Revised Common Lectionary (Complementary)

Jun techel cyiˈj akˈanal yaaˈn baˈn

12  Bix akˈx Jesús kbalte cye txˈolbal ley bix cye nintzaj xjal bix cyuya tawil naˈl Dios, bix e cub tkˈoˈnxin jun techel ka tuˈn tbyet‑xin. Tz̈i tzunxin cyjulu:

―At junxin xjal e cuˈx awante cab tken uva. Bix oc tkˈoˈnxin penwen tiˈj. Bix e jaw tbinchaˈnxin jun ttemlel uva tuˈn tel vino tiˈj, bix e jaw tbinchaˈnxin jun jaaˈ nim tweˈ te cˈojlablte tawalxin bix te cˈojlabl ttemlel twitz uva. Bix e cub bint tyolxin cyuya cab xjal tuˈn tcub cyminaˈn ttxˈotxˈxin tuˈntzen oj tjaw awal twitz, niyˈjantzen te taaw txˈotxˈ bix niyˈjantzen cye akˈanal. Bix exxin tuj tbexin.

² Tetzen tumel tuˈn t‑xilj uva, bix e xiˈ tsmaˈnxin jun tsanjelxin te paˈlbel tej texin. ³ Pero tejtzen tpon sanjel, bix oc cypjuˈn manal txˈotxˈ jaxin, bix aj ljet‑xin mintiiˈ uva otk tiikˈxin. ⁴ Tejtzen tpon meltzˈajxin tuya taaw txˈotxˈ mintiiˈ uva kˈiˈn tuˈnxin, bix e xiˈ tsmaˈn taaw txˈotxˈ juntl tsanjel. Tej tzunj tpon sanjel, bix oc cypaˈn manal txˈotxˈ twiˈ sanjel, bix e baj yaset‑xin. ⁵ Bix e xiˈ tsmaˈnxin juntl tsanjelxin. Yal tzunj ja juntl xina, biˈxse e byet‑xin. Bix e xiˈ tchkˈoˈnxin nimtl tsanjelxin cabtl maj. Attzen e baj pjet, bix attzen biˈx e cub cybyoˈnxin. ⁶ Bix e xiˈ tchkˈoˈn texin cykilca ke tsanjelxin. Ya min‑altl e cyaj. Nuk jun tcyˈaalcˈatlxin at tuyaxin. Bix e xiˈ t‑xiˈmanxin tiˈj cyjulu: “Oj t‑xiˈ nchkˈoˈn ncwal, kapetzen cybiˈ manal txˈotxˈ ncwal, tz̈i tzunxin. Bix e xiˈ tchkˈoˈnxin tcwalxin. ⁷ Pero tej tpon tcwalxin, bix akˈ ke manal txˈotxˈ yolel: Ja tcwal taaw txˈotxˈ ma tzul. Tetzele tkabkˈa cyjela jtxˈotxˈa. Ka miin kbyaˈcˈakˈa, tuˈntzen ke cyjela,” tz̈i tzunkexin. ⁸ Bix e tzaj cytzyuˈn manal txˈotxˈ jakˈa, bix e cub byetkˈa, bix ex xeˈt t‑xumlalkˈa tiˈjxe penwen.

⁹ Attzen jun cxeˈl nkanen cyey. ¿Tiiˈntzen cyey tuj cywitz? ¿Ti ctseˈ jxin taaw awal kej xjal manala? Cxeˈltzen nkbaˈn cyey, oj t‑xiˈ jxin taaw txˈotxˈ, cwel tbyoˈnxin ke manal txˈotxˈ, bix cxeˈl tkˈoˈnxin txˈotxˈ te tmaan juntl wik. ¹⁰ ¿Mixpatzen n‑eˈla cyniˈya tiˈj tyol Dios nbyan cyjulu: “Jxak qˈuelel kaˈyba tuj cywitz binchal jaaˈ te tkˈuklel t‑xeeˈ jaaˈ, ja tzunja cwel meltzˈaj te nin tkˈuklel jaaˈ. ¹¹ Jatzen Dios cwel meltzˈunte xak te tbanel xak. Juˈ tzunj axse qˈuelela tuj kwitz,” tz̈i tyol Dios tuj jun bitz?―tz̈i Jesús cye nintzaj xjal.

¹² Toctzen cybiˈn ke nintzaj tawil naˈl Dios, ke txˈolbal ley, bix ke nintzaj xjal tyol Jesús, cyaj tzunxin e tzyet Jesús tuˈn tbyet‑xin, cuma el cyniyˈxin tiˈj ka cyiˈjxin otk yolena Jesús, cuma otk tzˈel cyxooˈnxin ja Jesús. Pero mintzen e cytzuyxin Jesús tuˈn cytz̈i jxjal lepchec tiˈj Jesús. Bix e cyaj cycyeˈyenxin Jesús.