Revised Common Lectionary (Complementary)

Dee 80 Psalm

To dän Haupr Musikaunt, wäajen dee Lelje. En Psalm von Asaf.

¹ O Iesrael äa Schop Hoad, Du, dee Du Joosef leide deist soo aus ne Häad; dee Du tweschen dee Cherubim wonst, doo schiene.

² Doo diene Macht bewäaje fer Efraim, en Benjamin, un Manasse, un komm doo onns rade.

³ O Gott, doo onns wada trigj dreihe, lot dien Jesejcht schiene; dan woa wie jerat woare.

⁴ O Aulmajchtja Herr Gott, woo lang woascht du noch oajalijch senne jäajen daut Jebaed fonn dien Folkj?

⁵ Du deetst an foodre met daut Broot fonn Trone, un du jeefst an Trone to drinkje.

⁶ Du hast onns en Striet jemoakt to onnse Nobasch; un onnse Fiend lache to sikj selfst.

⁷ O Aulmajchtja Gott, doo onns wada trigj dreihe, un lot dien Jesejcht schiene, un wie woare jerat senne.

¹⁷ Lot diene Haunt opp däm Maun senne fonn diene rajchte Haunt; opp däm Menschesän dän Du stoakj jemoakt hast fa die selfst.

¹⁸ Dan woa wie nijch fonn die trigj wajch dreihe; jeff onns niehet Läwe, un wie woare dien Nome aunroope.

¹⁹ Brinj onns trigj, O Aulmajchtja Herr Gott; lot dien Jesejcht schiene, un wie woare jerat senne.

³ Mucht junt Jnod en Fraed fonn Gott onns Foda, en Jesus Christus onns Herr, jeschenkjt woare.

⁴ Ek dank mien Gott emma fa junt, fa Gott siene Jnod dee junt jejaeft es enn Christus Jesus,

⁵ dan jie sent enn aules enn am rikja jemoakt, enn jun raede uk enn aule erkajntnes,

⁶ so aus daut Zeichness fonn Christus enn junt bestaedicht wea,

⁷ soo daut ju daut aun kjeene Gowe faelt, enn jun wachte fa onns Herr Jesus Christus siene Oppenboarunk;

⁸ dee junt uk bestaedje woat bottem Enj, so daut jie oone Beschuldjunk woare senne enn Jesus Christus sien Dach.

⁹ Gott es tru, dee junt beroope haft Jemeenschofft to habe met sien Saen, Jesus Christus, onns Herr.

²⁴ Oba enn dee Doag no daut Triebsaul, woat de Sonn fediestat woare, en de Mon woat aea Licht nich jaewe,

²⁵ en dee Stearns woare fomm Himel faule, en dee Himelskjrafte woare jescheddat woare.

²⁶ Dan woare see daen Menschsaen kome seene enne Wolkje met groote Krauft en Harlichkjeit.

²⁷ En dan woat hee siene Enjel schekje, en de woare aul siene Uterwaelde toop saumle fonn dee feeha Rechtunje, fom Enj fonne Ead bott daut Enj fom Himel.

²⁸ Nu leat en Jlikjnes fom Fiejeboom: Wan nu dee Asta weak jeworde sent, en dee Blaeda rut kome, dan weet jie daut de Somma dijcht bie es.

²⁹ Soo uk jie, wan jie seene daut aul dit paseat, dan weet jie daut hee dicht bie de Daea es.

³⁰ Enn woarheit saj ekj junt, dit Jeschlajcht woat opp kjeen wajch feschwinje bott dit aules paseare woat.

³¹ Himel en Ead woare fegone, oba miene Wead woare niemols fegone.

³² Oba fonn daen Dach oda Stunnd weet kjeena, nich dee Enjel em Himel, uk nich de Saen, bloos de Foda.

³³ Siet faeasechtich! Siet Waka! Dan jie weete nich waneeha dee Tiet es.

³⁴ Daut es soo aus en Maun dee fonn Hus wajch deit, en jeft siene Sklowe Follmacht, to en jiedrem siene Oabeit, en jeft daen Daearewajchta befael daut hee woake saul.

³⁵ Doaromm woakt! dan jie weete nich waneeha dee Husherr kome woat, auf lot, oda Mednacht, oda wan dee Hon kjreit, oda tiedich;

³⁶ daut wan hee meteemol haustich kjemt, hee junt nich em Schlop finjt.

³⁷ En waut ekj junt saj, saj ekj to aulem: woakt!"