◀ All Reading Plans / Book of Common Prayer / Ps. [83] or 146 147; Ps. 85 86; Esther 7:1–10; Acts 19:11–20; Luke 4:14–30 (Awadhi Bible: Easy-to-Read Version)

Prev Day

September 26, 2024

Next Day

Use the calendar to view readings from this devotional.

September 2024
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 83

आसाफ क एक ठु भजन।

¹हे परमेस्सर, तू मौन जिन रहा! चुपचाप जिन रहा।
    हे सर्वसक्तिमान परमेस्सर,
    कृपा कइके सान्त जिन रहा।
²हे परमेस्सर, तोहार दुस्मन तोहरे विरोध मँ सड्यंत्र रचत बाटेन।
    जउन तोहसे घिना करत हीं अहंकारी बन जात हीं।
³उ पचे तोहरे मनवइयन क खिलाफ सडयंत्र रचत बाटेन।
    तोहार दुस्मन ओन लोगन क खिलाफ जउन तोहका पिआरा अहइँ सबइ जोजना बनावत अहइँ।
⁴उ सबइ दुस्मन कहत अहइँ, “आवा, हम ओन लोगन क पूरी तरह मेट डाइ।
    तब कउनो भी मनई इस्राएल क नाउँ सुमिरन नाहीं करी।”
⁵काहेकि इ सबहिं रास्ट्रन इकट्ठा होइके तोहरे विरोध मँ जोजना बनावत हीं।
    उ पचे तोहार खिलाफ एक ठ समझौता किहेन।
^6-7उ पचे इ सामिल परिवारन एदोमी, इस्माएली, मोआबी अउर हाजिरा क संतानन क पूतन,
    गबाली अउर, अम्मोनी, अमालेकी अउर पलिस्ती,
    अउर सूर क लोगन क परिवारन क इ सबइ लोग हम लोगन क खिलाफ जुद्ध करइ बरे एक जुट होइ गएन।
⁸हिआँ तलक कि अस्सूरी भी ओन लोगन स मिल गएन।
    उ पचे लूत क संतानन क बहोत बलवान बनाएन।

⁹हे परमेस्सर तू दुस्मनन क वइसेन हरावा जइसेन तू मिद्यानी लोगन क,
    सिसरा क, यार्बान क, किसोन नदी क लगे याबीन क हराया।
¹⁰उ पचे एन्दोर मँ नास भएन।
    ओनकर ल्हासन धरती पइ पड़ी सड़त रहिन।
¹¹दुस्मनन क सेनापतियन क वइसेन हरावा जइसेन तू ओरबे अउ जायेब क संग किहे रह्या।
    ओकरे सेनापतियन क वइसेन हरावा जइसेन तू जेबह अउ सलमुन्ना क संग किहा।
¹²हे परमेस्सर, उ सबइ लोग हम पचन क धरती
    तजइ क दबावइ चाहत रहेन।
¹³मोर परमेस्सर ओनका तू उखड़ा भवा पौधा सा बनावा जेका आँधी उड़ाइ लइ जात ह।
    ओन लोगन क अइसेन बिखराइ द्या जइसे भूसा क आँधी बिखराइ देत ह।
¹⁴दुस्मन क अइसेन बर्बाद करा जइसे वन क आगी बृच्छन क बर्बाद करत ह,
    अउर जइसेन जंगली आगी पहाड़न क बार डावत ह।
¹⁵एह बरे ओनका आँधी क नाईं पाछा करा अउर ओनका कँपावा
    अउ फूँकिके उड़ा द्या जइसे कि आँधी करत ह।
¹⁶हे यहोवा उ सबइ क लज्जा स भरि द्या
    कि लोग तोहरे बारे मँ जानइ बरे तोहका तलास करइँ।
¹⁷हे यहोवा, ओन लोगन क भयभीत कइ द्या अउ ओन लोगन क हमेसा अपमानित करा,
    ताकि उ तिरस्कार मँ मरि जाइँ।
¹⁸तउ उ पचे जनिहीं कि तू यहोवा अहा!
    अउर तू ही अकेल्ला सर्वोच्च परमेस्सर अहइ
    जउन सारे संसार पइ सासन करत अहा।

