Old/New Testament

Dee 10 Psalm

¹ Wuaromm steist du soo wiet auf, O Herr Gott? Woascht du die festäakje enn schwearije Tiede?

² Dee Beesa woat enn siene Stolltheit dee Oame hinjaraun joage; dee woare jejräpe woare enn äare eajne Plone dee see utjedocht habe.

³ Dan dee Beese puche sikj äwa äa Seele Janke, un kjneet sikj dol fer dee Jietsje; dan hee haft däm Herr Gott fe-acht.

⁴ Enn siene Stolltheit woat dee Beesa nijch seakje - doa es kjeen Gott enn aul sien Fäanäme.

⁵ Siene Wäaj sent emma äwareen, diene Jerejchte sent wiet wajch fonn sien Aunseene; waut siene Fiend aunbelangt, hee pust opp daen.

⁶ Hee haft enn sien Hoat jesajcht: "Ekj woa nijch wieda jerekjt woare!" Fonn eene Jeschlajcht no daut näakjste, niemols enn Onnjlekj.

⁷ Sien Mul es foll Lastre un Lest un Schwindlarie; unja siene Tunj es Schowanak un Beeset.

⁸ Hee set enn dee festoakne Städe enn dee Darpe; enn dee Jeheeme Städe deit hee dee onnschuldje ommbrinje, siene Uage sent jäajen dee Oame.

⁹ Hee luat emm Jeheeme soo aus aus en Leiw enn siene Gruft; hee luat festoake dee Oame to jriepe, dän enn sien Nat enenn.

¹⁰ En wan hee feschmatat haft, beajcht hee sikj dol; dee Oame sent jefolle derjch siene Stoakje.

¹¹ Hee haft enn sien Hoat jesajcht: "Gott haft fejäte, hee haft sien Jesejcht festoake, hee woat niemols seene."

¹² O Herr Gott, sto opp! O Gott, doo diene Haunt opphäwe, fejat nijch fonn diene Jerinje.

¹³ Wuaromm deit dee Beesa Gott fe-achte? Dee haft enn sien Hoat jesajcht daut du an nijch woascht feauntwuatlijch hoole.

¹⁴ Du hast jeseene, dan du hast äa Schowanakjet un Fedruss beoobacht, met diene Haunt trigj to tole. Dee Oama äwajeft sikj aun die, du best dee Weisekjinje äa Help.

¹⁵ Bräakj dee Beese un Gottloose äa Oarm; doo sien Gottlooset utforsche bott doa nuscht meeha to finje es.

¹⁶ Dee Herr Gott es opp emma un emma Kjeenijch, dee Natsjoone sent ut sien Launt feschwunje.

¹⁷ O Herr Gott, du hast dee Deemietje äa Janka jeheat, du woascht äa Hoat reed moake, dien Ua woat heare

¹⁸ Dee Weisekjinje un Bedrekjte to rejchte, un dee Maun fonne Ead saul sikj nijch meeha enjste.

Dee 11 Psalm

To daen haupt Musikaunt, a Psalm fonn Doft.

¹ Ekj socht Tooflucht enn däm Herr Gott - woo kaunst du to miene Seel saje: "Flijcht no dien Boajch soo aus en Foagel."

² Dan see! dee Beese traumple dän Boage; dee moake äare Fiele reed aum Baunt, doamet no dee Opprajchte to scheete.

³ Wan dee Grunntloag fenijcht woare, waut kjenne dee Jerajchte doone?

⁴ Dee Herr Gott es enn sien heilja Tempel; dee Herr Gott, sien Troon es enne Himels; siene Uage seene; siene Uagalette woare dee Mensche Säns unjaseakje.

⁵ Dee Herr Gott prooft dee Jerjachte ut, oba siene Seel haust dee Beese, un däm dee Jewault leef haft.

⁶ Hee woat Schlenj opp dee Beese räajne; Fia en Schwäweblit un en heeta Wint saul dän äa Deel senne.

⁷ Dan dee Herr Gott is Jerajcht; hee haft jerajchte Woakje leef, dee Opprajchte seene sien Jesejcht.

Dee 12 Psalm

To daen haupt Musikaunt opp Scheminot, en Psalm fonn Doft.

¹ Halp, O Herr Gott, dan dee Heilje sent feschwunje; dan dee Tru sent, sent nijch to finje mank dee Mensche Säns.

