Chronological

Si David ay Ginawang Hari ng Israel at Juda^(A)

5 Pagkatapos ay pumaroon ang lahat ng mga lipi ng Israel kay David sa Hebron, na nagsasabi, “Kami ay iyong buto at laman.

² Sa nakaraang panahon, nang si Saul ay hari sa amin, ikaw ang nangunguna at nagdadala sa Israel. Sinabi ng Panginoon sa iyo, ‘Ikaw ay magiging pastol ng aking bayang Israel at ikaw ay magiging pinuno sa Israel.’”

³ Kaya't pumunta ang lahat ng matatanda sa Israel sa hari na nasa Hebron; at si Haring David ay nakipagtipan sa kanila sa Hebron sa harap ng Panginoon at kanilang binuhusan ng langis si David bilang hari sa Israel.

⁴ Si^(B) David ay tatlumpung taong gulang nang siya'y magsimulang maghari, at siya'y nagharing apatnapung taon.

⁵ Sa Hebron ay naghari siya sa Juda ng pitong taon at anim na buwan; at sa Jerusalem ay naghari siya ng tatlumpu't tatlong taon sa buong Israel at Juda.

Ang Zion ay Sinakop

⁶ Ang^(C) hari at ang kanyang mga tauhan ay pumunta sa Jerusalem laban sa mga Jebuseo na naninirahan sa lupain, na nagsabi kay David, “Hindi ka makakapasok dito, kundi ang mga bulag at pilay ang hahadlang sa iyo,” na iniisip, “Si David ay hindi makakapasok dito.”

⁷ Gayunma'y sinakop ni David ang kuta ng Zion na siyang lunsod ni David.

⁸ Sinabi ni David nang araw na iyon, “Sinumang sumalakay sa mga Jebuseo ay umakyat siya sa inaagusan ng tubig upang salakayin ang pilay at ang bulag, na kinapopootan ng kaluluwa ni David.” Kaya't kanilang sinasabi, “Ang mga bulag at pilay ay hindi makakapasok sa bahay.”

⁹ Nanirahan si David sa kuta at tinawag itong lunsod ni David. At itinayo ni David ang lunsod sa palibot mula sa Milo hanggang sa loob.

¹⁰ Si David ay dumakila ng dumakila, sapagkat ang Panginoon, ang Diyos ng mga hukbo ay kasama niya.

Si David ay Ginawang Hari ng Buong Israel^(A)

11 Nang magkagayon, ang buong Israel ay sama-samang nagtipon kay David sa Hebron, at sinabi, “Kami ay iyong buto at laman.

² Nang mga panahong nakaraan, maging noong hari pa si Saul, ikaw ang pumapatnubay at namumuno^[a] sa Israel, at sinabi sa iyo ng Panginoon mong Diyos, ‘Ikaw ay magiging pastol ng aking bayang Israel, at ikaw ay magiging pinuno ng aking bayang Israel.’”

³ Kaya't lahat ng matatanda sa Israel ay pumunta sa hari na nasa Hebron. Si David ay gumawa ng tipan sa kanila sa Hebron sa harapan ng Panginoon, at kanilang binuhusan ng langis si David bilang hari sa Israel, ayon sa salita ng Panginoon sa pamamagitan ni Samuel.

Sinakop ni David ang Zion

⁴ Si^(B) David at ang buong Israel ay pumunta sa Jerusalem na siyang Jebus, na kinaroroonan ng mga Jebuseo, ang mga naninirahan sa lupain.

⁵ At sinabi ng mga naninirahan sa Jebus kay David, “Ikaw ay hindi makakapasok dito.” Gayunma'y sinakop ni David ang muog ng Zion na ngayo'y lunsod ni David.

⁶ Sinabi ni David, “Sinumang unang sumalakay sa mga Jebuseo ay magiging pinuno at kapitan.” Si Joab na anak ni Zeruia ay unang umahon kaya't siya'y naging pinuno.

⁷ At si David ay nanirahan sa muog kaya't kanilang tinawag iyon na lunsod ni David.

⁸ Kanyang itinayo ang bayan sa palibot mula sa Milo hanggang sa palibot, at inayos ni Joab ang ibang bahagi ng lunsod.

⁹ Si David ay patuloy na naging dakila sapagkat ang Panginoon ng mga hukbo ay kasama niya.

Ang Magigiting na Mandirigma ni David^(C)

¹⁰ Ang mga ito ang mga pinuno ng magigiting na mandirigma ni David na tumulong sa kanya sa kanyang kaharian, kasama ng buong Israel, upang gawin siyang hari, ayon sa salita ng Panginoon tungkol sa Israel.

