Revised Common Lectionary (Semicontinuous)

¹⁹ Kisket Antiokea wan Ikonion Yudayujmet wan walejkuket wan kinhilwijket muchi ma kitejtemimakan ne Pawlo. Kwakuni kitilanket Pawlo ika kimatit ka yaja miktuk, wan kishtijket tik ne techan. ²⁰ Kwak ne mumachtianimet kiyawalujket, yaja muketzki wan kalak ijtik ne techan.

Wan ne ukse tunal, kiski iwan Bar-Naba wan yajket ka Derbe.

Mukwepa ka Antiokea

²¹ Kwak tamiket tayeknawatiat tik uni techan wan kichijtuyat miak mumachtiani, mukwepket Lustra wan Ikonion wan Antiokea. ²² Kinpalewiat katka ne mumachtianimet pal chikawayat ne inyujyulu wan kintajtanit ma inte kielkawakan ne intayulmatilis, wan inat ka tinemit pal tipanut tik miak penaj ma tiajsikan ne itatekimakalis ne Teut. ²³ Tik muchi ne sejsennemit kintukaytijket nojnoymet, wan kinujnutzket ne Teut wan kisejselijket mayan wan kinhishpanujket ká kiyulmatket ipal ne Tajtzin.

²⁴ Wan panuket ijtik Pisidia wan ajsiket tik Panpulia, ²⁵ wan kwak tamiket tanutzat ipanpa ne palabraj tik Perga, temuket ka Atalea, ²⁶ wan ka né kisket tik se barcoj wan ajsiket Antiokea, yaja ne techan kanka achtu mutemakatuyat iishpan ne Teut, tik ne itetasujtalis, ipal ne intekiw ne kichijket.

²⁷ Ajsiket tel wan kisentepejket ne sennemit, wan pejket taneshtiat muchi tay kichijtuk ne Teut intech wan ken kintapuilij ne tejtechan ne itenkal ne tayulmatilis. ²⁸ Nakaket miak tunal iwan ne mumachtianimet.