M’Cheyne Bible Reading Plan
4 Ekj sie daem Herr sien Jefangne, doaromm pracha ekj junt dringent daut jie so laewe dautet stemt met dee Beroopinj met dee jie beroope sent,
2 met folle Deemut en Saunftmoot, met Jedult, en fedroacht eena daem aundra enn Leew,
3 en bemeacht junt dee Eenichkjet em Jeist to hoole daut enne Fraed toop jebunge es. Doa es een Lief en een Jeist,
4 soo aus jie uk beroope weare enn eene Hopninj enn dee jie beroope sent;
5 een Herr, een Gloowe, eene Taufe;
6 een Gott en Foda aewa aules, dee aewa aules, en derch aules, en enn aules es.
7 Oba to en jieda eenem es Jnod jejaeft no dee Mot enn dee Gow Christus.
8 Doaromm sajcht hee: "Enn daem daut hee enopp jefoare es no daut Hechste, haft hee dee Jefangne jefange wajch jeleit, en haft dee Mensche Gow jejaeft".
9 Nu daut Wuat: "Enopp jefoare", waut meent daut sest aus daut hee eascht erauf jefoare es enn dee laeachste staede fonne Ead?
10 Dee erauf jefoare es, es dee naemlija aus dee, dee enopp jefoare es wiet aewa aule Himelswelte, daut hee aules fele mucht.
11 En hee jeef walkje Apostel, en walkje Profeete, en walkje Evanjeliste, en walkje aus Hoad en Leara,
12 soo daut hee dee Heilje kunn follkome moake fa dee Oabeit em Deenst, daut Christus sien Lief (dee Jemeent) kunn oppjebut woare,
13 bott wie aule to ne Eenichkjet em Gloowe kome, en ne folle Erkjantnes fonn Gott sien Saen, to en follstendje Maun, bott dee Mot fonn de Follkomenheit enn Christus,
14 soo daut wie nich lenje kjleene Kjinja sent, dee han en haea jeblost woare fonn dee Wint fonn Irlea, en wajch jeleit fonn daen, dee enn aeare Kluakheit enn Irlea enenn leide.
15 Enn Leew mott wie de Woarheit raede daut wie enn aule hensechte enn am enenn wause, dee daut Haupt es, Christus,
16 fonn waem daut gaunse Lief toop jepausst es, en toop jebrocht woat derch en jiedet Jelenk; en doaderch waust dee Kjarpa daut dee sikj selfst oppbut.
17 Doaromm saj ekj dit en bezeij enn daem Herr, daut jie nich meeha soo waundle aus dee Heide enn aeare nutsloose Jedanke,
18 dee emm Diestre sent enn aea Festaunt, dee fonn daut Gotteslaewe aufjesondat sent derch aea Onnwissenschofft, en daut waeajen aea hoadet Hoat,
19 dee, wiel see nussscht meeha dromm jaewe, sikj to aulet Onnreinet hanjejaeft ha enn Jiets.
20 Oba jie ha Christus nich soo kjanne leat;
21 wan jie werklich am jeheat ha, en fonn am sent jeleat worde soo aus dee Woarheit enn Jesus es,
22 daut jie daen oole Mensch auflaje no daen Waundel daen jie ferhaea haude, dee sikj selfst to Grunt bringt derch dee fefearesche Losst;
23 en siet Nie jemoakt em Jeist fonn jun Senn,
24 en daut jie daem niehe Mensch auntrakje dee no Gott erschaufe es enn Jerachtichkjeit en Woarheits Heilichkjet.
25 Doaromm lajcht aulet Leaje auntsied, en raet de Woarheit eena tom aundra, dan wie sent aula Jlieda, eena met daem aundra.
26 Siet oajalich, oba doot nich sindje doabie: lot dee Sonn nich opp jun Oaja dol gone.
27 Jaeft daem Diewel kjeen Plauts.
28 Waea eegol staele deit, lot am oppheare met staele, lot am sikj leewa bemeaje en met siene eajne Henj daut goodet oabeide daut hee metdeele kaun met soonem dee bederftich es.
