Revised Common Lectionary (Complementary)

Dee 46 Psalm

To dän Haupt Musikaunt, fa dee Korah Säns, En Leet "Fa dee Eentletsje".

¹ Gott es onnse Tooflucht un Macht, en seeha reede Help enn Trubbel.

² Doaromm woa wie onns nijch engste, wan soogoa dee Ead wudd jleppe, un dee Boaj emm See wudde enenn jedroacht woare.

³ Lot dee Wotach roare un schueme; lot dee Boaj scheddre met Schwollst. Selah.

⁴ Doa es en Riefa, dee Streem moake Gott siene Grootstaut froo, dee heilje Fesaumlunjstäd fa däm Aulehejchsta.

⁵ Gott es enn äare Medd, see woat nijch bewäajcht woare. Gott woat ar halpe enn dän Morjeroot.

⁶ Dee Natsjoone weare wuttijch; Kjeenijchrikje weare jescheddat; Hee räd, un dee Ead deed schmelte.

⁷ Dee aulmajchtja Herr Gott es met onns; Joakopp sien Gott es onnse Tooflucht. Selah.

⁸ Komm, en see däm Herr Gott siene Woakje, dee de Ead ferinjneare deit;

⁹ Dee moakt Kjrijch oppheare bott daut Enj fonne Ead; Hee brakjt dee Boage, un deit Spies utaneen bräakje; Hee febrennt dee Kjrijchswoages emm Fia.

¹⁰ Sie stel, un weet daut ekj Gott sie; ekj woa oppjehowe woare mank dee Natsjoone; ekj woa oppjehowe enne Ead.

¹¹ Dee Aulmajchtja Herr Gott es met onns; Joakopp sien Gott es onnse Tooflucht. Selah.

³³ Aus see dit heade, schneet an daut em Hoat, en see fesochte an doot to moake.

³⁴ Oba eena fonn emm Rot stunnt opp, dee Gamaleal heet, en Jesatsleara, dee fonn aule Maun huach je-acht wea, en befool daut see dee Mana sulle en baet rut schekje;

³⁵ en saed donn to daen em Rot: "Mana, Iesraeliete, pausst opp waut jie raeakjne met dise Mana to doone.

³⁶ Nich lanj trig kjeem en Tejudas, en jeef faea daut hee selfst en Groota wea, en onnjefaea feeha Hunndat Maun hunje am aun; daem dootjemoakt wort, en aule, dee am aunhonnje, worde festreit, en daut kjeem aula to nusscht.

³⁷ No daem kjeem Judas fonn Galilaea enn dee Doag aus daut Follkj jetalt wort, en kjreach en schoof Nofolje; en dee kjeem uk omm, en aula, so fael aus am nofoljde weare festreit.

³⁸ En nu saj ekj junt: Blieft fonn dise Mana wajch, en lot daen tofraed! wiel wan dit Rotschlach en dit Woakj fonn Mensche es, woatet to nusscht kome:

³⁹ Oba wan daut fonn Gott es, dan kje jie daen nich fenichte, en kunne meteemol noch aus soone jefunge woare dee jaeajen Gott striede."

⁴⁰ Daem jehorchte see, en aus see dee Apostel trig enenn jeroopt haude, schluage see an, en befoole an daut see nich meeha enn Jesus sien Nome raede sulle, en leete an gone.

⁴¹ Donn feleete see daen Rot, en freide sikj daut see weare weat je-acht worde fa daem Nome Schaund to liede.

⁴² En Dach fa Dach, em Tempel uk fonn Hus to Hus, heade see nich opp fonn Jesus Christus to praedje en to unjarechte.