Book of Common Prayer

⁵ हे परमेस्सर, मइँ दीन अउ बेसहारा हउँ।
    हाली करा! आवा, अउर मोका सहारा द्या।
हे परमेस्सर, तू ही बस अइसा अहा जउन मोका बचाइ सकत अहा,
    जियादा देर जिन करा।

¹ हे यहोवा, मोका तोहार भरोसा अहइ,
    एह बरे मइँ कबहुँ निरास नाहीं होब।
² आपन नेकी स तू मोका बचाई।
    तू मोका छोड़ाइ लेब्या, मोर सुना।
    मोर उद्धार करा।
³ तू मोर गढ़ बना।
    सुरच्छा बरे अइसा गढ़ जेहमाँ मइँ दौड़ जाउँ।
मोर सुरच्छा बरे तू हुकुम द्या,
    काहेकि तू ही तउ मोर चट्टान अहा:मोर सरणस्थल अहा।
⁴ मोर परमेस्सर, तू मोका दुट्ठ जनन स बचाइ ल्या।
    तू मोका क्रूर कुटिल लोगन स छोड़ाइ ल्या।
⁵ मोर सुआमी, तू मोर आसा अहा।
    मइँ आपन बचपन स ही तोहरे भरोसे हउँ।
⁶ जब मइँ आपन महतारी क गरभ मँ रहेउँ, तबहिं स तोहरे भरोसे रहेउँ।
    जउने दिन स मइँ जन्म धारण किहेउँ, मइँ तोहरे भरोसे हउँ।
    मइँ तोहार पराथना सदा करत रहत हउँ।
⁷ मइँ दूसर लोगन बरे एक उदाहरण रहेउँ ह।
    काहेकि तू मोर सक्ति क सोता रह्या ह।
⁸ ओन अद्भुत कामन क सदा गावत रहेउँ ह, जेनका तू करत अहा।
⁹ सिरिफ इ कारण कि मइँ बुढ़वा होइ गवा हउँ मोका निकारिके जिन लोकावा।
    सिरिफ इ कारण कि मइँ दुर्बल होइ गवा हउँ मोका निज छोड़्या।
¹⁰ फुरइ, मोर दुस्मनन मोरे खिलाफ कुचक्र रच डाए बाटेन।
    फुरइ उ पचे सब बटुर ग अहइँ, अउर ओनकर जोजना मोका मार डावइ क अहइ।
¹¹ मोर दुस्मन कहत हीं, “परमेस्सर ओका तजि दिहस ह। जा, ओका धइ ल्या।
    कउनो भी मनई ओका मदद न देई।”
¹² हे परमेस्सर, तू मोका जिन बिसरा।
    हे परमेस्सर, हाली करा। मोका सहारा द्या।
¹³ मोरे दुस्मनन क पूरी तरह स हराइ द्या।
    तू ओनकर नास कइ द्या।
मोका कस्ट देइ क उ पचे जतन करत अहइँ।
    उ पचे लज्जा महसूस करइँ अउ अपमान सहइँ।
¹⁴ फुन मइँ तोहरे ही भरोसे, सदा रहब।
    अउर तोहार गुण मइँ जियादा अउ जियादा गाउब।
¹⁵ सबहिं लोगन स, मइँ तोहार बखान करब कि तू केतॅना उत्तिम अहा।
    उ समइ क बातन मइँ ओनका बताउब,
    जब तू अइसे मोका एक नाहीं अनगिनत अवसर पइ बचाए रह्या।
¹⁶ हे यहोवा, मोर सुआमी।
    मइँ तोहरी महानता क वर्णन करब।
    बस सिरिफ मइँ तोहार अउ तोहरी ही अच्छाई क चर्चा करब।
¹⁷ हे परमेस्सर, तू मोका बचपन स ही सिच्छा दिहा।
    मइँ आजु तलक बखानत रहा हउँ, ओन अद्भुत कामन क जेका तू करत अहा।
¹⁸ अब मइँ बुढ़वा होइ गवा हउँ अउर मोर बार सफेद होइ ग अहइँ।
    मुला मइँ जानत हउँ कि तू मोका नाहीं तजब्या।
    हर नई पीढ़ी स, मइँ तोहरी सक्ति क अउर तोहरी महानता क वर्णन करब।
¹⁹ हे परमेस्सर, तोहार धार्मिक भावना अकासन स ऊँच अहइ।
    हे परमेस्सर, तोहरे समान दूसर कउनो नाहीं।
    तू अजूबा अचरजभरा काम किहा ह।
²⁰ तू मोका बुरा समइ अउ कस्ट लखइ दिहा।
    मुला तू ही मोका ओन सब स बचाइ लिहा अउर जिअत राख्या ह।
    एकर कउनो अरथ नाहीं, मइँ केतॅना ही गहिर बूड़ेउँ तू मोका मोर संकटन स उबारि लिहा।
²¹ तू अइसे काम करइ क मोका मदद द्या जउन पहिले स भी बड़ा होइँ।
    मोका सुख चैन देत रहा।
²² वीणा क संग, मइँ तोहार गुण गाउब।
    हे मोरे परमेस्सर, मइँ इ गाउब कि तोह पइ भरोसा धरा जाइ सकत ह।
मइँ ओकरे बरे गीत आपन सितार पइ बजावा करब
    जउन इस्राएल क पवित्तर यहोवा अहइ।
²³ मोरे प्राणन क तू रच्छा किहा ह।
    मोर मन मगन होइ अउर आपन होंठन स, मइँ प्रसंसा क गीत गाउब।
²⁴ मोर जिभिया हर घड़ी तोहार धार्मिक भावना क गीत गावा करी।
    अइसे उ सबइ लोग जउन मोका मारइ चाहत हीं,
    उ पचे हारि जइहीं अउ अपमानित कीन्ह जइहीं।