¹¹ Ito ang bilang ng magigiting na mandirigma ni David: si Jasobeam, anak ng isang Hacmonita, na pinuno ng tatlumpu.^[b] Siya ang nagtaas ng kanyang sibat laban sa tatlong daan, at kanyang pinatay sila nang minsanan.

¹² Kasunod niya ay si Eleazar na anak ni Dodo na Ahohita, isa sa tatlong magigiting na lalaki.

¹³ Siya'y kasama ni David sa Pasdamin nang ang mga Filisteo ay nagtipon upang lumaban. Mayroong kapirasong lupain na puno ng sebada, at ang mga lalaki ay tumakas sa mga Filisteo.

¹⁴ Ngunit sila'y tumayo sa gitna ng lupain at ipinagtanggol ito at pinatay ang mga Filisteo; at iniligtas sila ng Panginoon sa pamamagitan ng isang malaking tagumpay.

¹⁵ Tatlo sa tatlumpung pinuno ang bumaba kay David sa malaking bato sa loob ng yungib ng Adullam, nang ang hukbo ng mga Filisteo ay nakahimpil sa libis ng Refaim.

¹⁶ Noon, si David ay nasa muog, at ang pulutong ng mga Filisteo ay nasa Bethlehem.

¹⁷ At sinabi ni David na may pananabik, “O may magbigay sana sa akin ng tubig na maiinom mula sa balon ng Bethlehem na nasa tabi ng pintuang-bayan!”

¹⁸ At ang tatlo ay pumasok sa kampo ng mga Filisteo, at sumalok ng tubig sa balon ng Bethlehem na nasa tabi ng pintuang-bayan, at kinuha at dinala kay David. Ngunit ayaw ni David na inumin iyon, kundi ibinuhos ito sa Panginoon,

¹⁹ at sinabi, “Huwag itulot sa akin ng aking Diyos na aking gawin ito. Iinumin ko ba ang dugo ng mga lalaking ito? Sapagkat kanilang inilagay sa panganib ang kanilang buhay sa pagkuha nito.” Kaya't hindi niya mainom iyon. Ang mga bagay na ito ay ginawa ng tatlong mandirigma.

²⁰ At si Abisai na kapatid ni Joab, ay pinuno ng tatlumpu. Kanyang itinaas ang kanyang sibat laban sa tatlong daan at sila'y kanyang pinatay, at nagkaroon ng pangalan kasama ng tatlo.

²¹ Sa tatlo, siya'y lalong marangal kaysa dalawa, at ginawang kanilang pinunong-kawal: gayon ma'y hindi siya napasama sa tatlo.

²² Si Benaya na anak ni Jehoiada ay isang matapang na lalaki ng Kabzeel na gumawa ng mga dakilang gawa. Kanyang pinatay ang dalawang anak ni Ariel na taga-Moab. Siya'y bumaba rin at pumatay ng isang leon sa isang hukay nang araw na bumagsak na ang yelo.

²³ Siya'y pumatay ng isang Ehipcio na isang lalaking matipuno na may limang siko ang taas. Sa kamay ng Ehipcio ay may isang sibat na gaya ng panghabi ng manghahabi; ngunit si Benaya ay bumaba sa kanya na may tungkod at inagaw ang sibat sa kamay ng Ehipcio, at kanyang pinatay siya ng kanyang sariling sibat.

²⁴ Ang mga bagay na ito ay ginawa ni Benaya na anak ni Jehoiada, at siya ay naging tanyag tulad ng tatlong mandirigma.

²⁵ Siya'y kilala sa tatlumpu, ngunit hindi siya napasama sa tatlo, at ginawa siya ni David na pinuno ng mga tanod.

²⁶ Ang mga mandirigma sa mga hukbo ay sina Asahel na kapatid ni Joab, si Elhanan na anak ni Dodo na taga-Bethlehem;

²⁷ si Samoth na Arorita, si Heles na Pelonita;

²⁸ si Ira na anak ni Ikkes na taga-Tekoa, si Abiezer na taga-Anatot;

²⁹ si Shibecai na Husatita, si Ilai na Ahohita;

³⁰ si Maharai na taga-Netofa, si Heled na anak ni Baana na taga-Netofa;

³¹ si Ithai na anak ni Ribai na taga-Gibea, sa mga anak ni Benjamin, si Benaya na taga-Piraton;

³² si Hurai sa mga batis ng Gaas, si Abiel na Arbatita;

³³ si Azmavet na Baharumita, si Eliaba na Saalbonita;

³⁴ ang mga anak ni Asem na Gizonita, si Jonathan na anak ni Saje na Hararita;

³⁵ si Ahiam na anak ni Sacar, na Hararita, si Elifal na anak ni Ur;

