Revised Common Lectionary (Complementary)

Dee 67 Psalm

To dän Haupt Musikaunt, fe en Späldinkj met Seide. En Psalm, en Leet.

¹ Mucht dee Herr erboarment senne to onns, un onns säajne, un mucht sien Jesejcht opp onns schiene. Selah.

² Daut dien Wajch mucht oppe Ead bekaunt senne, diene Radunk mank aule Natsjoone.

³ Lot dee Felkja dien danke, O Gott, lot aul dee Felkja die danke.

⁴ O lot dee Felkja froo senne, un fa Freid sinje; dan du woascht dee Felkja enn Jerajchtijchkjeit rejchte, un äwa dee Felkja oppe Ead rejeare.

⁵ Lot dee Felkja die Dank jäwe, O Gott; lot aul dee Felkja die Dank jäwe.

⁶ Dee Ead haft äa Toonämet jejaeft; Gott, onns eajna Gott, woat onns säajne.

⁷ Gott woat onns säajne, un aul dee Winkjels enne Ead woare am ferjchte.

11 Ekj saj dan: haft Gott sien Folkj auntsied jesat? Muchtet nich senne! Ekj sie uk en Iesraelite, fonn Obraum sien Some, utet Benjamien Staum.

² Gott haft sien Folkj daut hee ferhaea uterwaelt haud nich auntsied jesat. Oda weet jie nich waut dee Schreft sajcht derch Elia, woo hee fer Gott kjeem jaeajen Iesrael en saed:

²⁹ Dan Gott siene Gow en sien Beroope gone nich trigjtonaeme.

³⁰ Dan soo aus jie donn Gott Onnjehuarsaum weare, oba nu derch aea Onnjehuarsaum ha Jnod jekjraeaje,

³¹ jrod soo dee, dee nu Onnjehuarsaum sent, kjenne nu Jnod erfoare derch june Jnod.

³² Dan Gott haft aule beschlote emm Onnjehuarsaum, so daut hee aulem kunn Jnod bewiese.

¹⁰ En hee roopt daut Follkj no sikj en saed to an: "Horcht, en festot!.

¹¹ Waut en Mensch em Mul enenn nemt deit am nich feonnreinje, oba daut waut utem Mul erut kjemt, daut moakt en Mensch Onnrein."

¹² Donn kjeeme dee Jinja no am en saede to am: "Weetst du daut dee Farisaea beleidicht weare aus dee daut heade?"

¹³ Hee auntwuad en saed: "Aule Plaunte dee mien himlischa Foda nich jeplaunt haft, woare utjeraete woare.

¹⁴ Lot an toch, dee sent blinje Blinjeleidasch; en wan een blinja en aundra blinja leit, woare see beid em Growe faule."

¹⁵ En Peeta saed to am: "Moak onns dit Jlikjnes dietlich."

¹⁶ Donn saed hee: "Se jie uk noch soo onnfestendich?

¹⁷ Festo jie nich daut waut em Mul enenn jeit, jeit dan em Buk enenn, en jeit dan derch, en rut?

¹⁸ Oba waut utem Mul erut kjemt, kjemt fom Hoat, en dit es waut en Mensch feonnreinicht.

¹⁹ Dan fonn utem Hoat kome beese Jedanke, Mort, Eehebruch, Hurarie, Deewerie, faulschet Zeichnes, en Lastre.

²⁰ Dit sent dee Dinje dee en Mensch feonnreinje, oba met oonjewosschne Henj aete moakt en Mensch nich Onnrien."

²¹ Donn jinkj Jesus fonn doa wajch en jinkj no dee Tierus en Siedoon Ommjaeajent.

²² En kjikj - ne kananietesche Fru fonn dee Ommjaeajent kjeem am entjaeajen en schreach: "Herr, du Doft sien Saen! erboarm die aewa mie! miene Dochta es schlem met en beese Jeist besaete."

²³ Oba hee jeef aea kjeene auntwuat, nich een Wuat. Siene Jinje kjeeme no am en prachada am en saede: "Schekj aea wajch, dan see schricht onns lud hinjaraun!"

²⁴ Oba hee auntwuad en saed: "Ekj sie no kjeenem jeschekjt buta dee felorne Schop fonn daut Jeschlajcht Iesrael."

²⁵ Oba see kjeem en baed am aun, en saed: "Herr, halp mie!"

²⁶ Oba hee auntwuad en saed: "Daut es nich goot daut Broot fonn dee Kjinje to naeme, en no de Hung schmiete."

²⁷ En see saed: "Jo, Herr; oba sogoa dee Hung aete dee Kjreemels dee fonn aea Meista sien Desch faule."

²⁸ Donn auntwuad Jesus en saed to aea: "O Fru, dien Gloowe es Groot! Lotet soo sene aus du wensche deist!" En aeare Dochta wea jeheelt fonn dee Stunnd aun.