⁴ दुस्मनन मन्दिर मँ सेरन क नाई दहाड़ेन।
    उ खुद क बिसेस चिन्ह^[a] क एक प्रमाण क रूप मँ, कि उ पचे जुद्ध जीत गएन, स्थापित किहेन।
⁵ दुस्मनन क फउजियन एक अइसे कुलहारी क नाई परगट भवा रहेन
    जेका प्रयोग जलावन क लकड़ी क काटइ बरे कीन्ह गवा रहा।
⁶ हे परमेस्सर, ऍन दुस्मन फउजियन निज कुल्हाड़न अउ फर्सन क प्रयोग किहन,
    अउर तोहरे मन्दिर क नक्कासी फाड़िके लोकाएन।
⁷ सबइ फउजियन तोहार पवित्तर ठउर बार दिहन।
    उ पचे तोहरे मन्दिर क धूरि मँ मिलइ दिहन
    जेका तोहरे नाउँ क मान देइ बरे बनावा ग रहा।
⁸ उ दुस्मन हमका पूरी तरह बरबाद करइ क ठान लिहन।
    तउ उ पचे देस क हर पवित्तर ठउर क फूँक दिहन।
⁹ हम लोग कउनो बिसेस चिन्ह नाहीं लखे।
    हुआँ अउर कउनो नबी जिअत नाहीं अहइ।
    एह बरे कउनो भी नाहीं जानत ह कि इ परिस्थिति कब तलक जारी रही।
¹⁰ हे परमेस्सर, इ सबइ दुस्मन कब तलक हमार हँसी उड़इहीं?
    का तू ऍन दुस्मनन क तोहरे नाउँ क अपमान सदा सदा ही करइ देब्या?
¹¹ हे परमेस्सर, तू आपन सक्ति क काहे रोके रखा ह अउर तू हस्तछेप काहे नाहीं करत ह।
    ओन लोगन क नास करइ बरे कारवाई करा।
¹² हे परमेस्सर, बहोत दिनन स तू ही हमार सासक रह्या।
    इ देस मँ तू हम लोगन क अनेक जुद्‌ध मँ विजय दिहा।
¹³ हे परमेस्सर, तू आपन महासक्ति स लाल सागर क दुइ हींसा कइ दिहा।
    तू विसाल काय क दानवन क मूड़न समुद्दर मँ चूर-चूर कइ दिहा।
¹⁴ तू लिव्यातान क मूँड़न कुचर दिहा,
    अउर ओकरे बदन क जंगली जनावरन क खाइ बरे लोकाइ दिहा।
¹⁵ तू नदी, झरनन रच्या, चटान फोड़िके पानी बहाया।
    तू सदा बहइ वाली नदियन क झुराइ दिहा।
¹⁶ हे परमेस्सर, तू दिन क सासक अहा, अउ राति क भी सासक तू ही अहा।
    तू ही चाँद अउ सूरज क बनाया।
¹⁷ तू समुचइ धरती पइ सब बरे चउहद्दी बाँधत अहा।
    तू ही गर्मी अउ सर्दी क बनाया।
¹⁸ हे यहोवा, इ बातन क सुमिर ल्या।
    अउर याद करा कि दुस्मन तोहार मजाक उड़ाएस ह।
    उ सबइ मूर्ख लोग तोहरे नाउँ क अपमान किहेन ह।
¹⁹ ओनॅ जंगली जनावरन क आपन फारवता क जिन लेइ द्या।
    आपन दीन जनन क तू हमेसा जिन बिसरा।
²⁰ हम आपुस मँ जउन करार कीन्ह ह ओका याद करा,
    इ देस मँ हर कउनो अँधियारे ठउरे पइ हिंसा अहइ।
²¹ हे परमेस्सर, तोहरे लोगन क संग अत्याचार झेलइ क रहा,
    ओनका अउर अधिक सतावा अउ दुःख दीन्ह जाइ जिन द्या।
    तोहार असहाय जन, तोहार गुण गावइँ।
²² हे परमेस्सर, उठा अउर बदला ल्या।
    याद करा कि ओन मूरख लोग सदा ही तोहार अपमान किहेन ह।
²³ उ सबइ बुरी बातन जिन बिसरा जेनका तोहार दुस्मनन हर रोज तोहरे बरे कहेन।
    जिन बिसरा कि उ पचे तोहार खिलाफ लगातार चिचियाएन जब उ पचे तोहार खिलाफ जुद्ध करत रहेन।