² Dee raede Nutslooset, en jieda met sien Noba, met Leppe dee schmeijchle un räde met en dobbeldet Hoat.

³ Dee Herr Gott woat aule aufschniede dee met schmeijchel Leppe räde, un ne Tunj dee Stolltet räde deit;

⁴ dee saje: "Wie woare jewenne met onnse Tunje, onnse Leppe jeheare onns, wäa es Herr äwa onns?"

⁵ "Ekj woa nu oppstone fa dee Oame äa Bedrekje un daut Sefte fa dee Bederftje," sajcht dee Herr Gott. "Ekj woa dän fesejchre, hee stänt doafäa."

⁶ Däm Herr Gott siene Wead sent ajchte Wead, soo aus Selwa daut jereinijcht es enn en eadna Owe, säwen mol jereinijcht.

⁷ Du woascht dän behoole, O Herr Gott; du woascht dän behoole fonn dit Jeschlajcht fa emma.

⁸ Dee Beese wanke romm aun aule Siede wan dee Beese Mensche Säns daut Beeset lowe.

19 Nu pasead daut aus Apollus enn Korint wea, daut Paul derch dee hechre Lenda reisd en kjeem no Efeesus, en funk doa Jinja,

² en saed to an: "Kreaj jie daem Heilje Jeist aus jie jleewde?" See saede to am: "Wie ha nich jeheat daut doa en Heilje Jeist es."

³ He saed: "To waut word jie dan jetauft?" See saede: "To Jehaun siene Taufe."

⁴ Donn saed Paul: "Jehaun tauft met ne Taufe to de Buesse, en saed to dee Mensche daut see enn daem jleewe sulle dee no am kome wudd, - daut heet, enn Jesus."

⁵ Aus see dit heade, leete see sikj taufe enn daem Herr Jesus sien Nome.

⁶ Donn laed Paul siene Henj opp an, en dee Heilje Jeist kjeem opp an, en see raede enn Tunge en profetseide.

⁷ Doa weare twalf Mana aules toop.

⁸ Hee jinkj enne Sienagoog enenn en raed brow fa dree Moonat, en unjahilt sikj met dee Mensche, en lead an fonn daut Gottesrikj.

⁹ Oba aus walkje sikj fehoade, en onnjehuarsaum weare, en schlajchtet raede fonn daem Wajch fer daut Follkj, feleet Paul, en neem dee Jinja en unjahilt sikj en raed jieda Dach enn daem Tieranus siene School.

¹⁰ Hee deed dit fa twee Yoa, soo daut aul dee, dee enn Asean wonde daem Herr sien Wuat heade, beides Jude uk Jrieche. En Gott deed butajeweenlije en kjraftje Woake derch Paul siene Henj,

¹² soo daut sogoa Schnuppeldeakje en Schaldeakje fonn siene Hut jenome worde en opp dee Kranke jelajcht, en aeare Krankheite feleete, en beese Jeista jinje rut.

¹³ Oba eenje fonn dee Jude dee rommjinje beese Jeiste erut to dreewe, proowde daem Herr Jesus sien Nome ro brucke omm beese Jeiste erut to driewe fonn daen dee beese Jeiste haude, en saede: "Ekj beschwea die derch daem Jesus daen Paul praedicht".

¹⁴ Doa weare saewen dee daem Huagapriesta siene Saens weare dee daut deede.

¹⁵ En dee beese Jeist saed to an: " Jesus kjan ekj, en fonn Paul festo ekj; oba waea sent jie?"

¹⁶ En dee Maun enn daem dee beese Jeist wea sprunk opp an, wea stoak en neem an unja, so daut see bloodrich en noaktich utem Hus rande.

¹⁷ Dit wort bekaunt to aul dee Jude en Jrieche dee enn Efeesus wonde, en ne groote Forcht aewakjeem an aule, en daem Herr Jesus sien Nome wort huach jehowe.

¹⁸ En fael fonn daen dee tom Gloowe jekome weare, kjeeme en bekjande, en muake bekaunt waut see jedone haude.

¹⁹ En fael fonn dee, dee nieschearje Tsaubakrauft jedone haude, brochte dee toop fer an aula en febrennde dee; en see raeakjende daen priese doafonn, en funge dautet bie feftich dusant Selwa biete weat wea.

²⁰ En soo femead sikj daem Herr sien Wuat enn Krauft en wort seeha Stoakj.