Chronological

^2 (B)Amakubo g’omuntu gonna gaba matuufu mu maaso ge ye,
    naye Mukama y’apima ebigendererwa.

^3 (C)Emirimu gyo gyonna gikwasenga Mukama,
    naye anaatuukirizanga entegeka zo.

^4 (D)Mukama buli kimu akikola ng’alina ekigendererwa,
    n’abakozi b’ebibi y’abakolera olunaku lwe batuukibwako ebizibu.

^5 (E)Buli muntu alina omutima ogw’amalala wa muzizo eri Mukama;
    weewaawo talirema kubonerezebwa.

^6 (F)Olw’okwagala n’olw’obwesigwa, ekibi kisasulibwa,
    n’okutya Mukama kuleetera omuntu okwewala okukola ebibi.

⁷ Amakubo g’omuntu bwe gaba gasanyusa Mukama,
    aleetera abalabe b’omuntu oyo okubeera naye mu mirembe.

^8 (G)Akatono akafune mu butuukirivu,
    kasinga obugagga obungi obufune mu bukyamu.

^9 (H)Omutima gw’omuntu guteekateeka ekkubo lye,
    naye Mukama y’aluŋŋamya bw’anaatambula.

¹⁰ Kabaka ky’ayogera kiba ng’ekiva eri Katonda,
    n’akamwa ke tekasaanye kwogera bitali bya bwenkanya.

^11 (I)Ebipimo ne minzaani ebituufu bya Mukama,
    ebipimo byonna ebikozesebwa y’abikola.

^12 (J)Kya muzizo bakabaka okukola ebibi,
    kubanga entebe ye ey’obwakabaka enywezebwa butuukirivu.

^13 (K)Akamwa akogera eby’amazima bakabaka ke basanyukira,
    era baagala oyo ayogera amazima.

^14 (L)Obusungu bwa kabaka buli ng’ababaka abaleese okufa,
    omusajja ow’amagezi alibukkakkanya.

^15 (M)Kabaka bw’asanyuka kireeta obulamu;
    n’okuganza kwe, kuli nga ekire eky’enkuba^[a] mu biseera ebya ttoggo.

^16 (N)Okufuna amagezi nga kusinga nnyo okufuna zaabu,
    era n’okufuna okutegeera kikira ffeeza!

¹⁷ Ekkubo ly’abagolokofu kwe kwewala ebibi,
    n’oyo eyeekuuma mu kutambula kwe, awonya emmeeme ye.

^18 (O)Amalala gakulembera okuzikirira,
    n’omwoyo ogwegulumiza gukulembera ekigwo.

¹⁹ Okubeera n’omwoyo ogwetoowaza era n’okubeera n’abaavu,
    kisinga okugabana omunyago n’ab’amalala.

^20 (P)Oyo assaayo omwoyo ku kuyigirizibwa alikulaakulana,
    era alina omukisa oyo eyeesiga Mukama.

^21 (Q)Abalina emitima egy’amagezi baliyitibwa bategeevu,
    n’enjogera ennungi eyongera okuyamba okutegeera.

^22 (R)Amagezi nsulo ya bulamu eri oyo agalina,
    naye obusirusiru buleetera abasirusiru okubonerezebwa.

²³ Omutima gw’omuntu ow’amagezi gumuwa enjogera ennungi,
    era akamwa ke kayigiriza abalala.

^24 (S)Ebigambo ebirungi biri ng’ebisenge by’omubisi gw’enjuki,
    biwoomera emmeeme, ne biwonya n’amagumba.

^25 (T)Wabaawo ekkubo erirabika ng’ettuufu eri omuntu,
    naye ku nkomerero limutuusa mu kufa.

²⁶ Okwagala okulya kuleetera omuntu okukola n’amaanyi,
    kubanga enjala emukubiriza okweyongera okukola.

^27 (U)Omuntu omusirusiru ategeka okukola ebitali bya butuukirivu,
    era n’ebigambo bye, biri ng’omuliro ogwokya ennyo.

^28 (V)Omuntu omubambaavu asiikuula entalo,
    n’ow’olugambo ayawukanya ab’omukwano enfirabulago.