भजन संहिता 146-147

¹यहोवा क गुणगान करा।
    मोर मनवा, यहोवा क बड़कई करा।
²मइँ आपन जिन्नगी भइ यहोवा क गुण गाउब।
    मइँ जब तलक जिअब आपन परमेस्सर बरे संगीत बजावत रहब।
³आपन प्रमुखन क भरोसे जिन रहा।
    मदद पावइ बरे मनई क भरोसे जिन रहा, काहेकि तोहका मनई बचाइ नाहीं सकत ह।
⁴लोग मर जात हीं अउर दफनाइ दीन्ह जात हीं।
    फुन ओनकर मदद देइ क सबहिं जोजना यूँ ही चली जात हीं।
⁵ओनका धन्य होइ जउन याकूब क परमेस्सर क आपन सहायक क रूप मँ राखेस ह।
    ओनका धन्य होइ जउन यहोवा आपन परमेस्सर क भरोसे रहा करत हीं।
⁶उ सरग अउ धरती क बनाएस ह।
    उ सागर अउर ओहमाँ क हर चिजियन क बनाएस ह।
उ हमेसा बिस्सासी रही।
⁷उ सताया भवा लोगन क संग उचित बेउहार करत ह।
    उ भुखान लोगन क भोजन देत ह।
यहोवा बन्दी लोगन क छोड़ाइ दिया करत ह।
⁸    यहोवा आँधर क आँखियन क खोलि दिहेस।
यहोवा ओन लोगन क सहारा देत ह जउन ठोकर खाएन हीं।
    यहोवा सच्चे लोगन स पिरेम करत ह।
⁹यहोवा हमरे देस मँ रहइवालन बिदेसियन क रच्छा करत ह।
    यहोवा अनाथन अउ राँड़ मेहररूअन क धियान रखत ह।
    किन्तु दुर्जनन क मकसदन क विफल करत ह
¹⁰यहोवा सदा राजा क रूप मँ सासन करत रहइ।
    हे सिय्योन तोहार परमेस्सर पीढ़ी दर पीढ़ी राज करत रहइ।

यहोवा क गुणगान करा।

¹यहोवा क बड़कई करा काहेकि उ नीक अहइ।
    हमरे परमेस्सर क स्तुति क गीत गावा,
    काहेकि इ नीक अहइ अउ ओकरे बरे सुखदायी अहइ।
²उ यहोवा अहइ जउन यरूसलेम क बनाएस ह।
    उ उहइ जउन ओन लोगन क एक संग जमा किहेस ह जेनका इस्राएल स तितर-बितर कीन्ह गवा रहा।
³परमेस्सर ओनकर टूटे मनवा क चंगा करत रहत
    अउर ओनकर घावन पइ पट्टी बाँधत रहा।
⁴परमेस्सर तारन क गनत ह
    अउर हर एक तारा क नाउँ जानत ह।
⁵हमार सुआमी बहोत महान अउर सक्तीसाली अहइ।
    ओकरे गियान क सीमा न अहइ।
⁶यहोवा दीन लोग क सहारा देत ह।
    उ दुट्ठ लोगन क खाले मँ हींच लेत ह।
⁷गाइके यहोवा क धन्यवाद द्या।
    हमरे परमेस्सर क गुणगान वीणा क संग करा।
⁸उ बादरन स अकासे क ढाँपत ह।
    उ धरती पइ बर्खा करावत ह।
    उ पहाड़न पइ हरी घास क उगावत ह।
⁹उ गोरूअन क अउर नान्ह कउअन क
    जउन ओकरे मदद बरे गोहरावत हीं, चारा देत ह।
¹⁰ओका जुद्ध क घोड़न
    अउर सक्तिसाली सैनिक नाहीं भावत हीं।
¹¹यहोवा ओन लोगन स प्रसन्न होत ह, जउन ओकर सम्मान करत हीं।
    यहोवा प्रसन्न अहइ, अइसे ओन लोगन स जेनकर आस्था ओकरे सच्चे पिरेम मँ अहइ।
¹²हे यरूसलेम, यहोवा क गुण गावा।
    सिय्योन, आपन परमेस्सर क बड़कई करा।
¹³हे यरूसलेम, तोहरे फाटकन क परमेस्सर सुदृढ़ बनावत ह।
    तोहरे नगर क लोगन क परमेस्सर असीस देत ह।
¹⁴परमेस्सर तोहार देस क सान्ति स आसीस देत ह,
    एह बरे तोहरे लगे खाइ बरे अनाज क ढेर अहइ।
¹⁵परमेस्सर धरती क आदेस देत ह
    अउर ओकर आदेस क फउरन पालन होत ह।
¹⁶परमेस्सर धरती पइ तब तलक पाला गिरावत जब तलक धरातल वइसा सफेद नाहीं होइ जात जइसा उज्जर ऊन होत ह।
    उ बर्फ क छोटा टूकन क हवा क संग धूरि क नाई उड़त ह।
¹⁷परमेस्सर ओलन क अइसा बनावत ह मानो पाथरन अकासे स गिरत हीं।
    कउनो मनई उ ठिठुरन क नाहीं सह सकत ह जउन ओकरे दुआरा भेजा जात ह।
¹⁸फुन परमेस्सर दूसर आग्या देत ह, अउर गरम हवा फुन बहइ लग जात ह।
    बर्फ टेघरइ लागत अउर जल बहइ लग जात ह।
¹⁹परमेस्सर आपन आदेस याकूब क दिहे रहा।
    परमेस्सर इस्राएल क निज बिधि क बिधान अउ नेमन क दिहस।
²⁰यहोवा कउनो दूसर रास्ट्र क बरे अइसा नाहीं किहस।
    परमेस्सर आपन नेमन क, कउनो दूसर जाति क नाहीं सिखाएस।

