◀ All Reading Plans / Book of Common Prayer / Ps. 119:49–72; Ps. 49 [53]; Job 29:1 30:1–2 16–31; Acts 14:19–28; John 11:1–16 (Awadhi Bible: Easy-to-Read Version)

Prev Day

September 11, 2024

Next Day

Use the calendar to view readings from this devotional.

September 2024
Su	Mo	Tu	We	Th	Fr	Sa
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 119:49-72

जैन

⁴⁹हे यहोवा, कृपा कइके आपन बचन क याद रखा, जउन तू मोहसे किह्या ह।
    उहइ बचन मोका आसा देत ह।
⁵⁰जब मइँ झेलत रहेउँ, तू मोका चइन दिहा।
    तोहार वचन मोका जीवन देत ह।
⁵¹लोग जउन खुद क मोहसे उत्तिम सोचत हीं, निरन्तर मोर अपमान करत अहइँ।
    मुला हे यहोवा मइँ तोहार सिच्छन पइ चलब नाहीं तजेउँ।
⁵²मइँ तोहरे ओन फइसलन क याद करत हउँ जेका तू बहोत पहिले दिहा ह,
    अउर मइँ मोका चइन देत अहइँ।
⁵³जब मइँ अइसे दुट्ठ लोगन क लखत हउँ,
    जउन तोहरी सिच्छन पइ चलब तजेन ह, तउ मइँ बहोत कोहाइ जात हउँ।
⁵⁴तोहार सबइ कानून मोर बरे आनन्दित भजन होत
    जहाँ कहिउँ भी मइँ रहत हउँ।
⁵⁵हे यहोवा, राति मँ मइँ तोहरे नाउँ क धियान
    अउर तोहरी नेमन क पालन करत हउँ।
⁵⁶इ मोर अभ्यास होत रहत ह।
    मइँ होसियारी स तोहरे उपदेसन क मानत हउँ।

ख़ेथ

⁵⁷हे यहोवा, तू मोर अंग अहइ, एह बरे मइँ तोहार आग्यन क पालन करब।
⁵⁸हे यहोवा, मइँ पूरी मन स तोहार खोज किहेउँ ह,
    जइसा बचन तू दिहा मोह पइ दयालु ह्वा।
⁵⁹मइँ आपन राहे पइ बहोत धियान दिहेउँ ह,
    ताकि मइँ तोहरी करार क मुताबिक चल सकउँ।
⁶⁰मइँ बिना देरी किहे
    तोहरे आग्यन पइ चलइ क इच्छुक अहउँ।
⁶¹दुट्ठन आपन फन्दन मोका फंसाइ लिहेन ह।
    मइँ तोहरी सिच्छन क कबहुँ नाहीं बिसरेउँ।
⁶²तोहरे सच्चा फइसलन क तोहका धन्यवाद देइ बरे
    मइँ आधी रात क बीच जगत हउँ।
⁶³जउन कउनो मनई तोहसे डेरात ह तउ मइँ ओकर मीत अहउँ।
    अगर कउनो मनई तोहरे उपदेसन पइ चलत ह, मइँ ओकर मीत अहउँ।
⁶⁴हे यहोवा, इ समूचइ धरती तोहरी बिस्ससनीय पिरेम स भरी भइ बा।
    मोका तू मोका अपने विधान क सिच्छा द्या।

