Revised Common Lectionary (Complementary)

Dee 139 Psalm

To dän Haupt Musikaunt, een Psalm fonn Doft.

¹ O Herr Gott, Du hast mie unjasocht un mie jekjant.

² Du weetst mien Dolsette, un mien oppstone; Du festeist miene Jedanke fonn wiet auf.

³ Du deist mien Stijch derjch säwe, un mien dol laje, un best bekaunt met aul miene Wäaj.

⁴ Dan doa es nijch en Wuat opp miene Tunj, O Herr Gott, du weetst daut aules.

⁵ Du hast mie enn jeschlote hinje un uk fäare, un diene Haunt es opp mie jelajcht.

⁶ Soone Wissenschoft es to wundaboa fa mie, daut es soo huach, ekj kaun daut nijch erlange.

¹³ Dan Du hast mien Ennaschtet bejräpe; du deetst mie enn miene Mutta äa Muttalief toop wäwe.

¹⁴ Ekj woa die danke, dan ekj sie wundaboa met furchtboare Dinje; Diene Woakje sent wundaboa, un miene Seel weet daut seeha goot.

¹⁵ Miene Knoakes weare nijch fonn die festoakje aus ekj emm Jeheeme jemoakt wort, aus mie jewäft wort enn daut deepet fonne Ead.

¹⁶ Diene Uage sage mien Emfange; un aul miene Jlieda weare enn dien Buak dol jeschräwe aus dee jeformt weare, un doa noch kjeene mank an wea.

¹⁷ Un woo kjestlijch sent diene Jedanke to mie, O Gott! Woo groot es dee Somm doafonn!

¹⁸ Wan ekj dee talle sull, sent dee meeha aus daut Saunt; wan ekj oppwakj sie ekj noch bie die.

10 Ekj selfst, Paul, prache junt derch Christus siene Saunftmoot en Jedult, ekj, dee seeha Deemietich sie mank junt, oba Brow wan ekj wajch sie.

² Nu bed ekj, wiel ekj nich bie junt sie, daut wan ekj bie ju woa senne, nich bruck Driest senne enn daut Toofetruehe daut ekj raeakejn to bruke jaeajen daen dee meene daut wie nom Fleesch waundle.

³ Dan wan wie em Fleesch sent, doo wie doch nich nom Fleesch kjamfe.

⁴ Dan dee Jewaeare met dee wie kjamfe sent nich fleeschlich, oba kjraftich enn Gott aules dol to braeakje daut faust steit, mensche Jedanke,

⁵ en aules daut sikj jaeajen dee Erkjantnes fonn Gott oppstalt, en naeme aule Jedanke jefange dee jaeajen Jehuarsaum to Christus sent,

⁶ en sent reed, aulet Onnjehuarsaum to strofe, wanemma jun Jehuarsaum woat erfelt senne.

⁷ Jie kjikje bloos no daut waut fonn bute es. Wan irjent waea sikj secha es daut hee Christus aunjeheat, lot am doamet raeakjne daut soo aus hee Christus aunjeheat, soo sent wie uk.

⁸ En wan ekj sull dolla puche aewa dee Macht dee de Herr mie jejaeft haft junt opptobuehe en nich dol to riete, schaem ekj mie dowaeajen nich;

⁹ dan ekj wel nich ha daut jie denkje sele daut ekj junt met miene Breew enjste wel.

¹⁰ Dee saje daut siene Breew sent Strenj en Schwoa, oba enn Peersoon es hee kjarpalich Schwak, en siene Raed es tom fe-achte.

¹¹ Lot soone doamet raeakjne, daut soo aus wie en Wead sent enn onnse Breew wan wie wajch sent, soo woa wie uk senne enn Woakj wan wie bie junt sent.