यहोवा क जस गावा।

भजन संहिता 85-86

संगीत निर्देसक बरे कोरह क पूतन बरे एक ठु भजन।

¹हे यहोवा, तू आपन देस पइ कृपालु भवा।
तू विदेस भुइँया मँ स याकूब क सन्तानन वापिस लिआवा।
²हे यहोवा, तू आपन लोगन क पापन्क छिमा करा।
तू ओनकर सबइ पाप मेट द्या। (सेला)

³हे यहोवा, कोहाइ जाब क तजि द्या।
    अउर तू आपन गुस्सा क लइ लिहा।
⁴परमेस्सर, हमार मुक्तिदाता, कृपा कइके हम पचन पइ कोहाइ जाब तजि द्या
    अउर हम लोगन क फुन हमार भुइयाँ पइ वापिस लइ आवा।
⁵का तू हमेसा हमेसा कोहान रहब्या?
    का तू सदा आपन कोहान जारी रखब्या?
⁶कृपा कइके हमका फुन जिआइ द्या
    ताकि तोहार लोग तोहसे फुन स खुस होइ सकइँ।
⁷हे यहोवा, तू हमका आपन बिस्सासनीय पिरेम देखावा।
    हमार रच्छा करा।

⁸जउन परमेस्सर कहत ह, मइँ ओह पइ कान दिहेउँ।
    उ अपने लोगन अउर अपने बिस्सासी चेलों से सान्ति क वाचा करत ह
    उ नाहीं चाहत ह कि उ पचे बेवकूफी क राहे पइ लउटि जाइँ।
⁹फुरइ, ओकर उद्धार ओन लोगन क निचके बाटइ जउन ओहसे डेरात ह,
    एह बरे ओकर महिमा तोहार देस मँ निवास करी।
¹⁰पिरेम अउर सच्चाई एक साथ मिलब।
    धर्मता अउ सान्ति एक दूसर क चुम्मा क संग स्वागत करिहीं।
¹¹सच्चाई धरती स अंकुरित होइहीं,
    अउर धार्मिकता अकासे स बसिर्हीं।
¹²यहोवा बहोत स उत्तिम वस्तुअन क देइहीं।
    अउर हमार धरती प्रचुर मात्रा मँ फसल उपजिहीं।
¹³परमेस्सर क अगवा अगवा नेकी चली,
    अउर उ ओकरे बरे राह बनाई।