29 Lot kjeene schlajchte Raed ut jun Mul kome, leewa soont waut Goot es soone metohalpe dee bederftich sent, soo dautet kaun Jnod jaewe fa daen dee daut heare.
30 Beleidicht daem Heilje Jeist nich, derch waem jie fesaeajelt sent fa daen Radunksdach.
31 Lot aulet Bettanis, en Oaja, en Wutt, en Jetoob, en Lastre auntsied jelajcht woare, uk aul daut Beese.
32 Siet leeftolich eena tom aundra, metliedent, en fejaeft eena daem aundra, soo aus Gott junt enn Christus fejaeft haft.
Dee 87 Psalm
Fa dee Kora Säns, en Psalm. En Leet
1 Sien Grunt es enn dee heilje Boaj.
2 Dee Herr Gott haft dee Zions Puate mea leef aus aul dee Zelte enn Joakop.
3 Harlijche Dinje woare fonn die jerät, O Gottes Staut, Selah.
4 Ekj woa Rahab un Babeloon erwäne to dän dee mie kjane; See, Filiste un Tiarus met Ietiopia, disa wea doa jebuaren.
5 En daut saul to Zion jesajcht woare: Disa un Jana weare enn ar jebuaren; un dee Aulahejchsta selfst woat ar bestädje.
6 Dee Herr Gott woat dolteakjne, enn däm daut hee dee Natsjoone dol schriewe woat, dis Maun wea doa jebuare. Selah.
7 Un see Senja, dee de Piep späle. Aul miene Wotakjwale sent en Die.
Dee 88 Psalm
En Leet. En Psalm fa dee Korah Säns, to dän Hauptmusikaunt opp Mahalat, deemietijch to moake. En Jedijcht fonn Heman dee Ezrahiet.
1 O Herr Gott fonn miene Radunk, ekj ha wäarent dän Dach jeschräajen, enne Nacht fer die.
2 Lot mien Jebäd fer die kome; beaj dien Ua dol no mien schriehe.
3 Dan miene Seel es foll fonn Trubbels, un mien Läwe kjemt dijcht bott dee Hal.
4 Ekj sie met ennjetalt met dän de rauf gone do nee Kul; ekj sie soo aus en schwakja Maun,
5 frie mank dee Doodje, aus derjch jespekjte Mensche dee em Grauf ligje, aun dän du nijch denkjst; jo, derjch diene Haunt sent dee aufjeschnäden.
6 Du hast mie ennn dee läajchste Kul jelajcht, enn dunkle Städe; enn daut Deepet.
7 Diene Wut es schwoa opp mie jelajcht, un du deist mie tualeide met aul diene Wale. Selah.
8 Du hast miene Frind wajch jenomen fonn mie; du hast mie en jehaustet Dinkj jemoakt; ekj sie ennjeschloten, ekj kaun nijch rut gone.
9 Mien Uag deit truare wäajen mien Älend; O Herr Gott, ekj ha die jieda Dach aunjeroopt; ekj ha miene Henj utjestrakjt no die.
10 Woascht du dan mank dee Doodes Wunndasch wirkje? Sele dee Doodes oppstone un die danke? Selah.
11 Saul dien Erboarme enn daut Grauf bekaunt jemoakt woare; diene Truheit mank daut Ferinjneadet?
12 Sele diene Wunndasch to weete senne enn daut Diestre, un diene Jerajchtijchkjeit enn daut Launt fonn Fejäte?
13 Oba ekj ha to die jeschräajen, O Herr Gott, un mien Jebäd saul Tsemorjenst fer die kome.
14 O Herr Gott, wuarom deist du miene Seel wajch schmiete; wuarom deist du dien Jesejcht festäakje fonn mie?
15 Ekj sie betriebt un stoawent von Kjintheit aun; ekj hool dien Schrakj ut, ekj sie aufjeschnäde.
16 Dien grootet Oaja kjemt äwa mie; dien Schrakj haft mie aufjeschnäde.
17 Dee deede mie dän dachäwa ommrinje soo aus Wotasch; dee sent toop jekomen romm mie.
18 Du hast Leefste en Frint wiet wajch jenome fonn mie; un dee mie kjane enn Diestanes.
Copyright © 2001 by Elmer Reimer