टेथ

⁶⁵हे यहोवा, तू आपन दास बरे अच्छा काम किहे अहा।
    तू ठीक वइसा ही किहा जइसा तू करइ क वचन दिहा रह्या।
⁶⁶हे यहोवा, मोका सही बुद्धि अउ गियान द्या
    कि मइँ तोहार आदेसन पइ बिस्सास करेउँ।
⁶⁷पीड़ित होइ स पहिले मूरखता स मइँ बुरे करम किहे रहेउँ।
    मुला अब, मइँ धियानपूर्वक तोहरे आग्यन क पालन करत हउँ।
⁶⁸तू अच्छा अहइ, अउर अच्छा काम करत अहा।
    मोका आपन कानून क सिच्छा द्या।
⁶⁹घमण्डी लोग मोरे बरे बहोत सारा झूठी बात बोलत हीं।
    किन्तु यहोवा मइँ आपन पूर्ण वचन बद्धता स तोहरे उपदेसन क पालन करब।
⁷⁰उ लोगन क दिमाग तोहार उपदेसन क नाहीं समुझ सकतेन।
    मुला, मइँ तोहरी उपदेसन क अध्ययन कइके बहोत खुसी पावत हउँ।
⁷¹हिआँ तलक कि कस्ट भी मोर बरे बढ़िया बनि गवा रहा।
    उहइ तरह मइँ तोहरी कानून क सीख लिहेउँ।
⁷²तोहरी सीखन मोरे बरे भली होत अहइँ।
    तोहार सीखन हजारन सोना अउ चाँदी क टूकन स उत्तिम अहइँ।

भजन संहिता 49

कोरह क संतानन क संगीत निदेर्सक बरे एक ठु पद।

¹अलग-अलग देसन क निवासियो, इ सुना।
    धरती क वासियो इ सुना।
²    सुना अरे दीन लोगो, अरे धनिको सुना।
³मइँ तू पचन्क गियान
    अउ विवेक क बातन बतावत हउँ।
⁴मइँ सबइ कथा सुनेउँ ह,
    मइँ अब उ सबइ कथा तू पचन्क आपन वीणा पइ सुनाउब।

⁵अइसा कउनो कारण नाहीं जउन मइँ कउनो भी बिनास स डेराइ जाउँ।
    अगर लोग मोका घेरइँ अउ फँदा फइलावइँ, मोका डेराइ क कउनो कारण नाहीं।
⁶उ सबइ लोग मूरख अहइँ जेनका आपन निज सक्ति
    अउ आपन धन पइ भरोसा अहइ।
⁷कउनो मानव मीत ओनका छोड़ा नाहीं सकत।
    कउनो मनई परमेस्सर क रिसवत दइके बिना सज़ा क जाई देइ नाहीं सकत।
⁸कउनो मनई क लगे ऍतना धन नाहीं होई कि जेहसे
    उ खुद आपन निज जिन्नगी मोल लइ सकइ।
⁹कउनो मनई क लगे
    ऍतना धन नाहीं होइ सकत
    कि उ आपन देह कब्र मँ सड़इ स बचाइ सकइ।
¹⁰लखा, बुद्धिमान जन, बुद्धिहीन जन अउ पाथर जइसा मूरख जन एक जइसे मरि जात हीं,
    अउर ओनकर सारा धन दूसर लोगन क हाथे मँ चला जात ह।
¹¹कब्र सदा ही बरे हर कउनो क घर बनी,
    एकर कउनो अरथ नाहीं कि उ पचे केतनी भुइँया क सुआमी रहेन।
¹²धनी मनई मूरख लोगन स अलग नाहीं होतेन।
    सबहिं लोग गोरूअन क तरह मर जात हीं।
¹³मूरख लोगन बरे इहइ होत ह।
    इ ओनकर भाग्य अहइ अउर ओकरे संतानन क भाग्य जउन ओकरे जइसा इच्छा रखत ह।
¹⁴सबहिं लोग भेड़ी जइसेन बाटेन।
    कब्र ओनकर बरे बाड़ा बन जाइ।
मउत ओनके चरवाहा बनी।
    ओनकर काया छीन होइ जाइ
    अउर उ पचे कब्र मँ सड़ गल जइहीं।