^29 (W)Omuntu omukyamu asendasenda muliraanwa we
    n’amutwala mu kkubo eritali ttuufu.

³⁰ Omuntu atemya ku liiso ateekateeka kwonoona,
    n’oyo asongoza emimwa ategeka kukola bitali birungi.

^31 (X)Omutwe ogw’envi ngule ya kitiibwa,
    gufunibwa abo abatambulira mu bulamu obutuukirivu.

³² Omuntu omugumiikiriza asinga omutabaazi,
    n’oyo afuga obusungu bwe akira awamba ekibuga.

^33 (Y)Akalulu kayinza okukubibwa,
    naye okusalawo kwa byonna kuva eri Mukama.

17 ^(Z)Okulya akamere akaluma awali emirembe,
    kisinga okuba mu nnyumba ejjudde ebyassava nga mulimu entalo.

² Omuddu omugezi alifuga omwana wa bowo akwasa ensonyi,
    era alifuna ebyobusika ng’omu ku baana b’awaka.

^3 (AA)Entamu erongoosa yakolebwa lwa ffeeza, n’ekikoomi ky’okulongoosa lwa zaabu,
    naye Mukama agezesa emitima.

⁴ Omubi assaayo omwoyo eri eby’obulimba,
    era n’omulimba awuliriza olulimi olukuusa.

^5 (AB)Oyo akudaalira omwavu avvoola eyamutonda,
    n’oyo asanyukira obuyinike bw’abalala talirema kubonerezebwa.

^6 (AC)Abazzukulu ngule ya bajjajjaabwe,
    era n’abaana beenyumiririza mu bakadde baabwe.

⁷ Enjogerannungi teba ya musirusiru,
    ng’oweekitiibwa bw’atasaana kwogera bya bulimba.

⁸ Enguzi eri ng’ejjinja ery’omufuusa mu maaso g’oyo agigaba,
    alowooza nti buli gy’akyukira eneemuyamba.

^9 (AD)Okwagala tekulondoola nsobi,
    naye oyo atasonyiwa nsobi akyawaganya ab’omukwano enfirabulago.

¹⁰ Okunenya kuyamba nnyo omuntu ategeera,
    okusinga okukuba omusirusiru embooko ekikumi.

¹¹ Omukozi w’ebibi anoonya bujeemu bwereere,
    era kyaliva asindikirwa omubaka omukambwe.

¹² Okusisinkana eddubu enyagiddwako abaana baayo,
    kisinga okusisinkana omusirusiru mu busirusiru bwe.

^14 (AF)Okutandika oluyombo kuli ng’omuntu bw’asumulula omudumu gw’amazzi,
    noolwekyo vvaawo ng’oluyombo terunnatandika.

^15 (AG)Eyejjeereza omukozi w’ebibi n’oyo avumirira omutuukirivu,
    bombi ba muzizo eri Mukama.

^16 (AH)Omusirusiru agasibwa ki okuba ne ssente ezisasulibwa amagezi,
    ng’ate ye talina mutima gwegomba magezi?

¹⁷ Omukwano ogw’amagezi guba gwa lubeerera,
    era owooluganda yeesigibwa mu biro eby’ennaku.

^18 (AI)Omuntu atalina magezi awa obweyamo
    ne yeetema okusasula amabanja ga muliraanwa we.

¹⁹ Oyo ayagala ekibi anyumirwa ennyombo,
    n’oyo akola omulyango omunene ogw’omu maaso gwa bbugwe ye nga guyitiridde obunene gulimuteganya nnyo.

²⁰ Omuntu ow’omutima omubambaavu takulaakulana,
    n’oyo ow’olulimi olulimba agwa mu katyabaga.

^21 (AJ)Omwana omusirusiru aleetera kitaawe obuyinike,
    kitaawe w’omusirusiru taba na ssanyu.

^22 (AK)Omutima ogw’essanyu ddagala ddungi,
    naye omwoyo omunyiikaavu gukozza omubiri.

^23 (AL)Omuntu omubi alya enguzi mu kyama,
    alyoke aziyize amazima okweyoleka.

