Revised Common Lectionary (Semicontinuous)

11 In finem, pro octava. Psalmus David.

² Salvum me fac, Domine, quoniam defecit sanctus, quoniam diminutae sunt veritates a filiis hominum.

³ Vana locuti sunt unusquisque ad proximum suum; labia dolosa, in corde et corde locuti sunt.

⁴ Disperdat Dominus universa labia dolosa, et linguam magniloquam.

⁵ Qui dixerunt: Linguam nostram magnificabimus; labia nostra a nobis sunt. Quis noster dominus est?

⁶ Propter miseriam inopum, et gemitum pauperum, nunc exsurgam, dicit Dominus. Ponam in salutari; fiducialiter agam in eo.

⁷ Eloquia Domini, eloquia casta; argentum igne examinatum, probatum terrae, purgatum septuplum.

⁸ Tu, Domine, servabis nos, et custodies nos a generatione hac in aeternum.

⁹ In circuitu impii ambulant: secundum altitudinem tuam multiplicasti filios hominum.

6 Factum est ergo quadringentesimo et octogesimo anno egressionis filiorum Israel de terra AEgypti, in anno quarto, mense Zio (ipse est mensis secundus), regni Salomonis super Israel, aedificari coepit domus Domino.

² Domus autem quam aedificabat rex Salomon Domino, habebat sexaginta cubitos in longitudine, et viginti cubitos in latitudine, et triginta cubitos in altitudine.

³ Et porticus erat ante templum viginti cubitorum longitudinis, juxta mensuram latitudinis templi: et habebat decem cubitos latitudinis ante faciem templi.

⁴ Fecitque in templo fenestras obliquas.

⁵ Et aedificavit super parietem templi tabulata per gyrum, in parietibus domus per circuitum templi et oraculi, et fecit latera in circuitu.

⁶ Tabulatum quod subter erat, quinque cubitos habebat latitudinis, et medium tabulatum sex cubitorum latitudinis, et tertium tabulatum septem habens cubitos latitudinis. Trabes autem posuit in domo per circuitum forinsecus, ut non haererent muris templi.

⁷ Domus autem cum aedificaretur, de lapidibus dolatis atque perfectis aedificata est: et malleus, et securis, et omne ferramentum non sunt audita in domo cum aedificaretur.

⁸ Ostium lateris medii in parte erat domus dextrae: et per cochleam ascendebant in medium coenaculum, et a medio in tertium.

⁹ Et aedificavit domum, et consummavit eam: texit quoque domum laquearibus cedrinis.

¹⁰ Et aedificavit tabulatum super omnem domum quinque cubitis altitudinis, et operuit domum lignis cedrinis.

¹¹ Et factus est sermo Domini ad Salomonem, dicens:

¹² Domus haec, quam aedificas, si ambulaveris in praeceptis meis, et judicia mea feceris, et custodieris omnia mandata mea, gradiens per ea, firmabo sermonem meum tibi, quem locutus sum ad David patrem tuum:

¹³ et habitabo in medio filiorum Israel, et non derelinquam populum meum Israel.

¹⁴ Igitur aedificavit Salomon domum, et consummavit eam.

²¹ Ut autem et vos sciatis quae circa me sunt, quid agam, omnia vobis nota faciet Tychicus, carissimus frater, et fidelis minister in Domino:

²² quem misi ad vos in hoc ipsum, ut cognoscatis quae circa nos sunt, et consoletur corda vestra.

²³ Pax fratribus, et caritas cum fide a Deo Patre et Domino Jesu Christo.

²⁴ Gratia cum omnibus qui diligunt Dominum nostrum Jesum Christum in incorruptione. Amen.