³⁶ si Hefer na Meceratita, si Ahia na Felonita;

³⁷ si Hesro na Carmelita, si Nahari na anak ni Ezbai;

³⁸ si Joel na kapatid ni Natan, si Mibhar na anak ni Agrai,

³⁹ si Selec na Ammonita, si Naarai na Berotita, na tagadala ng sandata ni Joab na anak ni Zeruia;

⁴⁰ si Ira na Itreo, si Gareb na Itreo;

⁴¹ si Urias na Heteo, si Zabad na anak ni Ahli;

⁴² si Adina na anak ni Siza na Rubenita, na pinuno ng mga Rubenita, at tatlumpu ang kasama niya;

⁴³ si Hanan na anak ni Maaca, at si Joshafat na Mitnita;

⁴⁴ si Uzia na Astarotita, si Samma at si Jehiel na mga anak ni Hotam na Harorita;

⁴⁵ si Jediael na anak ni Simri; at si Joha na kanyang kapatid, na Tisaita;

⁴⁶ si Eliel na Mahavita, at si Jeribai, at si Josabias na mga anak ni Elnaam, at si Itma na Moabita;

⁴⁷ si Eliel, si Obed, si Jaasiel, na Mesobiata.

Ang mga Kaibigan ni David sa Siclag

12 Ang mga ito ang pumunta kay David sa Siclag, habang siya'y hindi malayang makagalaw dahil kay Saul na anak ni Kish. Sila'y kabilang sa magigiting na mandirigma na tumulong sa kanya sa digmaan.

² Sila'y mga mamamana at nakakatudla ng pana at nakapagpapakawala ng mga bato sa pamamagitan ng kanan o kaliwang kamay. Sila'y mga taga-Benjamin, mga kamag-anak ni Saul.

³ Ang pinuno ay sina Ahiezer at Joas, na mga anak ni Shemaa na taga-Gibea; at sina Jeziel at Pelet, na mga anak ni Azmavet; at sina Beraca at Jehu na taga-Anatot;

⁴ si Ismaias na Gibeonita, isang mandirigma na kabilang sa tatlumpu at pinuno ng tatlumpu; sina Jeremias, Jahaziel, Johanan, at Jozabad ng Gedera;

⁵ sina Eluzai, Jerimot, Bealias, Shemarias, at Shefatias na Harufita;

⁶ sina Elkana, Ishias, Azarel, Joezer, at Jasobeam, na mga Korahita;

⁷ sina Joela, at Zebadias, na mga anak ni Jeroham na taga-Gedor.

Ang mga Gadita na Nagsisunod kay David

⁸ At sa mga Gadita ay sumama kay David sa muog sa ilang ang magigiting at bihasang mandirigma, sanay sa kalasag at sibat; na ang mga mukha nila ay gaya ng mga mukha ng mga leon, at sila'y maliliksing gaya ng mga usa sa mga bundok:

⁹ si Eser ang pinuno, si Obadias ang ikalawa, si Eliab ang ikatlo;

¹⁰ si Mismana ang ikaapat, si Jeremias ang ikalima;

¹¹ si Attai ang ikaanim, si Eliel ang ikapito;

¹² si Johanan ang ikawalo, si Elzabad ang ikasiyam;

¹³ si Jeremias ang ikasampu, si Macbani ang ikalabing-isa.

¹⁴ Ang mga anak na ito ni Gad ay mga pinunong-kawal ng hukbo; ang pinakamaliit ay higit sa isang daan, at ang pinakamalaki ay higit sa isang libo.

¹⁵ Ito ang mga lalaking nagsitawid sa Jordan sa unang buwan, nang ito'y umaapaw sa lahat nitong mga pampang, at kanilang pinatakas ang lahat ng nasa mga libis, sa silangan, at sa kanluran.

¹⁶ Pumunta sa muog na kinaroroonan ni David ang ilan sa mga anak ni Benjamin at Juda.

¹⁷ Si David ay lumabas upang salubungin sila at sinabi sa kanila, “Kung kayo'y pumarito sa akin para sa kapayapaan at upang tulungan ako, ang aking puso ay mapapalakip sa inyo. Ngunit kung upang ipagkanulo ako sa aking mga kaaway, gayong walang kasamaan sa aking mga kamay, makita nawa ito ng Diyos ng ating mga ninuno at sawayin kayo.”

¹⁸ At ang Espiritu ay dumating kay Amasai na pinuno ng tatlumpu, at sinabi niya, “Kami ay sa iyo, David, at kasama mo, O anak ni Jesse! Kapayapaan, kapayapaan ang sumaiyo, at kapayapaan sa iyong mga katulong; sapagkat tinutulungan ka ng iyong Diyos.” Nang magkagayo'y tinanggap sila ni David at ginawa silang mga pinunong-kawal ng kanyang hukbo.