¹⁵मुला यहोवा मोर मूल्य चुकाई अउर मोका कब्र स बचाइ।
काहेकि उ मोका आपन संग लेब।

¹⁶धनवानन स जिन डेराअ कि उ पचे धनी अहइँ।
    लोगन स ओनकर धन दौलत स भरा घरन क लखिके जिन डेराअ।
¹⁷उ सबइ लोग जब मरिहीं कछू भी संग न लइ जाइ जइहीं।
    ओन सुन्नर वस्तुअन मँ स कछू भी न लई जाइ पइहीं।
¹⁸लोगन क चाही कि उ सबइ जब तलक जिअत रइहीं परमेस्सर क स्तुति करइँ।
    जब परमेस्सर ओनके संग भलाई करइ, तउ लोगन क ओकर स्तुति करइ चाही।
¹⁹मनइयन बरे एक अइसा समइ आइ जब उ पचे आपन पुरखन क संग मिल जइहीं।
    फिर उ पचे कबहुँ दिन क प्रकास नाहीं लखि पइहीं।
²⁰धनी मनई मूरख लोगन स अलग नाहीं होतेन।
    सबहिं लोग गोरुअन क नाईं मरत हीं।

भजन संहिता 53

महलत क राग पइ संगीत निर्देसक बरे दाऊद क एक ठु मस्किल।

¹मूरख ही सोचत ह कि परमेस्सर नाहीं होत ह।
    इ तरह क लोग विनासकारी, भ्रस्ट, कुटिल होत हीं।
    उ पचे तउ कउनो नीक काम नाहीं करतेन।
²परमेस्सर अकासे मँ स नीचे सबइ लोगन क लखेस।
    इ लखत ह कि का हिआँ स
    कउनो बुद्धिमान मनई ओका हेरत रहत रहा?
³मुला सबहिं लोग परमेस्सर स भटक गवा अहेन।
    हर मनई बुरा अहइ।
कउनो भी मनई कउनो नीक करम नाहीं करत,
    एक ठु भी नाहीं।

⁴परमेस्सर कहत ह, “निहचय ही उ सबइ दुट्ठ लोग सत्य क जानत हीं।
उ सबइ दुट्ठ लोग मोरे मनवइयन क अइसे बरबाद करइ क तइयार अहइँ,
जइसे उ सबइ निज खइया क खाइ क तइयार रहत हीं”

⁵मुला उ सबइ दुट्ठ लोग ऍतना डेराइ जइहीं,
जेतँना उ सबइ दुट्ठ लोग पहिले कबहुँ डेरानेन नाहीं।
एह बरे परमेस्सर इस्राएल क ओन दुट्ठ दुस्मन लोगन क तजेस ह।
परमेस्सर क मनवइयन ओनका हरइहीं
अउर परमेस्सर ओन दुट्ठन क हड्डियन क छितराइ देइ।

⁶कउनो एक सिय्योन पर्वत स इस्राएल क बचाइ!
जब परमेस्सर आपन लोगन क स्थिति पुन:
स्थापित करी, याकूब क लोग खुस होइहीं।
हाँ इस्राएल बहोत खुस होइ।

अय्यूब 29:1

अय्यूब आपन बात जारी रखत ह

29 आपन बात क जारी रखत भए अय्यूब कहेस।

अय्यूब 30:1-2

30 “अब, उमर मँ छोटा लोग मोर मसखरी करत हीं।
    ओन जवान मनसेधुअन क बाप बिल्कुल ही निकम्मा रहेन।
    ओन कूकुरन जउन मोर भेड़िन क रखवारा करत ह ओन लोगन स बेहतर अहइँ।
²ओन जवान मनसेधुअन क बाप मोका मदद देइ क कउनो सक्ती नाहीं राखत हीं,
    उ पचे बुढ़वा होइ चुका अहइँ अउ थका भवा अहइँ।

अय्यूब 30:16-31

¹⁶“जब मोर जिन्नगी बीतइ क अहइ अउर मइँ हाली ही मर जाब।
    मोका, संकट क दिन दहबोच लिहे अहइँ।
¹⁷मोर सबइ हाड़न राति क दुख देत हीं,
    पीरा मोका चबाव नाही छोड़त ह।
¹⁸मोरे कोट क गिरेबान क परमेस्सर बड़ी ताकत स धरत ह,
    उ मोरे लिबास क ताकत स पकड़ लेत ह।
¹⁹परमेस्सर मोका कीचं मँ बहाइ दिहस
    अउर मइँ माटी व राखी स बनत हउँ।

