M’Cheyne Bible Reading Plan
Jesus Come Back Alive
28 Afta da Rest Day pau, was da first day in da week. An ony get litto bit light inside da sky. Dat time, Mary from Magdala an da odda Mary wen go da tomb fo look.
2 Right den an dea, da groun wen shake real hard all ova, cuz one angel messenja guy from da Boss come down from inside da sky. He push da big rock away from da opening part, an wen sit down on top da rock. 3 He look jalike da light from da lightning, an his clotheses was real white jalike da snow. 4 Da police guards stay so scared a da angel, dey stay shaking all ova, an dey look jalike mahke kine guys.
5 Da angel guy tell da wahines, “Eh, no scared! I know you guys looking fo Jesus, da guy dey wen kill on top da cross. 6 Eh, he no stay ova hea, cuz God wen make um come back alive, jalike Jesus wen say befo time. Come! Try look da place wea he wen lay. 7 Den eh, go hurry up! Tell da guys he wen teach, dat God wen make um come back alive from mahke awready. An you know, he going Galilee side first, den you guys suppose to go ova dea too. Dass da place wea you guys goin see him. So, dass it! Dass wat I suppose to tell you guys.”
8 Da wahines, dey wen run from da tomb fo tell his guys. Dey real scared, but same time, dey stay real good inside. 9 Right den Jesus wen meet um, an he say, “Aloha!” Dey go by him, an go down, an touch his feet, an dey give him plenny love an respeck. 10 An Jesus tell um, “Eh, no scared! Go tell my brudda guys fo go Galilee side. Dass da place wea dey goin see me.”
Da Police Guys Tell Wat Wen Happen
11 Wen da wahines going, same time some a da guys dat was guarding da tomb wen go back inside Jerusalem town an tell da main priest guys wat wen happen. 12 So da main priest guys all come togedda wit da older leadas, fo figga wat fo do. Den dey give plenny money to da guys dat was guarding da tomb. 13 Da priest guys tell um, “Tell da peopo, ‘Come dark time, wen us guys sleeping, Jesus guys wen steal da body.’ 14 If da governa hear bout dis ting, us guys goin tell um you guys okay, so you guys no need worry.” 15 So da guys dat was guarding da tomb wen take da money an do wat da leada guys wen tell um. An dass wat da Jewish peopo still yet stay telling today.
Jesus Go By His Guys
16 Den Jesus eleven guys go Galilee, to da mountain wea Jesus wen tell um fo go. 17 Wen dey wen see him ova dea, dey go down an give um plenny love an respeck. But still had guys dat still yet not shua wat stay happening.
18 Den Jesus go near dem an say, “God wen give me all da power, so now I in charge a everyting all ova da world an inside da sky. 19 So you guys, go all ova da world an teach all da diffren peopos, so dey can learn bout me an come my guys. Baptize dem, an dey goin come tight wit my Fadda, an me his Boy, an Godʼs Good an Spesho Spirit. 20 Teach um how fo do everyting dat I wen tell you guys fo do. An you know wat? I goin stick wit you guys all da way, till da world goin pau.”
Malta Side
28 We wen come to da land okay, an we find out dat dey name da island Malta. 2 Da local peopo wen show us plenny aloha. Dey wen make one fire an tell us fo come cuz stay raining an cold. 3 Paul wen bring some wood fo da fire. Wen he put um on top da fire, one snake wen come outside da wood, cuz stay hot. Da snake wen grab Paulʼs hand. 4 Wen da local peopo wen spock da snake hanging from Paulʼs hand, dey wen tell each odda, “Eh, fo shua dis guy wen kill somebody. He wen get outa da ocean okay, but da gods no goin let um stay alive.” 5 But Paul wen shake da snake from his hand inside da fire, an notting wen happen to Paul. 6 Da peopo wen tink he goin swell up o mahke fast. Dey wen wait plenny, an dey neva see notting funny kine happen. So dey wen change dea mind an say, “Eh! Must be he one god!”
