Revised Common Lectionary (Semicontinuous)

⁸ मइँ दूर चला जाब
    अउर इ बिपत्ति क आँधी स बचिके दूर भाग जाब।
⁹ हे मोर सुआमी, हवाँ सहर मँ मतभेद अउर हिंसा अहइ।
    ओनके झूठन क रोका जउन मतभेद का कारण अहइँ।
¹⁰ बाहेर दिन अउर रात इ सहर ओन स घेरे अहइ,
    अउर अन्दर मँ हुवाँ परेसानियन अउर अपराधन अहइँ।
¹¹ गलियन मँ बहोत जियादा अपराध फइलत अहइ।
    हर कहूँ लोग झूठ बोलिके छलत अहइँ।

¹² जदि इ मोर दुस्मन होत
    अउर मोका नीचा देखाँवत तउ मइँ ऍका सहि लेतेउँ।
अगर इ सबइ मोर दुस्मन होतेन,
    अउर मोह पइ वार करतेन तउ मइँ छिप सकत रहेउँ।
¹³ ओ। मोरे संगी, मोरे हमजोली, मोरे मीत, इ मगर तू अहा
    अउर तू ही मोका कस्ट पहोंचावत अहा।
¹⁴ हम आपुस मँ गुप्त बातन बाँटे रहेन।
    हम परमेस्सर क मन्दिर मँ साथ-साथ उपासना कीन्ह।

¹⁵ कास कउनो दुस्मन आपन समइ स पहिले ही मरि जाइँ।
    कास ओनका जिअत ही गाड़ दीन्ह जाइ,
    काहेकि उ पचे आपन घरन मँ अइसे भयानक कुचक्र रचा करत हीं।

⁸ “ओन बुढ़वा लोगन स पूछा
    अउर पता करा कि ओनकर पुरखन क सीखे रहेन।
⁹ काहेकि अइसा लागत ह जइसा कि हम तउ बस काल्ह ही पइदा भएन ह,
    हम कछू नाहीं जानित।
    परछाई क तरह हमार उमर भुइँया पइ बहोत छोट क अहइ।
¹⁰ होइ सकत ह कि बूढ़वा लोग तोहका कूछ सिखाइ सकइँ।
    होइ सकत ह जउन उ पचे सीखेन ह उ पचे मोका सिखाइ सकइँ।”

¹¹ बिलदद कहेस, “का भोजपत्र क बृच्छ दलदल भुइँया क इलावा कहुँ बढ़ सकत ह
    का नरकट बे पानी क बाढ़ि सकत ह?
¹² नाहीं, अगर पानी झुराइ जात ह तउ उ पचे भी मुरझाइ जइहीं।
    ओनका काटा जाइ जोग्ग काटिके काम मँ लिआवइ क उ पचे बहोत छोट रहि जइहीं।
¹³ उ मनई जउन परमेस्सर क बिसारि जात ह, नरकट क तरह होत ह।
    उ मनई जउन परमेस्सर क बिसारि जात ह ओकरे बरे कउनो आसा नाहीं अहइ।
¹⁴ उ मनई क बिस्सास बहोत दुर्बल होत ह।
    उ मनई मकड़ी क जाला क सहारे रहत ह।
¹⁵ अगर कउनो मनई मकड़ी क जाले क सहारा लेत ह,
    इ टुटि जाइ।
अगर उ मकड़ी क जाल क पकरत ह,
    इ नस्ट होइ जाइ।
¹⁶ उ मनई उ पौधे क नाई अहइ जेकरे लगे पानी अउ सूरज क रोसनी बहोतइ अहइ।
    ओकर डारियन बगिया मँ हर कइँती सँचरत हीं।
¹⁷ उ पाथर क टीला क चारिहुँ कइँती आपन जड़न क फइलावत ह
    अउ चटटान मँ जमइ बरे कउनो ठउर हेरत ह।
¹⁸ जब पौधा आपन जगह स उखाड़ दीन्ह जात ह,
    तउ कउनो भि नाहीं जान पात ह कि हुआँ कबहुँ कउनो पौधा रहा।
¹⁹ मुला उ पौधा हुआँ खुस रहा,
    अब दूसर पउधन हुआँ जमिहीं, जहाँ कबहुँ उ पउधा रहा।
²⁰ मुला परमेस्सर कबहुँ भी निर्दोख मनई का नाहीं तजी
    अउर उ बुरे मनई क सहारा नाहीं देइ।
²¹ अबहुँ भी परमेस्सर तोहरे मुँह क हँसी स भरि देइ।
    तोहरे ओंठन क खुसी स चहकाइ देइ।
²² परमेस्सर तोहरे दुट्ठ दुस्मनन क लज्जा स झुकाइ देइ।
    अउर ओनकर घरन क नास कइ देइ।”