Old/New Testament
Dee 49 Psalm
To dän Haupt Musikaunt, en Psalm fa dee Korah Säns.
1 Horjcht no dit, jie gaunse Welt; horjcht aul jie dee enne Welt wone.
2 Beides Mensche Saens un Mensche Kjinje, rikj un oam toop:
3 Mien Mul saul Weisheit räde, un dee Jedankje enn mien Hoat sele Festentnis jäwe.
4 Ekj woa mien Ua dol beaje to en Jlikjnes; ekj woa mien diestret Räde op moake opp ne Haop.
5 Wuaromm sull ekj mie enn dee Doag ferjchte wan Beeset kjemt, wan daut Gottlooset kjemt fonn dän dee mie ommrinje?
6 Soone dee enn äa Rikjdom fetruehe, un enn äa Hab un Goot, doone sikj puche.
7 En Maun kaun sien Brooda nijch rade, oda Leesjelt to Gott jäwe fa am –
8 dan dee Radunk fa äare Seel es kjestlijch, un daut deit fa emma oppheare –
9 dan hee woat doch fa emma läwe; hee woat niemols Fewäsunk seene.
10 Dan dee seeha Weise stoawe, dee Noa un dee soo aus en Tia sent kome toop omm, un lote äa Rikjdom to aundre.
11 Äare ennalijche Jedanke sent daut äare Hiesa emma bliewe woare, un äare Woninj to aule Jeschaljchte; see nane äare Lenda no äare eajne Nomes.
12 Oba dee Mensch saul nijch enn Ea bliewe: hee es soo aus dee Tiare, dee sele ommkome.
13 Dit es dee Noarische äa Wajch, un doch woare soone en Fejneaje ha dee an nofolje.
14 Dee woare bestemmt to dän Doot, dee Doot woat äwa an rejeare; un dee Opprajchte woare äwa an aum Morje rejeare; äa Form es fa fefule, daut Grauf es sien Heim.
15 Oba Gott woat miene Seel fonn daut Grauf rade, dan Hee woat mie näme. Selah.
16 Ha nijch Angst wan doa wäa Rikj woat, wan dee Harlijchkjeit fonn sien Hus toonemmt;
17 Dan wan hee stoaft, woat hee nuscht met näme, siene Harlijchkjeit woat nijch met am met gone.
18 Dan wäarent hee läft, deit hee siene Seel säajne – jo, Mensche doone die preise wan du goot deist fa die selfst-
19 Hee woat no dee Jeschlajchte fonn siene Fodasch gone; dee woare niemols Lijcht seene.
20 En Mensch dee huach enn Ea es, oba nijch Festentnis haft, es soo aus dee Tiare, dee woare feschwinje.
Dee 50 Psalm
En Psalm fonn Doft.
1 Gott, dee Herr Gott haft jerät, un roopt to dee gaunse Welt fonn wan dee Sonn oppkjemt bott dee unja jeit.
2 Ut Zion, daut Follkomnet fonn Straumet, haft Gott Lijcht utjestrolt.
3 Onns Gott kjemt, un hee es nijch stel; en Fia woat fetäare fer am, un daut woat seeha stormijch senne runnt omm am.
4 Hee woat to dee Himels roope fonn Bowe un no de Ead, soo daut hee sien Folkj rejchte mucht.
5 Fesaumel miene Heilje no mie, dee met mie en Bunnt jemoakt ha derjch en Opfa.
6 Un dee Himels woare siene Jerajchtijchkjeit behaupte, dan Gott selst es dee Rejchta. Selah.
7 Horjch, mien Folkj, un ekj woa räde; O Iesrael, un ekj woat jäajen junt Zeije; ekj sie Gott, jun Gott.
8 Ekj woa junt nijch dodle wäajen june Opfa; jo, june Braunt Opfa sent emma fer mie;
9 Ekj woa kjeen Boll ut june Heim näme, uk nijch Kosebakj fonn ut june Häad-
10 Dan en jiedat Beest enn dän Woolt es mient, daut Fee opp dusent Boaj;
11 Ekj weet fonn aul dee Fäajel opp dee Boajc; un aules daut sikj bewäajcht enn dee Felde sent miene.
12 Wan ekj hungrijch wea, wudd ekj junt nijch saje; dan dee Welt es mient, un daut Follet doarenn.
13 Woa ekj Bollefleesch äte, oda daut Kosebock Bloot drinkje?
14 Opfa Dank to Gott, un betol dien Fespräakje to daem Aulahejchsta.
15 En roop mie aun enn dän Trubbel Dach; ekj woa die rade, un du saust mie feharlijche.
16 Oba to dee Gottloose sajcht Gott: "Waut fonn Rajcht ha jie fonn miene Jerejchte to räde, oda mien Bunnt enn jun Mul näme,
17 sentamol jie Unjarejchtunj hausse, un miene Wead hinje junt schmiete?"
18 Wan jie en Deef sage, dan rand jie met am, un jie sent fe-eenijcht met Huare.
19 Jie äwajäwe jun Mul to Beeset, un june Tunje räde Lest.
20 Du setst un rätst jäajen dien Brooda; du deist diene eajne Mutta äa Sän schlajchtet noräde.
21 Dit hast du jedone, un ekj wea stell doawäajen – du dochst sejchalijch wudd ekj soo senne aus du; oba ekj woa die dodle, un woat daut enne Reaj fer die stale.