¹⁹ Ang ilan sa mga tauhan ni Manases ay kumampi kay David, nang siya'y pumaroong kasama ng mga Filisteo upang lumaban kay Saul. Gayunman sila'y hindi niya tinulungan sapagkat ang mga pinuno ng mga Filisteo ay nagpulong at pinaalis siya, na sinasabi, “Malalagay lamang sa panganib ang ating buhay sapagkat kakampi pa rin siya sa kanyang panginoong si Saul.”

²⁰ Sa pagpunta niya sa Siklag, ang mga tauhang ito ni Manases ay kumampi sa kanya: sina Adnas, Jozabad, Jediael, Micael, Jozabad, Eliu, at Siletai, na mga pinunong-kawal ng mga libu-libo sa Manases.

²¹ Kanilang tinulungan si David laban sa pulutong ng mga magnanakaw, sapagkat silang lahat ay matatapang na mandirigma at mga pinunong-kawal sa hukbo.

²² Sa araw-araw ay may mga taong pumupunta kay David upang tumulong sa kanya, hanggang sa nagkaroon ng malaking hukbo, gaya ng isang hukbo ng Diyos.

Ang Ibang mga Kaibigan ni David

²³ Ito ang mga bilang ng mga pangkat ng hukbong nasasandatahan na pumunta kay David sa Hebron, upang ibigay ang kaharian ni Saul sa kanya, ayon sa salita ng Panginoon.

²⁴ Ang mga anak ni Juda na humahawak ng kalasag at sibat ay anim na libo at walong daang hukbong nasasandatahan.

²⁵ Sa mga anak ni Simeon, pitong libo at isandaang magigiting na mandirigma.

²⁶ Sa mga anak ni Levi ay apat na libo at animnaraan.

²⁷ At kasama ni Jehoiada na pinuno ng sambahayan ni Aaron ang tatlong libo at pitong daan;

²⁸ at si Zadok, na isang binatang magiting na mandirigma, at ang dalawampu't dalawang pinunong-kawal mula sambahayan ng kanyang ninuno.

²⁹ Sa mga anak ni Benjamin, na mga kapatid ni Saul ay tatlong libo, sapagkat ang karamihan sa kanila ay nanatiling tapat sa sambahayan ni Saul.

³⁰ Sa mga anak ni Efraim ay dalawampung libo at walong daang magigiting na mandirigma, mga tanyag na lalaki sa mga sambahayan ng kanilang mga ninuno.

³¹ Sa kalahating lipi ng Manases ay labingwalong libo na itinalaga sa pamamagitan ng mga pangalan, upang pumaroon at gawing hari si David.

³² Sa mga anak ni Isacar na nakakaunawa ng mga panahon, upang malaman kung ano ang marapat gawin ng Israel ay dalawandaang pinuno, at ang lahat nilang kapatid ay nasa kanilang pamumuno.

³³ Sa Zebulon ay limampung libong sanay sa pakikipaglaban na handa sa lahat ng uri ng sandatang pandigma, at may iisang layuning tumulong.

³⁴ Sa Neftali ay isanlibong pinunong-kawal at may kasamang tatlumpu't pitong libong katao na may kalasag at sibat.

³⁵ Sa mga Danita ay dalawampu't walong libo at animnaraan na handa para sa pakikipaglaban.

³⁶ Sa Aser ay apatnapung libong kawal na sanay sa pakikipaglaban at handa sa digmaan.

³⁷ At sa mga Rubenita, mga Gadita, at sa kalahating lipi ni Manases, mula sa kabilang ibayo ng Jordan ay isandaan at dalawampung libong katao na mayroong lahat ng uri ng sandatang pandigma.

Ang mga Tumulong kay David upang Maging Hari

³⁸ Lahat ng mga ito, mga mandirigmang handa sa pakikipaglaban, ay pumunta sa Hebron na may buong layunin na gawing hari si David sa buong Israel. Gayundin, ang iba pa sa Israel ay nagkaisa na gawing hari si David.

³⁹ Sila'y naroong kasama ni David sa loob ng tatlong araw, kumakain at umiinom, sapagkat ipinaghanda sila ng kanilang mga kapatid.

⁴⁰ Gayundin ang kanilang mga kalapit-bayan, hanggang sa Isacar, Zebulon at Neftali ay dumating na may dalang tinapay na nasa mga asno, mga kamelyo, mga mola, mga baka, mga sari-saring pagkain, mga tinapay na igos, mga buwig ng pasas, alak at langis, mga baka at tupa, sapagkat may kagalakan sa Israel.