Revised Common Lectionary (Complementary)

³¹ Tej tetz, e xiˈ tkbaˈn Jesús cye t‑xnakˈatzxin:

―Ya ma pon tumel tuˈn tbint wuˈna jma tzaj kˈoˈn weya tuˈn tbint, bix tuˈn tjaw nimset tbi Nmana tuˈnj cbinel wuˈna, inayena, jxjal Smaˈn tuˈn Dios. ³² Bix ka ma jaw nnimsaˈna tbi Dios tuˈnj at tuˈn tbint wuˈna, jax ctzaal tyeecˈan Dios tnimbil weya. Bix chˈixcˈa tpon tumel tuˈn tjaw nimset nbiˈya tuˈnxin. ³³ Key wuya nim n‑oc cyakˈa weya, cxeˈl ntxˈolbaˈna cyey tuj tzinen ti japenina nyola. Nuk chˈintl chin temela cyuyey. Bix cyaja tuˈn cyxiˈy wuyena, pero mlay cheˈxa wuyena. Tisen e xiˈ nkbaˈna cye nejenel cye judío, jax cxeˈl nkbaˈna cyey jaˈlewe, mlay cheˈxa jaaˈ chin xeˈla.

³⁴ Cxeˈl nkˈoˈna cyey jun acˈaj ley. Cˈoquel cyakˈ cyiiba cyey. Tisen ma tzˈoc cyakˈa weya, juˈx cyiiˈnx tuˈn toc cyakˈ cyiiba cyey. ³⁵ Ka ma tzˈoc cyakˈ cyiiba cyey juˈwa, tuˈn tzunj jlu qˈuelel cyniyˈ cykil xjal tiˈj ka nxnakˈatzkey―tz̈i Jesús.