^24 (AM)Omuntu omutegeevu, ebirowoozo abissa eri amagezi,
    naye amaaso g’omusirusiru gasamaalirira ensi gy’ekoma.

^25 (AN)Omwana omusirusiru buyinike eri kitaawe,
    era aleeta ennaku eri nnyina eyamuzaala.

^26 (AO)Si kirungi okuweesa omutuukirivu engassi ey’obwereere
    wadde okukuba ab’ekitiibwa embooko olw’obwesimbu bwabwe.

^27 (AP)Omuntu omwegendereza mu bigambo bye abeera n’okutegeera,
    n’oyo alina omwoyo omuteefu aba muntu wa magezi.

^28 (AQ)Omusirusiru bw’asirika alowoozebwa okuba n’amugezi,
    era aba mutegeevu bw’afuga akamwa ke.

^2 (AR)Omusirusiru tasanyukira kutegeera,
    ky’asanyukira kyokka kwe kwogera by’alowooza.

³ Okukola ekibi bwe kujja n’okunyooma kujjirako,
    era awali okuyisaamu omuntu amaaso wabaawo okunyoomoola.

⁴ Ebigambo by’omu kamwa k’omuntu mazzi ga buziba,
    naye ensulo ey’amagezi mugga ogukulukuta.

^5 (AS)Si kirungi kuttira mubi ku liiso,
    oba okusaliriza omutuukirivu.

⁶ Akamwa k’omusirusiru kamuleetera entalo
    era akamwa ke kamuleetera okukubwa emiggo.

^7 (AT)Akamwa k’omusirusiru ke kamuleetera okuzikirira,
    era n’emimwa gye mutego eri emmeeme ye.

^8 (AU)Ebigambo by’omuntu ageya biri ng’emmere ewoomerera,
    bigenda mu bitundu by’omubiri eby’ewala.

^9 (AV)Omuntu omugayaavu mu mirimu gy’akola,
    waluganda n’oyo azikiriza.

^10 (AW)Erinnya lya Mukama kigo ky’amaanyi,
    omutuukirivu addukira omwo n’afuna emirembe.

^11 (AX)Obugagga bw’omugagga, kye kibuga kye ekiriko bbugwe ow’amaanyi,
    era mu kulaba kwe, kigo kye ekigumu ekitarinnyika.

^12 (AY)Omuntu nga tannagwa, omutima gwe gwegulumiza, naye okwetoowaza kumuweesa ekitiibwa.

^13 (AZ)Oyo addamu amangu mu nsonga gy’ateetegerezza,
    buba busirusiru bwe era buswavu.

^14 (BA)Omwoyo gw’omuntu gumuwanirira mu bulwadde,
    naye emmeeme eyennyise ani ayinza okugigumiikiriza?

^15 (BB)Omutima gw’omwegendereza guyiga okumanya,
    amatu g’omuntu omugezi gawuliriza.

^16 (BC)Ekirabo ky’omuntu kimuseguliza,
    era kimutuusa ne mu maaso g’abeekitiibwa.

¹⁷ Asooka okweyogerako y’afaanana ng’omutuufu,
    okutuusa omulala lw’amubuuza ebibuuzo.

^18 (BD)Okukuba akalulu kimalawo empaka,
    era kisalawo eggoye wakati w’abawakana ab’amaanyi.

¹⁹ Kyangu okuwamba ekibuga ekiriko bbugwe ow’amaanyi, okusinga okukomyawo owooluganda anyiize,
    era ennyombo ziba ng’empagi z’ekigo.

^20 (BE)Omuntu anakkutanga ebigambo ebiva mu kamwa ke;
    ebibala ebijjula akamwa ke bye binamukkusanga.

^21 (BF)Olulimi lulina obuyinza okuwa obulamu oba okutta,
    era n’abo abalwagala balirya ebibala byalwo.

^22 (BG)Azuula omukazi omulungi ow’okuwasa aba azudde ekirungi,
    era aganja eri Mukama.

²³ Omwavu yeegayirira,
    naye omugagga addamu na bbogo.

^24 (BH)Akwana emikwano emingi yeereetera okuzikirira,
    naye wabaawo ow’omukwano akwagala ennyo okusinga owooluganda.