Revised Common Lectionary (Semicontinuous)

¹³ Nimetzinhilwia ne tejtechan: naja nechtitanijtiwit ipal ne tejtechan, wan yajika nina ka wey ne nutekitilis ¹⁴ su weli nikwalantia sejse ipal nukniwan pal ma mupalewikan, ¹⁵ ika su ne taltikpak muyulpata kwak yejemet puliwit, keski mas yawi kikwi su muketzat kwak miktiwit?

¹⁶ Su yek ne achtu tapik, ne tishti muchi yek; nusan su yek ne nelwat, ne majtzal kenhaya. ¹⁷ Su sejse majtzal mukutunket wan taja, ká se kojtankwawit, timusaluj ijtik yejemet wan timuchijki ikunpa iwan ne inelwayu ne itumakkayu ne ikuyu olivaj, ¹⁸ maka shu-shimuweymati iwan ne majmajtzal: su timuweymati, shikelnamiki ka taja inte tikselia ne nelwat, sute yaja ne metzselia.

¹⁹ Taja tiaw tina: mukutunket majmajtzal pal naja nechsaluat! ²⁰ Ijkia: mukutunket ika te tayulmatket. Taja tinemi ka né ipanpa tayulmatilis. Maka shimumati wejkapan, sute shimajmawi! ²¹ Ika su ne Teut kiwilej ne majmajtzal ne takatket achtu, weli metzinwilewa nusan! ²² Shikita tel ne iyekyu wan ne ikwalan Teut. Iwan ne wetztiwit, yaja kwalani. Muwan, ne Teut muwika yek su taja tinaka yek; su te, tiaw timukutuna nusan, ²³ wan yejemet, su pewat tayulmatit, yawit musaluat, ika ne Teut weli kinsalua senpa. ²⁴ Su taja timukutun itech ne kojtankwawit ne mupal katka wan timusaluj itech ne kwawit yektzin, keski mas yek welisket musaluat itech ne ikuyu olivaj ne majmajtzal ne ipal ne takatket achtu ijpak yaja.

²⁵ Ika niknekiskia ma shikmatikan ini ichtaka, nukniwan, ma te shinakan ka ankimatit wan te ankimatit: ka se takutun ipal Israel takwawakistuk hasta kwak yawit tepewit ne ká kalakisket ipal ne tejtechan, ²⁶ wan ijkiuni muchi Israel yawi yektia, ken muijkwilujtuk:

²⁸ Melka ipanpa ne yeknawatilis yejemet metzinhishijiat, ipanpa ne ishpejpenka yejemet yejyektasujtatuk ka imaku ne intekuwan, ²⁹ ika ne Teut inte kipata iyulu kwak tetakulia wan kwak tanutza.