²⁰“हे परमेस्सर, मइँ सहारा पावइ क तोहका गोहरावत हउँ, मुला तू उत्तर नाहीं देत ह।
    मइँ खड़ा होत हउँ अउ पराथना करत हउँ, मुला तू मोह पइ धियान नाहीं देत्या।
²¹हे परमेस्सर, तू मोर बरे निर्दयी होइ गवा अहा
    तू मोका नोस्कान पहोंचावइ क आपन सक्ती क प्रयोग करत अहा।
²²हे परमेस्सर, तू मोका तेज आँधि स उड़ाइ देत ह।
    तू मोका तूफाने क बीच मँ डाल देत ह।
²³मइँ जानत हउँ तू मोका मोर मउत कइँती लइ जात अहा
    आखीर माँ हर कउनो क जाब अहइ।

²⁴“मुला इ निहचय ह कि तू कउनो मनई जउन मदद बरे गोहरावत ह,
    ओन स नाहीं मुड़त ह।
²⁵हे परमेस्सर, तू तउ जानत ह कि मइँ ओनके खातिर रोएउँ जउन संकट मँ पड़ा अहइँ।
    तू तउ इ जानत ह कि मोर मन गरीब लोगन बरे बहोत दुखी रहत रहा।
²⁶मुला जब मइँ भला चाहत रहा, तउ बुरा होइ जात रहा।
    मइँ प्रकास हेरत रहेउँ अउर अँधियारा छाइ जात रहा।
²⁷मइँ भितरे स फट गवा हउँ अउर इ अइसा अहइ कि संकट कबहुँ नाहीं थम जात।
    अउर जियादा संकट आवइ क अहइ।
²⁸मइँ सोक क ओढ़ना पहिनके माना बगइर सूरज की गर्मी स करिया होइ गना हूँ।
    मइँ सभा क बीच मँ खड़ा होत हउँ, अउर मदद क गोहरावत हउँ।
²⁹मइँ जंगली कूकुरन क भइया
    अउर सुतुरमुर्ग क मीत होइ गवा हउँ।
³⁰मोर चमड़ी करिया पड़ि गइ बाटइ।
    मोर तन बुखारे स तपत बाटइ।
³¹मोर वीणा करुण गीत गावइ क सधी बाटइ
    अउर मोर बाँसुरी स दुःख क रोवइ जइसे स्वर निकरत हीं।

प्रेरितन क काम 14:19-28

¹⁹फिन अन्ताकिया अउर इकुनियुस स आए भए यहूदी लोग भीड़ क अपने पच्छ मँ कइके पौलुस प पाथेर लोकाएन अउर ओका मरा जानिके सहर क बाहेर घेर्राइ लइ गएन। ²⁰फिन जब ओकर चेलन ओकरे चारिहुँ कइँती बटुरेन, तउ उ उठा अउर सहर मँ चला आवा अउर फिन अगले दिन बरनाबास क संग उ दिरबे बरे चल पड़ा।

सीरिया क अन्ताकिया क लउटब

²¹उ सहर मँ उ पचे सुसमाचार क प्रचार कइके बहोत स चेलन बनएन। उ सबइ लुस्त्रा, इकुनियुम अउर अनताकिया लउटि आएऩ। ²²अउर मनवइयन क आतिमन क स्थिर कइके बिसवास मँ रहइ बरे ओनका कहि क हिम्मत बढ़ाएऩ, “हमका बड़ा घोर दुख झेलिके परमेस्सर क राज्य मँ घुसइ क अहइ।” ²³हर कलीसिया मँ उ पचे ओनका नुयुक्त किहेन उ पर्भू क सौप दिहेन जेहमाँ उ पचे बिसवास करत रहेन।

²⁴एकरे पाछे पिसिदिया स होत भए उ पचे पंफूलिया आइ गएऩ। ²⁵अउर पिरगा मँ जब सुसमाचार सुनाइ चुकेन तउ इटली मँ आइ गएऩ। ²⁶हुवाँ स उ पचे अन्ताकिया क जहाज स गएन जहाँ जउने काम क अबहिं उ पचे पूरा किहेन। उ काम बरे उ सबइ परमेस्सर क अनुग्रह प न्यौछावर होइ गएऩ।

