Revised Common Lectionary (Complementary)

Dee Psalme I

Dee 1 Psalm

¹ Jesäajent es dee Maun dee nijch enn dee Gottloose äa Rot jewaundelt haft, un dee nijch enn dee Sinda äare Wäaj jestone haft, un dee nijch enn dee Spatta äare Set jesäte haft.

² Oba sien Fejneaje es bloos enn däm Herr Gott sien Jesats, un dee sikj Dach en Nacht enn sien Jesats besenne deit.

³ Un hee saul jeplaunt senne soo aus en Boom bie dee Wota Streem, dee äare Frucht brinjt to rajchte Tiet; sien Blaut woat nijch fewalkje; un aules daut hee deit woat am jelinje.

⁴ Oba dee Gottloose sent nijch soo; oba sent soo aus daut Sprie daut dee Wint fepliesat.

⁵ Doaromm woare dee Onnjerajchte nijch enn daut Jerejcht bestone, uk nijch Sinda enn dee Jerajchte äare Fesaumlunje.

⁶ Dan dee Herr Gott kjant dee Jerajchte äa Wajch, oba dee Gottloose äa Wajch woat feschwinje.

2 Dan jie weete selfst, Breeda, daut onns Enngank bie junt nich emmsonst wea,

² oba no daem daut wie ferhaea jelaede haude, en onns schlacht behaundelt wort enn Filipe so aus jie weete, wea wie driest enn onns Gott junt daut Evanjeelium to brinje unja fael Kaumf.

³ Onnse Femoninj wea nich enn Faela, uk nich enn Onnreinheit, uk nich enn Lest,

⁴ oba soo aus Gott onns weat acht daut Evanjeelium auntofetruhe, soo raed wie, nich Mensche tom jefaule, oba Gott, dee onnse Hoate unjaseakjt.

⁵ Dan wie kjeeme nich met Schmeichelwead, soo aus jie weete, uk nich met en hinjarikschje Senn enn Jiets - Gott es onns Zeig -

⁶ en sochte uk nich Ea fonn Mensche, nich fonn junt uk nich fonn aundre,

⁷ wan wie uk aus Christus siene Apostel daut haude kunnt; oba wie weare Saunftmuetich mank ju, so aus ne Mutta aeare eajne Kjinja besorcht.

⁸ Aulsoo, enn Leew junt jaeajenaewa, freid onns daut junt nich bloos daut Evanjeelium met to deele, oba uk onnse eajne Seele, wiel jie onns leef weare jeworde.

³⁴ Oba aus dee Farisaea heade daut hee dee Sadutsaea stel jemoakt haud, fesaumelde see sikj.

³⁵ Eena fonn an, en Jestasjeleada, fruach am ne Froag, am to feseakje:

³⁶ "Leara, woont es daut jratste Jeboot em Jesats?"

³⁷ En hee saed to am: "Du saust daem Herr dien Goot leef ha met dien gaunset Hoat, en met diene gaunse Seel, en met aul dien Festaunt.

³⁸ Dit es daut jratste, en daut easchte Jeboot.

³⁹ En daut tweede es doamet aewareen: Du saust dien Noba soo leef ha aus die selfst.

⁴⁰ Aun dise twee Jeboote hengt daut gaunse Jesats, uk dee Profeete."

⁴¹ Aus dee Farisaea fesaumelt weare, fruach Jesus an, en saed:

⁴² "Waut meen jie fonn daem Christus? Waems Saen es hee?" See saede to am: "Doft siena".

⁴³ Hee saed to an: "Woo kjemt daut dan, daut Doft am em Jeist Herr nand, aus hee saed:

⁴⁴ 'De Herr saed to mien Herr: Set hia aun miene rajchte sied bott ekj diene Fiend unja diene Feet laje woa.'

⁴⁵ Wan Doft am Herr nant, woo es hee dan sien Saen?"

⁴⁶ En kjeena kunn am en Wuat auntwuate, en fonn daen Dach aun woagd sikj kjeene meeha am waut to froage.