Revised Common Lectionary (Complementary)

Dee 54 Psalm

To dän Haupt Musikaunt opp Neginot: en Psalm fonn Doft- aus dee Zifim kjeem en saed to Saul, Deit Doft sikj nijch festäakje mank onnse?

¹ Rad mie, O Gott derjch dien Nome, un doo mie derjch diene Krauft rejchte.

² Hea mien Jebäd, O Gott; horjch no dee Wead ut mien Mul.

³ Dan Framde sent oppjestone jäajen mie, un ommenschlijche Mane seakje miene Seel. Dee ha Gott nijch fer sikj jestalt. Selah.

⁴ See, Gott es mien Helpa. Dee Herr es met dän dee miene Seel opprajcht hoole.

⁵ Hee woat Beeset fejelte to dän dee miene Fiend sent; schnied dän auf enn diene Woarheit.

⁶ Ekj woa friewelijch to die opfre; ekj woa dien Nome preise, O Herr Gott, dan daut es goot.

⁷ Dan Hee haft mie ut aul miene Trubbels jerat; un mien Uag haft sien Felange jeseene opp miene Fiend.

¹³ Waea es Weis en Festendich mank junt? Lot am derch sien gooda Waundel siene Woakje wiese enn weisheits Saunftmoot.

¹⁴ Oba wan jie bettre Aufgonst en Striet enn june Hoate ha, dan pucht nich, en leacht nich jaeajen dee Woarheit.

¹⁵ Dise Weisheit kjemt nich fonn Bowe, oba es irdisch, natearlich, soo aus beese Jeista.

¹⁶ Dan wua doa Aufgonst en Striet es, doa es Opprua en aulahaunt nutslooset.

¹⁷ Oba dee Weisheit dee fonn Bowe kjemt es easchtens rein, fraedlich, jelind, jehuarsaum, foll Erboarme en goode Woakje, deit nich twiewle, en heichelt nich.

¹⁸ Dee Jerajchtichkjeits Frucht woat jeseit enn Fraed fa daen dee Fraed moake.

4 Wuaderch kjemt soo fael Kjrich en Striet mank junt? Kjemt daut nich fonn dee Plezhea dee enn june Jlieda striede?

² Jie sent bejearich en ha doch nich; jie morde en sent aufjenstich, en kjenne nich kjriehe waut jie ha wele. Jie jachte en kjrieje, doch ha jie nich wiel jie nich doano froage.

³ Jie froage, en kjriehe doch nich wiel jie met en fekjeadet Hoat froage, daut jie daut fa jun eajne Plezhea kjenne februcke.

⁷ Doaromm siet Gott unjadon; oba stalt junt jaeajen daem Diewel, dan woat hee fonn junt wajch rane.

⁸ Nodat junt no Gott, dan woat hee sikj no junt nodre. Reinicht june Henj, jie sinda, en moakt june Hoate ajcht, jie met en dubbelda Senn.

³⁰ See feleete doa en reisde derch Galilaea, en hee wull nich ha daut irjent waea daut weete sull;

³¹ dan hee lead siene Jinja, en saed to an: "De Menschesaen woat enn Mensche Henj ferode woare, en dee woare am doot moake, en no daem daut see am doot jemoakt ha, woat hee wada oppstone."

³² Oba see festunnde dee Raed nich, en enjste sikj am to froage.

³³ Donn kjeeme see no Kapernaum. Aus see eascht em Hus weare, fruach hee an: "Aewa waut streed jie ju hinjawaeajes?"

³⁴ Oba see weare stel, dan see haude hinjawaeajes jestraede aewa waea daut Jratste wea.

³⁵ Hee sad sikj dol, roopt dee Twalw, en saed to an: "Wan irjen waea daut Jratste wel senne, saul hee daut Latste senne, en aulamaun Deena."

³⁶ Donn neem hee en Kjint en stald daem med unja an, neem daut enn siene Oarms, en saed to an:

³⁷ "Waeaemma eent fonn soone Kjinje oppnemt enn mien Nome, nemt mie opp; en waeaemma mie oppnemt, nemt daem opp dee mie jeschekjt haft."