M’Cheyne Bible Reading Plan

1 Paul, en Silwanus, en Timotaeus, aun dee Tessaloonicha Jemeent dee enn Gott onns Foda, en onns Herr Jesus Christus es:

² Mucht junt Jnod en Fraed fonn Gott onns Foda, en Jesus Christus onns Herr, jeschenkjt woare!

³ Wie sulle emma Gott dankboa senne fa junt, Breeda, soo auset uk sull senne, wiel jun Gloowe waust, en en jiedem siene Leew nemt emma too eena tom aundra, en to aulem;

⁴ Soo daut wie selfst fonn junt puche to Gott siene Jemeente fa jun Staunthauft enn jun Gloowe enn aul dee Fefoljunk, en daut Aelend, daut jie uthoole.

⁵ Daut es en Teakjen fonn Gott sien jerajchtet Jerecht, daut jie Weatfoll kjenne je-acht woare fa Gott sien Rikj, omm woont jie nu uk liede,

⁶ Sentamol dautet fa Gott en jerajchtet Dinkj es soone to fejelte dee junt nu tualeide.

⁷ En jie, dee jie nu liede, rut met onns, wan de Herr Jesus woat fomm Himel je-oppenboat woare met siene Enjel enn Krauft,

⁸ Met flaumendet Fia daen to fejelte dee Gott nich kjane, en dee onns Herr Jesus sien Evanjeelium nich jehuarsaum sent,

⁹ Dee daen Strof tole woare eewich fonn daem Herr sien Jesecht jetrant to senne, uk fonn dee Harlichkjeit fonn siene Krauft,

¹⁰ Wan hee kome woat enn siene Heilje feharlicht to woare, en bewunndat to woare aun daen Dach enn aul daen dee jejleeft ha, dan onns Zeichnes to junt wort aunjenome.

¹¹ Doaromm baed wie uk emma fa junt, daut onns Gott junt mucht fedeenstfol achte fa dee Beroopinj, en daut hee aulet Jefaule aun daut Goodet, en gloowes Oabeit enn Krauft mucht erfelle,

¹² Soo daut onns Herr Jesus sien Nome mucht enn junt feharlicht woare, en jie enn am, no onns Gott en Herr Jesus Christus siene Jnod.

Dee 110 Psalm

En Psalm fonn Doft

¹ En Berecht fonn däm Herr Gott to mien Herr, set bie miene rajchte Haunt bott ekj diene Fiend die to ne Footbenkj moak.

² Dee Herr Gott woat dee Stang fonn siene Macht rut schekje ut Zion; doo med mank diene Fiend harsche.

³ Dien Folkj saul wellich senne enn dän Dach fonn diene Macht; un dee Madastichkjeit fonn Heilichkjeit fonn daut daut Muttalief fonn Morjenroot, to die es daut Deiw fonn diene Jugent.

⁴ Dee Herr Gott haft jeschwuare un woat nich Busse doone; du best fa emma en Priesta no Melchisedek siene Ordninj.

⁵ Dee Herr bie diene rajchte Haunt deit Kjennichs schmatre enn dän Dach fonn sien Oaja.

⁶ Hee woat rejchte mank dee Nazionen; Hee woat daut felle met doodje Kjarpa; Hee woat Ferschte schmatre äwa fäl Launt.

⁷ Hee saul drinkje ut dän Bach enn dän Wajch; doarom woat Hee dän Kopp opp häwe.

Dee 111 Psalm

¹ Preis däm Herr Gott; ekj woa däm Herr Gott danke met mien gaunset Hoat; enn dee festoakne Fesaumlunk fonn dee Opprajchta, un opp daut toop kome.

² Däm Herr Gott siene Woakje sent groot, un woare utjesocht fonn dän dee dee welle habe.

³ Sien Woakj es eaboa en harlich; un siene Jerajchtichkjeit duat fa emma.

⁴ Hee haft en Aunjedenkj fa siene Wundasch; dee Herr Gott es jnädich un foll Metleet.

⁵ Hee haft Noarinj jejäft to dän dee Am ferjchte; Hee woat sien Bunt fa emma behoole.

⁶ Hee haft sien Folkj dee Macht fonn siene Woakje jewäse; dän en Oawgoot to jäwe mank dee Nazione.

⁷ Dee Oabeit fonn siene Henj sent Woarheit un Jerejcht; aul sien Kommandeare es Woa,

⁸ un steit faust fa emma un emma; dee sent jedone enn Woarheit en Opprajchtijchkjeit.

⁹ Hee schekjt Radunk to sien Folkj; Hee haft sien Bunt bestädijcht fa emma; Heilijch en foll Eaforjch es sien Nome..

¹⁰ Dee Aunfank fonn Weisheit es Gottesforjcht; aula dee daut doone ha ne goode Festentnis; sien Preis es opp Eewijch duarhauft.