Revised Common Lectionary (Complementary)

Tau

¹⁶⁹ Lot mien Jeschrejcht no die kome, O Herr Gott; jeff mie Weisheit no dien Wuat no.

¹⁷⁰ Lot mien Jebäd fer die kome; rad mie no dien Wuat no.

¹⁷¹ Miene Leppe selle Preis räde wan du mie diene Jerejchte leare deist.

¹⁷² Miene Tung saul dien Wuat auntwuate; dan aul diene Jeboote sent Jerajchtijchkjeit.

¹⁷³ Lot diene Haunt mie halpe; dan ekj ha diene Fäaschrefte jewält.

¹⁷⁴ Ekj ha mie jesänt no diene Radunk, O Herr Gott; un dien Jesats es mien Fejneaje.

¹⁷⁵ Lot miene Seel läwe un ekj woa die preise; un lot diene Jerejchte mie halpe.

¹⁷⁶ Ekj ha je-ert soo aus en feloarnet Schop, seakj dien Deena; dan ekj doo diene Jeboote nijch fejäte.

²⁵ Donn saede eenje fonn dee fonn Jerusalem: "Es dit nich dee waem see feaseakje doot to moake?

²⁶ en kjikjt! hee raet gauns frie en kjeene sajcht waut to am. Weete dee Aewaschte feleicht werklich daut dit de Chrisus es?

²⁷ Oba wie weete wua disa haea es; oba wan dee Christus koma woat, woat kjeena weete fonn wua hee kjemt."

²⁸ Jesus schrieech lud em Tempel aus hee lead en saed: "Jie kjanne mie en weete uk fonn wua ekj sie; ekj sie nich ut mie selfst jekome, oba dee waut mie jeschekjt haft es woarhauftich; daem kjan jie nich.

²⁹ Ekj oba kjan am; wiel ekj sie fonn am, en hee haft mie jeschekjt."

³⁰ Donn fesochte see am faust to naeme, ob kjeena laed ne Haunt opp am, dan siene Stund wea noch nich jekome.

³¹ Oba faele fomm Folkj jleewde aun am en saede: "Dee Christus, wan hee kjemt, woat hee mea Teakjens doone aus disa jedone haft?"

³² De Farisaea heade daut Folkj soone Dinje aewa am murre. Donn schekjte de Farisaea en Huugepriesta Tempelwajchta am faust tonaeme.

³³ Donn saed Jesus to an: "Noch ne kjleene Tiet sie ekj met ju, en dann woa ekj trig gone no daem dee mie jeschekjt haft.

³⁴ Jie woare mie seakje en woare mie nich finje; en wua ekj sie kje jie nich hankome."

³⁵ Donn saede de Jude eena tom aundre: "Wua raeakjent hee han to gone, daut wie am nich finje wudde? Wel hee meteenst no dee gone dee mank dee Jrieche festreit sent, en de Jrieche leare?

³⁶ Waut es dit fa en Wuat waut hee sajt, "Jie woare mie seakje oba nich finje, en wua ekj sie doa kje jie nich hankome?"