दाऊद क पराथना।

¹मइँ एक दीन, असहाय मनई अहउँ।
    हे यहोवा, तू कृपा कइके मोर सुनि ल्या, अउर तू मोर विनती क जवाब द्या।
²मइँ तोहार भगत हउँ, कृपा कइके मोर रच्छा करा।
    मइँ तोहार सेवक अहउँ अउर तू मोर परमेस्सर अहा।
    मइँ तोह पइ भरोसा किहेउँ, कृपा कइके मोका बचावा।
³मोर सुआमी, मोह पइ दाया करा।
    मइँ सारा दिन तोहार बिनती करत रहत हउँ।
⁴हे मोर यहोवा, मइँ आपन जिन्नगी तोहार हाथन मँ देत हउँ।
    हे मोर सुआमी, मोका, आपन सेवक क सुखी बनावा।
⁵हे सुआमी, तू नीक अउ छिमाकर्ता अहा।
    तू आपन मनवइयन स बहोत पिरेम करत अहा, जउन सहारा पावइ क तोहका गोहरावत हीं।
⁶हे यहोवा, मोर बिनती सुनि ल्या।
    कृपा कइके तू आपन कान क मोर पराथना पइ दाया बरे द्या।
⁷हे यहोवा, आपन संकट क घरी मँ मइँ तोहार बिनती करत हउँ।
    मइँ जानत हउँ तू मोका जवाब देब्या।
⁸हे सुआमी, तोहरे जइसा कउनो देवता नाहीं अहइ।
    जइसेन काम तू किहा ह वइसा काम कउनो भी नाहीं कइ सकत।
⁹हे सुआमी, तू ही सब लोगन क रच्या ह।
    उ पचे आइहीं अउर तोहार आराधना करिहीं।
    उ पचे सबहिं तोहरे नाउँ क आदर करिहीं।
¹⁰हे परमेस्सर, तू महान अहा।
    तू अजूबा करम करत अहा।
    तू अकेल्ले ही परमेस्सर अहा।
¹¹हे यहोवा, मोका आपन राहन क सिच्छा द्या,
    तउ मइँ तोहरे सच्चाइ क अनुसार रहेबउँ।
कृपा कइके मोर मदद करा,
    तउ मइँ पूरे हिरदय स तोहार उपासना करबउँ।
¹²हे मोर सुआमी परमेस्सर, मइँ सम्पूर्ण हिरदय स तोहार गुण गावत हउँ।
    मइँ तोहरे नाउँ क आदर सदा सदा ही करबउँ।
¹³काहेकि तू मोका बहोत जिआदा पिरेम किहा ह।
    तू मोका मउत क गहड़ा खाइ स बचाया ह।
¹⁴परमेस्सर, अहंकारी लोग मोह पइ वार करत अहइँ।
    कर लोगन क समूह मोका मार डावइ चाहत अहइँ।
    अउर उ सबइ मनई तोहार आदर नाहीं करत अहइँ।
¹⁵हे सुआमी, तू दयालु अउ कृपा स भरा परमेस्सर अहा।
    तू धीरज स भरा, बिस्सासी अउ पिरेम स भरा अहा।
¹⁶हे परमेस्सर, देखावा कि तू मोर सुनत ह अउर मोह पइ कृपालु रहत ह।
    मइँ तोहार सेवक हउँ, तू मोका सक्ति द्या।
    मइँ तोहार सेवक हउँ, मोका बचावा!
¹⁷हे यहोवा, कछू अइसा करा जेहसे इ साबित होइ कि तू मोर सहायता करब्या।
    तब मोर दुस्मन एका जानिहीं अउ निरास होइ जइहीं।
    तउ इ परगट होइ तू उहइ अहा जउन मोर मदद किह्या अउर मोका आराम दिह्या।

एस्तेर 7

हामान क प्राण दण्ड

7 फुन राजा अउ हामान एक संग महारानी एस्तेर क भोज बरे चले गएन। ²एकरे पाछे जब उ पचे दुसरे दिन क भोज मँ दाखरस पिअत रहेन तउ राजा एस्तेर फुन एक सवाल किहस, “महारानी एस्तेर, तू मोहसे का माँगि चाहति अहा? जउन कछू तू माँगबिउ, पउबिउ। बतावा, तोहका का चाही? मइँ तोहका कछू भी दइ सकत हउँ। हिआँ तलक कि मोर आधा राज भी।”

³एइ पइ महारानी एस्तेर जवाब दिहेस, “हे महाराज! जदि मइँ तोहका भावतिउँ, अउर जदि इ तोहका प्रसन्न करत ह। तउ कृपा कइके मोका जिअइ दया अउर मइँ तोहसे इ चाहति हउँ कि मोरे लोगन क भी जिअइ दया। बस मइँ इहइ माँगति हउँ ⁴अइसा मइँ एह बरे चाहति हउँ कि मोका अउर मोरे लोगन क बिनास, हत्या अउ पूरी तरह स नष्ट कइ डावइ क बरे बेच डावा गवा ह। जदि हमका दासन क रुप मँ बेचा जात, तउ मइँ कछू नाहीं कहतिउँ काहेकि कउनो एतनी बड़ी समस्या नाहीं होत जेकरे बरे राजा क कस्ट दीन्ह जात।”

⁵एह पइ महाराजा छयर्स महारानी एस्तेर स पूछेस, “तोहरे संग अइसा कौन किहस? कहाँ अहइ उ मनई जउन तोहरे लोगन क संग अइसा बेउहार करइ क हिम्मत किहस?”