28 “हुआँ चाँदी क खान बाटइ जहाँ लोग चाँदी पावत हीं,
    हुआँ अइसे ठउर अहइँ लोग सोना देघराइके ओका सुद्ध करत हीं।
² लोग धरती स खनिके तोहा निकारत हीं,
    अउर चट्टानन स टेघाराइके ताँबा निकारत हीं।
³ लोग सबइ गुफा मँ प्रकास लिआवत हीं उ पचे सबइ गुफा क गहिराइ मँ हेरा करत हीं,
    घना अँधियारा मँ उ पचे खनिज क चट्टानन हेरत हीं।
⁴ जहाँ लोग रहत हीं ओहसे बहोत दूर लोग गहिर गड़हा खना करत हीं
    कबहुँ कउनो अउर एँन गड़हन क नाहीं छुएस।
    जब मनई गहिरे गड़हन मँ रस्सन लटकत ह, तउ उ दूसरन बहोत दूर होत ह।
⁵ भोजन धरती क सतह स मिला करत ह,
    मुला धरती क भीतर उ बढ़त जावा करत ह
    जइसे आगी चिजियन क बदल देत ह।
⁶ धरती क भीतरे चट्टानन क खाले नीलम मिलि जात हीं,
    अउर धरती क खाले माटी आपन आप मँ सोना राखत ह।
⁷ जंगली पंछी धरती क खाले क राहन नाहीं जानत हीं
    न हीं कउनो बाज इ मारग लखत ह।
⁸ उ राहन पइ कउनो बड़का डीलडोल वाला पसु नाहीं चलेन,
    कबहुँ सेर इ राहे पइ नाहीं विचरेन।
⁹ मजदूर सब स कठोर चट्टानन क खनत हीं
    अउर उ पचे पहाड़न क ओकार जड़ स खनिके गिरा देत हीं।
¹⁰ काम करइवालन चट्टानन स सुरंग काटत हीं
    उ पचन्क आँखन हुआँ खजानन क लखि लेत हीं।
¹¹ काम करइवालन बाँध बनवा करत हीं कि पानी ऊपर स होइके न बहइ।
    उ पचे छिपी भइ चिजियन क ऊपर प्रकास मँ लिआवत हीं।

