M’Cheyne Bible Reading Plan

John Da Baptiza Guy Wen Mahke

14 Dat time, King Herod hear bout all da stuff Jesus stay doing. ² He tell his worka guys, “I figga, dis guy gotta be John Da Baptiza. He wen mahke, an now he come back alive. Dass why he get da power fo do all dis awesome kine stuff.”

³ Dis wat wen happen. Befo time, you know, Herod wen tell his guys fo grab John, an put chain on top um, an throw um inside da prison. Herod do dat cuz a Herodias, his brudda Philipʼs wife. ⁴ Cuz John wen tell him, “Godʼs Rules say, ‘You not suppose to take yoa bruddaʼs wife.’ ” ⁵ So den, Herod wen like kill him, but den, he scared da peopo, cuz dey all tink John talk fo God.

⁶ Herod wen go make one big party fo his birfday. Herodias girl wen dance in front everybody, an Herod wen like da dance plenny. ⁷ He tell her, “Wateva you like, I swear to God I goin give um to you.” ⁸ Her mudda wen tell her, “Go aks fo John Da Baptiza head on top dis big plate!” So she wen go do wat her mudda say.

⁹ Da ting she wen aks fo wen bodda King Herod. But he wen swear to God in front all his friends, so he tell his guys, “Go do um.” ¹⁰ So den dey wen chop off John Da Baptiza head inside da prison. ¹¹ Dey put his head on top da big plate, an give um to da girl. Den she wen take um to her mudda. ¹² Da guys dat John wen teach come an take his body, an bury him. Den dey go tell Jesus wat wen happen.

Jesus Feed Five Tousand Guys

¹³ Wen Jesus find out wat happen to John, he go inside one boat fo go one place wea nobody stay. Plenny peopo from all da towns aroun dea wen find out wea he wen go, so dey go dea too. ¹⁴ Wen Jesus go outa da boat, he spock all da peopo. He get pity fo dem, an he make all da sick guys ova dea come good.

¹⁵ Wen da sun stay going down, his guys come by him an say, “Ho ka! Pau hana time awready! An ova hea no mo notting fo eat. Tell da peopo fo go way: Tell um, ‘Go inside da towns, fo buy someting fo eat!’ ”

¹⁶ But Jesus tell um, “Nah! Dey no need go way. You guys, you give um someting fo eat.”

¹⁷ Dey say, “We no mo notting. Ony get five small breads an two fishes.”

¹⁸ He say, “Give um to me.” ¹⁹ He tell all da peopo fo sit down on top da grass. An dey sit down. He take da five breads an da two fishes, an look up to da sky, an say, “Eh God! You good heart fo give us guys all dis!” He broke da bread, an give um to his guys, an da guys give good piece bread to all da peopo. ²⁰ Dey all eat an wen come full. His guys pick up twelve big baskets full wit all da lefovas. ²¹ Had five tousand guys dea dat eat da bread, plus had wahines an kids too.

Jesus Walk On Top Da Water

²² Right den Jesus tell his guys fo go inside da boat, an go da odda side a da lake befo him. He tell all da peopo fo go home. ²³ Afta he tell um fo go, he go up on top da mountain fo pray. Wen dark time wen come, he still yet dea by himself. ²⁴ Da boat stay in da middle a da lake, an da wind was blowing real hard agains dem, an da waves stay rocking da boat. ²⁵ Early, early time in da morning, Jesus come by dem, walking on top da water. ²⁶ His guys spock him walking on top da water, an dey come scared an yell, “Eh, get one ghost!”

²⁷ Right den an dea Jesus tell um, “Eh, no scared. Dis ony me! Make strong!”

²⁸ Peter say, “Boss, if dass you, tell me fo go by you on top da water.”

²⁹ Jesus say, “Come, den.”

Peter climb outa da boat, an walk on top da water fo go by Jesus. ³⁰ But wen he see how da wind was, he come scared, an start fo go down inside da water. Den he yell, “Eh, Boss! Get me outa dis!” ³¹ Right den an dea Jesus put out his hand an grab him, an say, “How come you trus me ony litto bit? How come you tink you no can do um?” ³² Wen dey go back inside da boat, da wind pau. ³³ Den da guys inside da boat go down in front him, an say, “Wow! Fo real, you Godʼs Boy!”

Jesus Make Da Sick Guys Come Good Gennesaret Town

³⁴ Den dey all go da odda side da lake, an come by Gennesaret town. ³⁵ Da peopo ova dea know who Jesus, an dey run all ova da place fo bring da sick peopo by him. ³⁶ Dey beg him fo let da sick guys touch his clotheses. All da guys dat touch his clotheses wen come good.