⁶एस्तेर कहेस, “हमार बिरोधी अउर हमार दुस्मन इ दुस्ट हामान ही अहइ।”

तब हामान राजा अउ रानी क सामने आतंकित होइ उठा। ⁷राजा बहोत कोहान रहा उ खड़ा भवा। उ आपन दाखरस हुवँइ तजि दिहस अउर बाहेर बगिया मँ चला गवा। मुला हामान, रानी एस्तेर स अपने प्राणन क भीख माँगइ बरे भीतर ही ठहरा रहा। हामान इ जानत रहा कि राजा ओकर प्राण लेइ क निहचइ कइ लिहस ह। एह बरे उ अपने प्राण क भीख माँगत रहा। ⁸राजा जइसे ही बगिया स भोज क कमरे कइँती वापस आवत रहा, तउ उ का लखत ह कि जउने बिछौने पइ एस्तेर ओलरी अहइ, ओह पइ हामान निहुरा भवा अहइ।

राजा किरोध भरे सुर मँ कहेस, “महल मँ मोर रहत भए महारानी पइ आक्रमण करइ क तोहार हिम्मत कइसा भवा।” जइसेन ही राजा का मुहँ स इ सबइ सब्द निकरेन, राजा क सेबकन भीतरे आइके हामान क मार डाएस। ⁹राजा क एक ठु हिजड़ा सेवक जेकर नाउँ हरर्बोना रहा, कहेस, “हुवाँ एक पचहत्तर फुट ऊँचा फाँसी क खम्बा जउन हामान क दुआरा ओकरे घरे क लगे मोर्दकै क फाँसी देइ बरे खड़ा किहा गवा ह। मोर्दकै उहइ मनई अहइ जउन तोहरी हत्या क सड्यंत्र बरे बताइके तोहर मदद किहे रहा।”

राजा बोला, “उ खम्भे पइ हामान क लटकाइ दीन्ह जाइ।”

¹⁰तउ उ पचे उहइ खम्भे पइ जेका उ मोर्दकै क बरे बनाए रहा हामान क लटकाइ दिहस। एकरे पाछे राजा किरोध करब तजि दिहेस।

प्रेरितन क काम 19:11-20

स्किबा क बेटवन

¹¹परमेस्सर पौलुस क हथवा चमत्कार करम करावत रहा। ¹²हिआँ तलक की ओकर छुआ रुमाल अउर अँगरखा क बेरामियन क लगे लइ जावा जात तउ ओऩकइ बेरामी जरटुट होइ जातिन अउर दुस्ट आतिमा ओहमाँ म पराइ जातिन।

^13-14कछू यहूदी लोग, जउन दुस्ट आतिमा क उतारत भए एहर ओहर टहरत डोलत रहेन, जिन मनइयन मँ दुस्ट आतिमन क सवारी होतिन, ओन पइ पर्भू ईसू क नाउँ क बइपरइ क जतन करतेन अउर कहतेन, “मइँ तोहका उ ईसू क नाउँ प जेकर प्रचार पौलुस करत वा, आदेस देत हउँ?” एक स्किबा नाउँ क यहूदी महा याजक क सात ठु बेटवन जब अइसा करत रहेन।

¹⁵तउ दुस्ट आतिमा (एक दाँई) ओनसे कहेस, “मइँ ईसू क पहिचानत हउँ अउर पौलुस क बारे मँ भी जानत हउँ, मुला तू पचे कउऩ अहा?”

¹⁶फिन उ मनई जेह पइ दुस्ट आतिमा सवार रही, ओन प कूदि पड़ी। उ ओन पइ काबू पाइके अउर ओनकर कपरा फाड़ दिहेस। उ ओनका खूबइ पीटेस अउर ओनकइ ओढ़ना फाड़ि डाएस। एहसे उ पचे बेबस्तर होइके अउर चोटाइके परानेन।

¹⁷इफिसुस मँ बसइया लोग सबहिं यहूदियन अउर यूनानी लोगन क इ बाते क पता लग गवा। उ सबइ लोग बहोतइ डेराइ गएऩ। इ तरह पर्भू ईसू क नाउँ क आदर अउर जिआदा बाढ़त गवा। ¹⁸ओहमाँ स बहोत स जउऩ बिसवास ग्रहण किहे रहेन, आपन स कीन्ह गवा कुकरम क सबन क समन्वा कबूलत भए हुवाँ आएन। ¹⁹जादूगर अउर टोनहन मँ स बहोतन आपन-आपन पोथी लइके हुवाँ बटोरि दिहेन अउर सब मनइयन क अगवा बारि दिहेन। ओऩ पोथिन क कीमत 50,000 चाँदी क सिक्का क बराबर कूता गवा। ²⁰इ तरइ पर्भू क बचन जिआदा असरदार होत भवा दूर दूर ताई फइल गवा।