¹² “मुला कउनो मनई विवेक कहाँ पाइ सकत ह
    अउर हम कहाँ जाइ सकित ह समुझ पावइ क?
¹³ गियान कहाँ रहत ह लोग नाहीं जानत हीं
    लोग जउन धरती पइ रहत हीं, ओमाँ इ नाहीं पाइ जात ह।
¹⁴ सागरे क गहराइ बतावत ह, ‘मोह माँ गियान नाहीं।’
    अउर समुद्दर कहत ह, ‘हिआँ मोहमाँ गियान नाहीं अहइ।’
¹⁵ गियान क बहोत कीमती सोना भी मोल नाहीं लइ सकत ह,
    गियान क दाम चाँदी स नाहीं गना जाइ सकत ह।
¹⁶ गियान ओपरी देस क सोना स
    या कीमती सुलैमानी पाथर या नीलमणियन स नाहीं बेसहा जाइ सकत ह।
¹⁷ गियान सोना अउ स्फटिक ल जियादा कीमती बाटइ,
    कउनो मनई बहोत कीमती सोना स जड़े भए रलन स गियान नाहीं बेसहि सकत ह।
¹⁸ गियान मूँगा अउ सूर्यकान्त मणि स जियादा कीमती बा।
    गियान क कनोउ मनई सिद्ध सोने मँ जुरे कीमती रतन स नाहीं बेसहा सकत ह।
¹⁹ जेतना उत्तिम गियान अहइ कूस देस क पद्मराग भी ओतना उत्तिम नाहीं अहइ।
    गियान क तू चोख सोना स मोल नाहीं लइ सकत्या।

²⁰ “तउ फुन हम कहाँ गियान क पावइ जाइ?
    हम कहाँ समुझ सीखइ जाइ?
²¹ गियान धरती क हर मनई स लुका भवा अहइ।
    हिआँ तलक कि ऊँच अकास क पंछी भी गियान क नाहीं लखि पावत हीं।
²² मउत अउ विनास कहा करत हीं,
    ‘हम तउ बस
    गियान क बातन सुनी ह।’

²³ “मुला बस परमेस्सर गियान तलक पहोंचइ क राहे क जानत ह।
    परमेस्सर जानत ह गियान कहाँ रहत ह।
²⁴ परमेस्सर गियान क जानत ह काहेकि उ धरती क अखिरी छोर तलक लखा करत ह।
    परमेस्सर उ हर वस्तु क जउन अकास क खाले अहइ लखा करत ह।
²⁵ जब परमेस्सर हवा क ओकर सक्ती दइ दिहस
    अउर इ निहचित किहस कि समुद्दरन क केतना बड़का बनावइ क अहइ।
²⁶ अउर जब परमेस्सर निहचय किहस कि ओका कहाँ स बर्खा पठवइ क अहइ,
    अउर बउड़रन क कहाँ तलक जात्रा करइ क अहइ।
²⁷ तब परमेस्सर गियान क लखे रहा।
    उ ओका मापेस, ओका साबित किहेस अउर इका परखेस।
²⁸ अउर लोगन स परमेस्सर कहे रहा कि
    ‘यहोवा क भय माना अउर ओका आदर दया।
    बुराइयन स मुहँ मोड़ि लेब ही गियान अहइ, इहइ समझदारी अहइ।’”