Revised Common Lectionary (Complementary)

⁸ Ekj woa heare waut dee Herr Gott saje woat, dan Hee woat Fräd to sien Folkj räde, un to siene Heilje; oba lot dän nijch wada no Dommheit dreihe.

⁹ Sejchalijch es siene Radunk dijcht bie jekomen no dän dee Am ferjchte; soo daut daut Harlijchkjeit wone kaun enn daut Launt.

¹⁰ Erboarme un Woarheit ha sikj toop jetroffe; Jerajchtijchkjeit un Fraed ha sikj jekust.

¹¹ Woarheit woat ut dee Ead rut sprinje, un Jerajchtijchkjeit kjikjt rauf fom Himel.

¹² Jo, dee Herr Gott woat onns goodet jäwe, un onns Launt wudd dee Arnt femeare.

¹³ Jerajchtijchkjeit woat fer Am gone, un woat en Wajch moake fa siene Staupe..

⁵ Mooses schreef: "Dee Mensch, dee de Jerachtichkjeit em Jesats eeft, saul doaderch laewe".

⁶ Oba dee Jerachtichkjeit fom Gloowe sajcht: "Saj nich en dien Hoat, 'Waea woat enopp foare nom Himel?'" [daut meent Christus rauf hole];

⁷ Oda: "Waea woat erauf foare no de Doodes?" [daut meent Christus enopp brinje fonn dee Doodes].

⁸ Oba waut sajchtet? "Daut Wuat es dicht bie die, enn dien Mul en enn dien Hoat, dit es daut Wuat fom Gloowe daut wie fekjindje.

⁹ Wiels wan du met dien Mul daem Herr Jesus bekjanst, en enn dien Hoat jleefst daut Gott am fom Doot haft oppjewakjt, woascht du seelich."

¹⁰ Dan met daut Hoat jleeft Maun to Jerachtichkjeit, en metem Mul bekjant Maun to Seelichkjeit.

¹¹ Dan de Schreft sajcht: "Waeaemma aun am jleeft woat nich to Schaunde woare".

¹² Dan doa es kjeen unjascheet tweschen Jude en Grieche; dan de naemlije Herr aewa aulem es Rikj fa aule dee am aunroope.

¹³ Dan en jiedra, waeaemma daem Herr sien Nome aunroopt woat seelich woare.

¹⁴ Oba woo saele see daem aunroope en daem see nich jleewe? woo kjenne see jleewe aun daem fonn waem see nich jeheat habe? en woo saele see heare oone daut waea praedje deit?

¹⁵ en woo saele see praedje wan see nich erut jeschekjt sent? soo auset jeschraewe steit: "Woo wundascheen sent daen aeare Feet dee Fraed praedje, en goode Norecht brinje!"

²² En fuats befool hee de Jijna daut see em Schepp enenn sulle, en am feropp foare no de aundre sied, wiel hee daut Follkj wajch schekjt.

²³ Aus hee daut Follkj entlote haud, jinkj hee apoat opp en Boajch doa to baede. Auset nu Owent wea, wea hee doa auleen.

²⁴ Oba daut Schepp wea nu aul wiet auf fomm Launt, en leet Not waeajen dee Wale, dan dee wint wea jaeajenaun.

²⁵ Enn dee feade Nachtwoak kjeem Jesus an entjaeajen, en jinkj oppem Wota.

²⁶ En dee Jinje sage am oppem Wota gone, en haude groote Angst, en saede: "Daut es en Jespanst!" en schreaje ut Angst!

²⁷ Oba Jesus saed fuats to an: "Siet Froo! Dit sie ekj, aengst junt nich!"

²⁸ Donn saed Peeta to am: "Herr, wan du daut best, dan kroag mie oppem Wota no die to kome!"

²⁹ En hee saed: "Komm!" Peeta kroop utem Schepp, en jinkj oppem Wota Jesus entjaeajen.

³⁰ Oba aus hee daen Wint sach, aengst hee sikj, en funk aun unja to gone, en schreach en saed: "Herr, rad Mie!"

³¹ Platslich reakjd Jesus siene Haunt rut en kjreach am to hoole, en saed to am: "Du Kleenjleefscha, wuaromm twiewelds du?"

³² En aus see em schepp enenn steaje, wort dee Wint gauns stel.

³³ En aul dee em Schepp baede am aun en saede: "Du best werklich Gott sien Saen!"