²⁷अइसे जब उ पचे पहोंचेन तउ उ पचे कलीसिया क मनइयन क बटोरेन अउर परमेस्सर ओनके द्वारा जउन कछू किहेस, ओकर वृत्तांत कहिके सुनाएऩ। अउर उ पचे एलान किहेन कि परमेस्सर दूसरे देसन क मनइयन बरे बिसवास क दुआर खोले अहइ। ²⁸फिन चेलन क संग हुवा बहोत दिनाँ तलक ठहरेन।

यूहन्ना 11:1-16

लाजर क मउत

11 बैतनिय्याह क लाजर नाउँ क एक ठु मनई बीमार रहा। इ उहइ सहर रहा जहाँ प मरियम अउर ओकर बहिन मार्था रहत रहिन। ²(मरियम उ स्त्री रही जउऩ पर्भू क ऊपर, इतर डाए रही अउर अपने मूँडे क बारे स ओकर गोड़ पोंछे रही। लाजर नाउँ क रोगी ओकर भाई रहा।) ³इ बहिनियन ईसू क लगे समाचार भेजे रहिन, “पर्भू, जेहिका तू मया करत अहा उ बीमार अहइ।”

⁴ईसू जब इ सुनेस तउ बोला, “इ बीमारी जान लेवा नाहीं अहइ। इ तउ परमेस्सर क महिमा परगट करइ क बरे अहइ। इहइ स परमेस्सर क पूत क महिमा मिली।” ⁵(ईसू मार्था ओकर बहिन अउर लाजर क पियार करत रहा) ⁶इ बरे जब उ सुनेस कि लाजर बीमार होइ गवा अहइ, तब जहाँ उ ठहरा रहा, हुवाँ दुइ दिन अउर रूक गवा। ⁷फिन ईसू अपने चेलन स कहेस, “आवत जा हम सब यहूदिया लौटि चली।”

⁸इ सुनिके ओकर चेलन कहेन, “गुरू कछू दिन पहेल यहूदी नेता तोहरे ऊपर पथराव करइ क कोसिस करे रहेन अउर तू फिन हुवाँ जात अहा?”

⁹ईसू जवाब दिहेस, “का एक दिन मँ बारह घंटा नाहीं होतेन। जब कउनो मनई दिन क रोसनी मँ चलत ह तउ उ ठोकर नाहीं खात, काहेकि उ इ दुनिया क रोसनी क देखत ह। ¹⁰मुला जदि कउनो रात मँ चलत ह तउ ठोकर खाइ क गिर जात ह, काहेकि रोसनी नाहीं रहत।”

¹¹उ फिन इ कहेस, “अउर ओनसे बोला, हमार मीत लाजर अबहीं सोवत अहइ मुला मइँ ओका जगावइ जात अहउँ।”

¹²फिन ओकर चेलन ओसे कहेन, “पर्भू, जदि ओका नींद आइ ग अहइ तउ उ नीक होइ जाई।”

¹³ईसू लाजर क मउत क बाबत बतावत रहा मुला ओकर चेलन सोचेन कि उ प्राकृतिक नींद क बारे मँ कहत बाटइ। ¹⁴इ बरे ईसू ओनसे साफ साफ कहेस, “लाजर मरि गवा अहइ। ¹⁵मइँ तोहरे बरे खुस अहउँ कि मइँ हुवाँ नाहीं रहेउँ। इ बरे कि अब तू पचे मोरे मँ बिसवास करि सकत ह। आवा अब हम ओकरे पास चली।”

¹⁶फिन थोमा, जेका लोग दिदुमुस कहत रहेन, दूसरे चेलन स कहेस, “आवा हमहूँ सबइ पर्भू क पास चली जइसे कि हमहूँ सबे उहइ क साथे मर सकी।”

Awadhi Bible: Easy-to-Read Version (ERV-AWA)