Revised Common Lectionary (Semicontinuous)

5 Muchi ká kimatit ka Yeshu ne Mawaltijtuk nestiwit itech ne Teut, wan muchi ká kitasujtat ne ká kichijki kitasujta nusan ne itech nestuk. ² Ijkini ken tikishmatit ka tiktasujtat ne ikukunew ne Teut: kwak tiktasujtat ne Teut wan tikchiwat tay yaja tatuktijtuk. ³ Ika ini ne itetasujtalis ne Teut, ma titajpiakan ne tay tatuktij, wan ne tay tatuktij inte etek, ⁴ ika muchi tay nestuk itech ne Teut weli mas que ne taltikpak, wan ini ne victoriaj ne weli ijpak ne taltikpak: ne tutayulmatilis.

⁵ Ká ne weli ijpak ne taltikpak? Ne kimati ka Yeshu ne ikunew ne Teut, yaja ne!

¹³ Nikijkwilujtuk ini anmupal, ne kiyulmatit ne itukay ne ikunew ne Teut, pal ankimatit ka anyawit yujyultuk senpa. ¹⁴ Wan ini tay tikmatit ipal Teut: ka asu tiktajtanit se tay yaja kita yek, yaja techkaki, ¹⁵ wan asu tikmatit ka yaja techkaki kwak tiktajtanit se, tikmatit ka tay ne tiktajtanit, uni tikpiat.

¹⁶ Asu aka kita se iiknew kichiwa se tay teyek, ne inte se pal miki, ma kitajtani wan yawi weli yultuk ken kinmaka ne tateyekchiwat asu inte se pal miki. ¹⁷ Muchi tay inte nemi pal tikchiwat yaja tateyekchijtuk, wan nemi sejse tateyekchijtuk ne inte pal miki se.

¹⁸ Tikmatit ka asu se nestuk itech ne Teut, inte tateyekchiwa, wan ká ne Teut kichijtuk tajpia wan ne inteyek inte kitalia ne imey ijpak. ¹⁹ Tikmatit ka tikistiwit itech ne Teut wan muchi ne taltikpak muajsi ijtik ne inteyek. ²⁰ Tikmatit ka ne ikunew ne Teut walajtuk wan techmakatuk tamatilis pal tikishmatit ne tay tejkia; wan tinemit ijtik ne tay tejkia, ijtik ne ikunew Yeshu Mawaltijtuk. Ini ne yekkaya Teut wan ne nemilis pal senpa.

²¹ Kukunetzitzin, shimuishpelwikan itech ne sajsankateutzitzin!