Revised Common Lectionary (Complementary)

Dee 3 Psalm

Doft sien Psalm aus hee fonn sien Saen Absalom flijchte must.

¹ O Herr Gott, woo sikj miene Fiend femeat ha! Doa sent fäl dee jäajen mie oppjestone sent.

² Fäl saje fonn miene Seel: "Doa es kjeene Radunk fa am enn Gott." Selah.

³ Oba du, O Herr Gott, best en Schilt romm mie; miene Harlijchkjeit, un dee, dee mien Kopp opphäft.

⁴ Ekj schreajch no mien Herr Gott met miene Stem, un Hee head mie fonn ut sien heilja Boajch. Selah.

⁵ Ekj läd mie dol en schleep; ekj wuak opp, dan dee Herr Gott bewoad mie.

⁶ Ekj woa mie nijch enjste fa dusende fonn Mensche dee sikj jäajen mie jestalt ha runnt omm.

⁷ Sto opp, O Herr Gott! Rad mie, O mien Gott! Dan du hast aul miene Fiend aune Backknoake jeschmattat; du hast dee Gottloose äare Täne jebroake.

⁸ Dee Radunk jeheat daem Herr Gott; dien Säajen es opp dien Folkj. Selah.

² Raeakjent daut aus Freid, miene Breeda, wan jie enn feschiedne Proow enenn faule,

³ dan jie weete daut dee Proow doato es daut jie doaderch bestone kjenne.

⁴ Lot jun Staunthauft en follet Woakj ha, soo daut jie kjenne Follkome en Follstendich senne, daut junt daut aun nusscht faelt.

⁵ Wan irjent waem daut aun Weisheit faelt, dan lot am Gott doano froage, dan hee jeft daut aulem oone waut trig to hoole, oda daut hee am waut faeaschmiete woat, en am woat daut jejaeft woare.

⁶ Oba lot am enn Gloowe froage, en nich twiewle: dan waea twiewelt es soo aus ne Wal em Maea, daut fonn daem Wint bewaeajt, en han en haea jedraewe woat.

⁷ Lot soon Maun nich denke daut hee irjent waut fom Herr kjriehe woat.

⁸ Soon Maun es wankelmietich, onnbestendich enn aul siene Waeaj.

⁹ Oba lot en deemietja Brooda sikj puche enn sien huage Staunt,

¹⁰ en dee Rikja enn sien laeaja Staunt, dan soo aus dee Bloom em Graus woat hee feschwinje.

¹¹ Dan de Sonn kjeem opp met en heeta Wint en fedreajd daut Graus, en dee Bloom felt auf, en daut schmocket es fedorwe. Soo woat uk dee rikje Maun enn siene Waeaj feschwinje.