लूका 4:14-30

ईसू का लोगन क उपदेस

(मत्ती 4:12-17; मरकुस 1:14-15)

¹⁴फिन ईसू आतिमा क समर्थ स भरा भवा गलील लौटि आवा अउर उ समूचे पहँटा मँ ओकर चर्चा फैलि गइ। ¹⁵उ ओनके आराधनालय मँ उपदेस दिहेस। सबइ ओकर प्रसंसा करत रहेन।

ईसू क आपन सहर मँ जाब

(मत्ती 13:53-58; मरकुस 6:1-6)

¹⁶फिन उ नासरत आवा जहाँ उ पला अउर बड़ा भवा। आपन आदत क मुताबिक सबित क दिन उ आराधनालय मँ गवा। जबहिं उ पाठ बाँचइ खड़ा भवा। ¹⁷तउ यसायाह नबी क किताब ओका दीन्ह गई। जब उ किताब खोलेस तउ ओका जगह मिला जहाँ लिखा रहा कि:

¹⁸“पर्भू क आतिमा मोरे मँ समाइ गइ
    अहइ काहेकि किहेस ह उ मोर अभिसेक कि दीनउँ क सुसमाचार सुनाउब
मइँ, उ मोका पठएस ह बंदीयन क इ बतावइ कि उ पचे अजाद अहइँ।
    आँधर क आँखिन मँ जोति सरसावइ,
अउर दलितन क छुटकारा देवॉवइ;
¹⁹    पर्भू क अनुग्रह क समइ बतावइ क भेजा अहइ!” ^(A)

²⁰फिन उ किताब क बंद कइके परिचारक क हथवा मँ दइ दिहस अउर बैठ गवा। आराधनालय मँ सबइ क आँखिन ओका निहारत रहिन। ²¹तब उ ओनसे कहब सुरु किहेस, “आज इ बचन तोहरे काने मँ पूर भवा!”

²²हर कउनो ओकरे बारे मँ अच्छी बातन कहत रहेन। ओकरे मुँहना स जउन सुन्दर बचन निकरत रहेन, ओन प सबन क अचरज भवा। उ पचे कहेन, “का इ यूसुफ क बेटवा नाहीं अहइ?”

²³फिन ईसू ओनसे कहेस, “तू पचे जरूर मोका इ कहावत सुनउब्या, ‘अरे वैद्य खुद आपन इलाज करा।’ कफरनहूम मँ तोहरे जउन काजे क बारे मँ हम पचे सुना ह, उ काजे क हिआँ आपन खुद क सहर मँ भी कइ डावा!” ²⁴ईसू तब ओनसे कहेस, “मइँ तोहसे सच कहत हउँ कि आपन सहर मँ कउनो नबी क स्वागत नाहीं होत।

^25-26“मइँ तोहसे सच कहत हउँ इस्राएल मँ एलिय्याह क समइ मँ जब अकास जइसे मुँद गवा रहा अउर साढ़े तीन बरिस तलक पूरी धरती मँ खौफनाक अकाल पड़ि गवा, तउ हुवाँ बहुत विधवन रहेन। मुला सैदा पहँटा के सारपत सहर क एक विधवा क तजिके एलिय्याह क कउनो अउर क लगे नाहीं पठवा गवा रहा।

²⁷“अउर नबी एलीसा क समइया मँ इस्राएल मँ ढेर कोढ़ी रहेन मुला ओहमाँ स सीरिया क बसइया नामान क तजिके अउर कउनो क सुद्ध नाहीं कीन्ह गवा रहा।”

²⁸तउ जबहिं आराधनालय मँ मनइयन इ सुनेन तउ सबहिं बहोत क्रोध स भर गएन। ²⁹तउ उ पचे खड़ा भएन अउर ओका सहर स बाहेर ढकेल दिहेन। उ सबइ ओका पहाड़े क उ चोटी प लइ गएन जेह प ओकर सहर बसा रहा जेसे उ पचे हुवाँ तरखाले झोंकि देइँ। ³⁰मुला उ ओनके बीच स निकरिके कहूँ आपन राहे प चला गवा।

Awadhi Bible: Easy-to-Read Version (ERV-AWA)