7 Had one big place near dea fo da governa fo da island, his name Publius. He wen show us aloha an tell us fo come inside his house. We wen stay dea fo three days, an he wen take care us real good. 8 His fadda stay sick in bed. He get one feva an da runs. Paul wen go by him an pray an put his hands on top um, an he wen make um come good. 9 Afta dat, da peopo wen bring all da odda sick peopo on da island, an Paul wen make um come good. 10 Dey wen give us plenny stuffs, cuz dey get respeck fo us. Wen we was ready fo sail, dey wen give us all da stuffs we wen need.
From Malta To Rome
11 Afta three months we wen sail on top one boat dat wen stay by Malta Island all winta. Da boat wen come from Alexandria an had da twin gods Castor an Pollux on da front. 12 We wen come to Syracuse an stay ova dea three days. 13 We wen sail from dea an wen come Regium. Da nex day da sout wind wen come, an da nex day we wen come Puteoli. 14 Ova dea we wen meet some bruddas. Dey wen tell us fo come stay dea house fo one week. An den we wen go way from dea fo go Rome. 15 Da bruddas ova dea wen hear dat we stay coming, an dey wen come to da Appius Market an da Three Taverns fo meet us. Wen Paul wen spock dem, dat wen kokua him, an he wen tank God.
Inside Rome
16 We wen go inside Rome, an dey wen let Paul stay inside one place by himself, an one army guy wen guard um.
17 Afta three days Paul wen tell da leadas fo da Jewish peopo fo come. Wen dey wen come, Paul wen tell um, “My bruddas, I neva do notting agains our peopo o agains our ancesta guys ways. But dey wen bus me inside Jerusalem an hand me ova to da Rome guys. 18 Da Rome guys wen aks me plenny stuffs, an dey wen like let me go, cuz I neva do notting dat say I gotta mahke. 19 But da Jewish guys neva like dem fo let me go, so den, I wen say I gotta come in front da Big King Cesar. But I no mo notting fo poin finga at my peopo. 20 So I wen tell dese guys I like talk to you. I trus God dat he goin take da Israel peopo outa da bad kine stuff dey stay in. Dass why dey wen tie me up wit dis chain.”
21 Da Jewish guys wen say, “We neva get no lettas from Judea bout you. An da bruddas dat wen come from ova dea neva say notting stink bout you. 22 But we like listen to wat you say. We know dat da peopo all ova da place stay talking agains dis stuff you teach.”
23 Den dey wen say dey goin come togedda one spesho day. An dat time even mo peopo wen come to da place wea Paul stay. Wen da sun come up till da sun go down he wen tell um all da stuff bout how dey can get God fo dea King. He wen try help um fo trus da Good Stuff Bout Jesus. He start wit da stuff Moses wen write down inside da Rules, an den he talk bout da odda guys dat wen talk fo God befo time. 24 Some guys wen trus da Good Stuff Paul wen tell um, but da odda guys neva like trus um. 25 Dey wen go way an make argue wit each odda. But first Paul wen say, “Godʼs Spesho Spirit wen tell yoa ancesta guys da trut! Isaiah wen talk fo him 26 an say,
‘God wen tell me fo go by dis peopo an say,
“You guys goin hear,
But you no goin undastan.
You guys goin see,
But you no goin see fo real.
27 Cuz dis peopo hard head,
Dea ears no can hear good.
Dey close dea eyes,
Cuz dey no like see fo real.
Dea ears no like hear fo real.
Inside dey no like undastan fo real.
Dey no like change
so I can make um come good.” ’
Dass wat Isaiah wen say.”
28 Paul say, “I like you guys know dat God send his guys by da peopo dat not Jews, so he can take dem outa da bad kine stuff dey do. An dey goin listen!” 29 [So da Jewish guys wen go way an wen make argue real hard wit each odda.]
30 Fo two years Paul wen stay ova dea inside one house he wen rent. He wen show aloha fo all da peopo dat wen come by him. 31 He wen teach um how dey can get God fo dea King an all bout da Boss Jesus, da Spesho Guy God Wen Send. He not scared fo tell um, an nobody wen try make him shut up.
Copyright © 2000 by Wycliffe Bible Translators International. All rights reserved