Revised Common Lectionary (Semicontinuous)
5 Ika Moshe tajkwilua ka ne ká tamelakchiwa ijtik ne tajtuli, yawi yultuk ijkiuni. 6 Ne tamelakchiwalis ipal ne tayulmatilis ina kiane: Maka shina tik muyulu, "Ká yawi tejku ka ilwikak?" Kineki ina: pal kalwika ne Mawaltijtuk katani. 7 Nian, "Ká yawi temu ka miktan?" Kineki ina: pal kishtia ne Mawaltijtuk ijtik ne miktiwit wan kalwika. 8 Tay ina tel? Munawak nemi, tik ne muten wan tik ne muyulu. Né nemi ne tay ipal ne tayulmatilis ne titanajnawatiat. 9 Ika su tina iwan ne muten ka ijkia ne tajtzin Yeshu wan tikmati iwan ne muyulu ka ne Teut kiyulkwepki kwak mikik, tiaw timumakishtia. 10 Ika iwan ne tuyulu tikmatit ne tamelakchiwalis, wan iwan ne tuten tinat ka ijkia wan timumakishtiat.
11 Ne ijkwilujtuk ina:
"Muchi ká kiyulmatit inte mushijshikusket."
12 Ika Yudayujmet wan Greciajtakamet muchi kenhat, ika muchi kipiat sanse tajtzin wan yaja kimaka muchi ká kinutzat, 13 wan muchi ká kinutzat ne itukay ne Tajtzin yawit mupalewiat.
14 Kwakuni, ken kinutzasket ne Tajtzin su te kiyulmatit? Wan ken kiyulmatisket su te kikaktiwit? Wan ken takakisket su te aka tanajnawatia? 15 Wan ken tanajnawatisket su te mutitaniat?
Ken muijkwilujtuk:
"Yek ajsitiwit ne ijikshi ne kinawatiat tay yek."
Yeshu nejnemi ijpak at
22 Wan nemanha yaja kinkalaktij ne mumachtianimet tik se barcoj wan yejemet yawit ka sentapal wan yaja nakak isel itech ne miaktal. 23 Nemanha kinhajkaw yawit muchi wan tejkuk pak se tepet ka ikwaj kinujnutza ne Teut. Tayuakik wan nemik isel. 24 Ne barcoj nemituya wejka ne tal, wan ne at sujsul kumunik ika ne ejekat tapitza nemi iishpan. 25 Kwak tanesik, yaja nejnenki ijpak ne at wan ajsik kan nemituyat. 26 Kwak ne mumachtianimet kitaket nejnemi ijpak at mukakasujket, inat:
—Uni witz tukujkul!
Tzajtziket iwan mawi. 27 Nemanha ne Yeshu taketzki, ina:
—Maka shiyulkakasiwikan! Naja ne! Maka shimajmawikan!
28 Ne Pedro inak:
—Tajtzin, asu taja ne, shinechtukti ma niajsi mutech ijpak ne at!
29 Yaja inak:
—Shiwi!
Pedro temuk katani wan nejnenki ijpak ne at hasta kan nemituya Yeshu. 30 Kwak yaja kitak ne ejekat majmawki wan pejki atuki wan tzajtzik, ina:
—Tajtzin, shinechpalewi!
31 Nemanha Yeshu kimelajki ne imey wan kitzkij, wan kilwia:
—Intesu tikpia tayulmatilis! Taika tipejki timuishmutia?
32 Wan kwak tamik tejku ijpak ne barcoj mukawki ne ejekat. 33 Ne sejseuk tik ne barcoj pejket mutankwaketzat, inat:
—Tejkia ka taja ti Itelpuch ne Teut.
Ne Bibliaj Tik Nawat · © 2008, 2012 Jan Morrow