटकत भवा फिरत ह मुला ओकर देह गीधन क चारा बनि जाइ।
    ओका इ पता अहइ कि ओकर मउत बहोत निचके अहइ।
²⁴ चिन्ता अउ यातना ओका डरपोक बनावत हीं।
    इ सबइ बातन ओह पइ अइसे वार करत हीं जइसे कउनो राजा जुद्ध करइ बरे तइयार होत ही।
²⁵ काहेकि दुट्ठ मनई परमेस्सर क हुकुम मनइ स इन्कार करत ह
    अउर सर्वसक्तीमान क नज़र-अन्दाज़ करत ह।
²⁶ उ दुट्ठ मनई बहोत हठी अहइ।
    उ परमेस्सर क खिलाफ लड़इ चाहत ह, सोचत अहा कि उ मजबूत ढाल स ओका हराइ सकत ह।
²⁷ दुट्ठ मनई बहोत क मुँहे पइ चर्बी चढ़ी रहत ह।
ओकर कमर माँस भर जाइ स मोटवार होइ जात ह।
²⁸     मुला उ उजाड़ सहरन मँ रही।
उ अइसे घरन मँ रही जहाँ कउनो नाहीं रहत ह।
    ओकर घरन हाली ही रौंदा जइहीं।
²⁹ दुट्ठ मनई जियादा समइ तलक धनी नाहीं रही।
    ओनकर भाग्य क धरती पइ
    स्थित रुप मँ ठहरवा नाहीं जाब्य़ा।
³⁰ दुट्ठ मनई अँधियारा स न बच पाई।
    उ उ बृच्छ क नाई होइ जेकर सबइ डारन आगी स झउँस गइ अहइँ।
    परमेस्सर क साँस दुट्ठन क उड़ाइ देइ।
³¹ दुट्ठ लोग बेकार क चिजियन क भरोसे रहिके आपन क मुरख न बनावइँ
    काहेकि ओका कछू प्राप्त न होइ पाई।
³² दुट्ठ मनई समइ स पहिले ही मरि जाब।
    उ पचे उ बृच्छ क नाई होइ जाइ जेकर चोटी क डारन मरि गवा ह।
³³ दुट्ठ मनई उ अंगूरे क बेल क नाई होत ह जेकर फल पाकइ स पहिले ही झरि जात हीं।
    अइसा मनई जइतून क बृच्छ क नाई होत ह, जेकर फूल सारि जात हीं।
³⁴ काहेकि परमेस्सर क बगइर लोग खाली हाथ रहहीं।
    अइसे लोग जेनका पइसन स पियार अहइ, घूस लेत हीं।
    ओनकर घर आगी स नस्ट होइ जइहीं।
³⁵ उ पचे मूसिबत क कुचक्र रचत हीं अउर बुरे करम करत हीं।
    उ पचे लोगन क छलइ क तरकीब क जोजना बनावत हीं।”