Revised Common Lectionary (Complementary)

⁸ O jie Felkja, doot onns Gott säajne, un lot dee Stem fonn sien Preis to heare senne;

⁹ Dee onnse Seel mank dee Läwendje helt, un erlaubt nijch daut onnse Feet jleppe sulle.

¹⁰ Dan du, O Gott hast onns jeprooft; du hast onns ajcht jemoakt soo aus Selwa ajcht jemoakt woat.

¹¹ Du hast onns enn daut Nat jebrocht; du deetst Älend opp onnse Lende laje.

¹² Du hast erlaubt daut Mane äwa onns Kopp riede deede; wie sent derjch Fia un derjch Wota jekome, oba du brochst onns no Follet.

¹³ Ekj woa enn dien Hüs enenn gone met Braunt Opfa; ekj woa mien Fespräakje betole,

¹⁴ daut miene Leppe jerät ha, en daut ekj enn mien Trubbel fespruak.

¹⁵ Ekj woa die Braunt Opfa opfre fonn fattet Fee, met dän seeta Ruak fonn Kosebakj; ekj woa Bolles opfre met Kose. Selah.

¹⁶ Komm, hea, un lot mie fetale, aul jie dee Gott ferjchte, waut Hee fa mie jedone haft to miene Seel.

¹⁷ Ekj schreajch to am met mien Mul, un met Preis unja miene Tunj.

¹⁸ Wan ekj Gottlooset aunjeseene ha enn mien Hoat, wudd dee Herr Gott nijch no dee Stem fonn miene Jebäd jeheat ha.

¹⁹ Sejchalijch haft Gott jeheat; Hee haft Oobacht jejäft opp dee Stem fonn mien Jebäd.

²⁰ Jesäajent es Gott, dee sikj nijch wajch jedreit haft fonn mien Jebäd, oda sien Erboarme trigj jehoole haft.

²⁷ Ekj lot ju daen Fraed, miene Fraed jaew ekj ju; ekj jaew ju nich so aus de Welt jeft. Lot ju nich em Hoat beonruije, en doot ju nich engste.

²⁸ Jie heade mie to ju saje: Ekj go wajch en kom wada no ju. Haud jie mie leef, dan wudd jie ju freie daut ekj nom Foda go, wiel de Foda es jrata aus ekj.

²⁹ En ekj ha ju daut nu jesajt eeha daut paseat, daut jie jleewe woare wan daut paseat.