Inside Iconium

14 Now, in Iconium Paul an Barnabas wen go inside da Jewish church jalike dey everytime go. Wat dey wen say inside dea stay right on, an plenny Jewish peopo an peopo dat not Jews wen trus da Good Stuff Bout Jesus. ² But da Jewish peopo dat neva like trus um, dey wen talk to da guys dat not Jews an wen turn um agains Paul an Barnabas guys. ³ Paul an Barnabas stay dea long time, an dey no scared fo talk fo da Boss Up Dea. Dey say dat da Boss get aloha fo do plenny good tings fo da peopo. Da Boss wen show da peopo dat wat Paul an Barnabas say, stay true, cuz he wen give um da power fo do all kine awesome stuff fo show who dem. ⁴ So some peopo inside Iconium wen stick wit da guys Jesus wen send, an da odda peopo wen stick wit da Jewish guys. An da peopo inside da town wen come half half.

⁵ Da guys dat not Jews an da Jewish guys an dea leadas wen talk togedda, how dey can make any kine to dem an kill um wit stones. ⁶ Wen da guys Jesus wen send wen hear dat, dey wen beat it to Lystra an Derbe towns, Lycaonia side, an all da place aroun dea. ⁷ Dey wen tell all da Good Stuff From God ova dea too.

Lystra An Derbe

⁸ Had one guy inside Lystra dat no can walk. He wen born lidat. ⁹ He wen listen to Paul wen he was telling da Good Stuff Bout Jesus. An Paul wen look him in da eye, an know dat da guy trus dat he can come good. ¹⁰ So Paul tell um real loud, “Stand up!” An da guy wen jump up, an walk. ¹¹ Wen all da peopo see wat Paul wen do, dey yell in Lycaonia talk, “Da gods wen come down by us, an dey look jalike peopo!” ¹² Dey wen name Barnabas “Da god Zeus,” an Paul “Da god Hermes,” cuz he da talka guy. ¹³ Da priest guy fo Zeus, dat get one temple outside da town, he wen bring cows an leis by da gate fo da town, cuz all da peopo wen like make sacrifice fo Barnabas an Paul.

¹⁴ Wen Jesus guys Barnabas an Paul wen know wat da peopo trying fo do, dey wen rip dea clotheses fo show az wrong wat da peopo doing, an wen run inside da middle a da peopo, an yelling, ¹⁵ “Auwe! How come you guys stay doing all dis? We stay peopo too, jalike you guys. We bring da Good Stuff From God fo tell you guys. We say you guys gotta turn away from all dis no good stuff, an turn to da God dat stay alive. He da God dat wen make da sky, da earth, an da sea, an everyting inside um. ¹⁶ Befo time he wen let all da diffren peopos inside da world do any kine dey like. ¹⁷ But he wen show dem who him. Cuz he wen do good stuff fo dem. He wen give you guys rain from da sky, an plenny fruit fo cut food time. He wen give you guys plenny food fo eat an make you guys stay real good inside.” ¹⁸ Wen Paul say dat, all da peopo wen try mo hard fo make sacrifice fo dem.

¹⁹ Den some Jewish guys wen come from Antiok, Pisidia side, an from Iconium, an dey wen talk da peopo to ova dea side. Dass why dey wen throw stones at Paul, an wen drag him outside da town, cuz dey tink he stay mahke. ²⁰ But da guys dat stay tight wit Jesus wen come aroun Paul, an he wen stand up, an go back inside da town. Da nex day Paul an Barnabas wen go Derbe town.

Dey Come Back Antiok, Syria Side

²¹ Paul an Barnabas wen tell da Good Stuff From God Derbe town, an plenny peopo wen learn bout Jesus an come his guys. Den dey wen go back Lystra town, an Iconium, an Antiok. ²² Dey wen give good kine words to da peopo dat stay tight wit Jesus, fo help um stick wit da Good Stuff Bout Jesus so dey can trus Jesus. Dey say, “We gotta suffa plenny befo we see God come our King.” ²³ Paul an Barnabas wen pick some guys fo be da older leadas, every place wea da peopo stay come togedda fo church. Dey wen pray an no eat, an aks da Boss fo take care da older leadas, cuz he da one dey stay trus.

²⁴ Den dey wen go da odda side Pisidia, an come Pamfylia. ²⁵ An dey wen tell wat God say Perga town, an den wen go Attalia. ²⁶ Den dey wen sail back from Attalia, an come Antiok. Dass wea dey wen start befo time, wen da bruddas wen aks God fo take care dem an show dem his aloha. Cuz now dey wen pau do all da stuff dey wen tink fo do.

²⁷ Wen dey come ova dea, dey tell all da church peopo fo come togedda, an dey tell um all da stuff God wen help um fo do, an how God wen let da peopo dat not Jews trus da Good Stuff too. ²⁸ An dey stay long time ova dea wit da peopo dat stay tight wit Jesus.