Revised Common Lectionary (Semicontinuous)

3 Shikmati ini: ka tik ne tijtipan tunal walasket ujuij tiempoj, ² ika ne takamet yejemetsan insel mutasujtasket, muchiwasket tuminhelewianit, muweytenewasket, muweymatisket, kukujtaketzasket, te kitakamatisket intejteku, te inasket panpadiush, kichiwasket tay te muneki, ³ te kipiasket tetasujtalis, te kinekisket sentajtaketzat, tatejtenewasket, muajkawasket, muwikasket ken tekwanimet, te kielewisket tay yek, ⁴ muchiwasket temakanimet, tzunhejekamet, tzujtzunsuluntuk, sejse sema kinekit mukwesuat wan te kitasujtat ne Teut, ⁵ sejse kipiat tachialis ipal yek wan te kinekit kipiat itajpal. Maka shikpia tatka inwan.

⁶ Ijkiuni nemit ne kalakit tik ne kajkal wan kikwit ijilpituk siwatzitzin tajtakimiltijtuk iwan tajtateyekchijtuk ika ankakeski taelewilis kinwikatiwit. ⁷ Senpa mumachtiat nemit wan te keman welit ajsit ne yekkaya taishmatilis. ⁸ Ken Yanes wan Yambres ne kinajnankilijket Moshe, ijkiuni yejemet nusan nankilijket iishpan ne tejkia. Wilewik ne intamatilis, te yejyek pal tayulmatit. ⁹ Tea yasnekit inhishpan, ika muchi kimatisket ne inkwalan, ken muchijki iwan ne sejseuk.