22 Nu denkj aun dit, jie, dee jie fonn Gott fejäte, sest woat ekj entwei riete, un doa kjeena woat senne tom rade.
23 Wäaemma Dank opfat deit mie feharlijche, un ekj woa däm Gott siene Radunk wiese dee sien Wajch rajcht moakt.
1 Paul, Jesus Christus sien Sklow, beroope aus en Apostel, bestemt fa Gott sien Evanjeelium;
2 [daut hee ferhaea fesproake haud enne Heilje Schreft derch siene Profeete]
3 Fonn sien Saen, dee fonn Doft sien Staum kjeem nom Fleesch,
4 oba met Macht beteakjent wort aus Gott sien Saen no daem Jeist de Heilichkjeit derch sien oppstone fom Doot;
5 derch daem wie Jnod en daut Apostelaumt jekraeaje habe tom Jehuarsaum emm Gloowe mank aule Felkje omm sien Nome haulwe.
6 Jie sent uk mank dee, dee beroope sent enn Jesus Christus;
7 Aun aul dee, dee enn Room sent, daen Gott leef haft, dee Heilje jenant sent. Mucht Jnod en Fraed fonn Goot onns Foda en fonn daem Herr Jesus Christus met ju senne.
8 Tom easchte dank ekj mien Gott derch Jesus Christus fa junt aule, wiel enn aule Welt woat fonn jun Gloowe jeraet.
9 Dan Gott, daem ekj enn mien Jeist deen em Evanjeelium fonn sien Saen, es mien Zeij, woo ekj enn eent fonn junt raed enn mien Jebaed.
10 Emma enn miene Jebaed prache ekj auf ekj feleicht nu boolt ne goode Reis kaun habe, no Gott sien Wele, no junt to kome.
11 Dan mie felangt daut junt to seene, daut ekj junt ne jeistlije Gow kaun met deele, daut jie muchte jejrint woare,
12 Daut heet, daut ekj met junt toop kaun jetreest woare derch daen Gloowe daen wie toop habe.
13 Ekj wel junt oba nich em Dunkle lote, Breeda, daut ekj foaken jeplont haud no junt to kome daut ekj mank junt uk waut Frucht kunn habe so aus mank aundre Felkja, oba ekj wort bottt nu emma jehindat.
14 Ekj sie en Schuldna aun de Grieche uk de Utlenda, aun dee Kluake uk dee, dee nich Kluak sent;
15 Doaromm, so wiet us mie daut aunbelangt sie ekj iewrich uk junt enn Room daut Evanjeelium to praedje.
16 Dan ekj schaem mie nich met daut Evanjeelium, dan daut es dee Krauft Gottes aul dee seelich to moake dee doaraun jleewe, de Jude daut easchte en uk de Grieche.
17 Dan doarenn es Gott siene Jerachtichkjeit jeoppenboat fom Gloowe tom Gloowe, so auset jeschraewe steit, "Dee Jerachte saul derch sien Gloowe laewe".
18 Dan Gott sien Oaja es fom Himel jeoppenboat jaejen aulet Gottloose en Onnjerachtichkjeit enn Mensche, dee enn Onnjerachtichkjeit de Woarheit bedrekje.
19 Dan waut fonn Gott to weete es, es mank an jeoppenboat worde.
20 Dan dee Dinje dee nich to seene sent, naemlich Gott siene eewje Krauft en Gottheit, sent doch goot to festone derch daut waut hee erschaufe haft, so daut see oone enschuldjunk sent.
21 Wiels, aus see Gott kjannde, deede see am nich feharliche aus Gott, weare am uk nich dankboa, worde stolt en aeare Jedanke, en aeara Hoate Jedanke worde enne Diestanes enenn jefeat.
22 See jeewe faea daut see Kluak weare, oba muake sikj selfst to Noare,
23 en enndade Gott siene onnfejenklijche Harlichkjeit enn ne aenlichkjeit fonn fejenklijche Mensche, en Faejel, en feehabeensche Tiere, en krupende Kjraeta ennen.
24 Doaromm jeef Gott an han derch aeare Loste en aeare Hoate, daut see enn Onnreinichkjeit sikj aeare Kjarpa unjarenaunda to Schaund brochte.
25 See habe Gott siene Woarheit je-endat to Laeajes, en ha daut waut ershaufe es aunjebaet leewa aus daem dee daut erschaufe haft, dee opp eewich jesaejent es. Amen.
26 Doaromm jeef Gott an enn aeare schentliche Losst han, dan sogoa aeare Frulied habe daen natearliche Ommgank met Mana je-endat no daut waut jaeajen daut natearliche es;
27 en uk dee Mana ha daen natearlichen Ommgank met de Fru felote, en brenne enn aeare Losst eena tom aundra, Mana ha Ommgank met Mana, en driewe daut waut schaunthauft es, en ha enn sikj selfst dee Strof jekraeaje fa aea Ertum, so auset sull senne.
28 En jrod so aus see nich wulle Gott en aeare Jedanke hoole, haft Gott an hanjejaeft daut see en faulscha Senn ha, daut to doone waut nich Schekjlijch es.
29 See sent foll Onnjerachtichkjeit, Boosheit, Jiets, Beeset, sent aufjenstich, foll Mort, Striet, sent hinjarikjsch, ha beese Raed, sent Laejna,
30 see spotte, hause Gott, sent Frajch, Onnfeschaemt, puche sikj, finje aula haunt ut meeha beeset to driewe, sent Elre onnjehuarsaum,
31 ha kjeen Festentnes, sent nich to fetruea, oone Leew, ha kjeen Erboarme.
32 En wan see uk Gott siene Ordninj weete, daut dee, dee soont aungone daem Doot fedeene, daut nich bloos doch doone, oba unjastete aundre dee daut aungone.
Copyright © 2001 by Elmer Reimer